Read SEBR SÕNGO, 1998 Ezekiyɛl 40 Bible Online

Ezekiyɛl 40 - SEBR SÕNGO, 1998 bible

Ezekiyɛl 40

¹Soaala nug pãng waa n zẽk-m lame n ta Zerizalɛɛm. Yɩɩ tõnd yembda yʋʋmd pisi la a nu soaba sẽn waa n sɩngdẽ, yʋʋmda pipi kiuuga rasem sẽn sõd piiga, Zerizalɛɛm wãab poore yʋʋm sẽn maan piig la a naase, a raara tã-tã wã. Naaba-Wẽnd lika b menga

²[71†] la m yamẽ, ne yĩngr vẽnegre, m yãeeme tɩ b talla maam n ta Israyɛl, n dʋʋs maam tãn-lug-lug a ye zugu. M yãee tãnga sigdga nug-rɩtgo, bũmb sẽn tonde wa tẽng ne a roto.

³[72†] Be la b tall-m n ta la m yãenda neda. Raoa neng ra pɩnda wa zũudu sẽn duugi. Nin-kãng ra zãada beren-dɩgr wĩir a nugẽ, n paas rasaar la yaa rasaar sẽn tar n magda. Raoã ra yɛsa tẽnga noore.

⁴Nin-kãng n yeel maam: «Ezekiyɛl, puk f nini la yoog f tʋba. Ges m sẽn na n wilg-f bũmb ninga neere. Yaa bõn-kãng gesg yĩnga la m tall-f n wa ka. F sã n yãend-a la f na n yaool marsã n wilg Israyɛl kambã f sẽn yãende.»

⁵ [73†] Ad-m sẽn yãende: lalg n da gũbg wẽnd doogã. Raoã ra zãada a magdga. Magdga woglem yaa kãntɩɩs a yoobe. (Paasda nug yakemde tɩ marsã kãntɩɩga paam pĩnd soaba woglem.) Raoã maga lal-gũbrã taglem la a zãndlem. Fãa ra yaa kãntɩɩs a yoob-yoobe.

⁶A taa noor ning sẽn get yaangã, n dʋ a teedsã, n mage: kãntɩɩs a yoobe. Noor fãa maga kãntɩɩs a yoobe.

⁷Ro-bõonesa magame: b woglem dasaare, b yalem, dasaare. Ro-bil ne a to sʋka yaa kãntɩɩs a nu. A paama dasaare a sẽn mag noora sẽn kẽed dooga pʋgã.

⁸A sẽn mag noorẽ zãongã,

⁹a paama kãntɩɩs a nii. Lalse la ra me tagd-tagdo n yals noorẽ wã la a ye fãa taglem yaa kãntɩɩs a yiibu. Zãonga kʋɩlenga da ninga pʋgẽ.

¹⁰Yaang noorẽ ro-bõonesa ra tonga a tãab kɩreng a ye, a tãab kɩreng a to. B fãa ra zema taaba, b lals tagda me ra zema taaba.

¹¹Raoã maga dignoora yalem: kãntɩɩs piiga, n mag noora menga: kãntɩɩs piig la a tãabo.

¹²Gɩdgre n da gɩdg ro-bil ne a to sʋka, da yaa kãntɩɩga. La ro-bõonega da tara kɩreng a ye kãntɩɩs a yoobe, kɩreng a to wã me kãntɩɩs a yoobe.

¹³Raoã maga noorã, a sɩngre n tãag a sɛɛbo: kãntɩɩs pisi. Rignoor fãa ra tota ne a to.

¹⁴A maga zãongã sẽn pʋgd ro-bõonesã: kãntɩɩs pisi. A ra tɩ yɛsa sʋka n tar a toorẽ lalse.

¹⁵Sor n da yit zãongã n digd pʋgẽ noorã. Sora maga kãntɩɩs pis-nu.

¹⁶B ra ninga peem-lees sẽn pɩgdg ne raado, ro-bõonesa, yɩng lalsã, lals niyns sẽn welg-b ro-bõonesa ne taabã, la taoor zãonga lalse. Peem-leesa ra yaa yalems pʋgẽ n yɩɩd yɩnga. B ra ning-b-la zãonga lalsã n gilgi. Koms vãad la b ra gʋl pugẽ lalsa zutu n paas b neerem.

¹⁷Raoã tall-m lame n ta pipi simandã. Kug la b ra maneg n gãnege n me roto n gilgi: dot pis-tã.

¹⁸B ra gãnega kugã, n gilg sɩmanda zãnga. Kuga ra gãnegame n tekd kʋɩlensa noore.

¹⁹Raoã maga vɩʋʋg ning sẽn be yɩng noorã n ta pʋgẽ zaka lalgã. A paama kãntɩɩs koabga. A maga boto me yaanga la nug goabga.

²⁰Noor ning sẽn pakd nug goabg tɩ b tũud be n paamd pʋgẽ zakã, raoã maga yẽ me yalem la a woglem.

²¹Ro-bõones a yoobe n da tong be: a tãab kɩreng a ye, a tãab kɩreng a to, n paas zãongo la lalsa sẽn da me tagd-tagdã, la fãa maga wa sẽn da be pipi noorã: woglma yaa kãntɩɩs pis-nu, yalma yaa kãntɩɩs pisi la a nu.

²²Zãongã, peem-leesã, komsã sẽn da gʋlã, da wẽnda yaang noorẽ dẽnna. F rʋʋda teeds a yopoe n paam n kẽ zãongã, f taoore.

²³Noor n da be pipi zakã n tot ne nug goabg soabã tɩ b tõe n tũ be n kẽ pʋgẽ zakã; noor a to me n le be yaanga. Raoã maga vɩʋʋg ning sẽn be noor ne a to la a paama kãntɩɩs koabga.

²⁴Dẽ poore raoã tall-m lame n kẽ pʋgẽ zakã. D tũu rɩtg noorã. A maga lalsa sẽn me tagd-tagdã, a zãongã, b yalem wala b woglma ra yaa wala pipi noora rẽnna.

²⁵Noora ne a zãongã da tara peem-leese n gilgi. No-kãng me ra wẽnda a taaba: woglma yaa kãntɩɩs pis-nu, yalma kãntɩɩs pisi la a nu.

²⁶B teedsa yaa a yopoe tɩ b rʋʋd bãmba n paam n kẽed zãongã. Pʋgẽ lalsa sẽn me tagd-tagdã ra nagsa ne koms vãado, goabg la rɩtgo.

²⁷Pʋgẽ zaka ra tara noor sẽn tees nug rɩtgo. Raoã maga vɩʋʋg ning sẽn be noor ne a to la a paama kãntɩɩs koabga.

²⁸Raoã tall-m lame tɩ d tũ nug rɩtg noorã n kẽ pʋgẽ zakã. A maga noor kãnga, la fãa ra yaa a ye ne noy a taabã.

²⁹Ro-bõonesã, lalsa sẽn da welgd-b ne taabã, zãongã, fãa ra yaa a ye ne noya a taaba rẽnna. Noora ne zãongã ra ninga peem-leese sẽn ya yalemse n gilgi. Woglma yaa kãntɩɩs pis-nu, yalma yaa kãntɩɩs pisi la a nu.

³⁰Zãonga ra ka a ye ye, b ra yaa wʋsgo n gilgi: woglem, kãntɩɩs pisi la a nu, yalem, kãntɩɩs a nu.

³¹Zãonga ra tota ne yɩng zakã. A lalsa sẽn me tagd-tagdã ra gʋla komse la a ra tara teeds a nii.

³²Raoã tall-m lame tɩ m tũ yaang noorã n tɩ kẽ pʋgẽ zakã. A maga noorã la a yãeeme t'a yaa waa a taaba.

³³A ro-bõonesã, lalsa sẽn da me tagd-tagdã, a zãongã, fãa ra yaa a ye ne noy a taaba rẽnna. B ra ninga no-kãng ne a zãongã peem-lees bɛda n gilgi. Woglma maga kãntɩɩs pis-nu, yalma kãntɩɩs pisi la a nu.

³⁴A zãonga ra tota yɩng zakã. A lalsa sẽn da me tagd-tagdã ra gʋla komse poorẽ la taoore, la a teedsa yaa a nii.

³⁵Raoã tall-m lame m wa nug goabg noorã. A magame

³⁶la no-kãng me yaa wa a taaba. A wogma ra yaa kãntɩɩs pis-nu t'a yalma ya kãntɩɩs pisi la a nu la yẽ me ra tara ro-bõonese, lals sẽn me tagd-tagdo, zãongo la peem-lees n gilgi.

³⁷Rooga ra tota yɩng zakã. Goabg la rɩtgo, b ninga koms vãad lalsa sẽn me tagd- tagda zugu. Teedsa yaa bãmb b nii.

³⁸Roog a ye noor n da pakd goabg noorẽ zãongã pʋga. Yaa ro-kãng pʋga la b ra pekd yũ-noog maoonga rũmsi.

³⁹Noor kãngẽ zãongã, te-roagens a yiibu n da be kɩreng a ye t'a yiib me be kɩreng a to. Yaa bãmb zutu la b ra koot maanda rũmsi: yũ-nood maand bɩ sugr kosgo, bɩ yel-wẽnd dolb maando.

⁴⁰F sã n da tees nug goabg noorã f ra tõe n yãenda kɩreng fãa, te-roagens a yiibu.

⁴¹Te-roagensa zãng yaa bãmb b nii, bãmb zut la b ra koot rũmsã.

⁴²Te-roagens a naasa sẽn ya yũ-noog maanda kʋʋb yĩnga ra mee ne kug sẽn peese. B voglma ya kãntɩɩg la pʋɩ-sʋka, b yalma: kãntɩɩg la pʋɩ-sʋka, b zãndlema: kãntɩɩga, la yaa bãmb zug la b da rɩgend sʋʋsa sẽn tar n koot maanda rũmsi, yũ-noog maando la maand a taaba.

⁴³Bũmb yalem sẽn ta nug-pʋga la b ra ning n gilg te-roagensã. Te-roagensa zutu la b da rogeng maanda nemdo.

⁴⁴Raoã tall-m lame n kẽes pʋgẽ zaka. Rot a yiib n da be be, a ye nug goabg noorã t'a meng neng teesd rɩtgo. A to wã ritg noorã t'a neng teesd nug goabga.

⁴⁵A yeela maam tɩ roog ning sẽn get-a goabga ra yaa maan-kʋʋdba sẽn tʋmd-b wẽnd dooga tʋʋma rẽnna.

⁴⁶Roog ning neng sẽn tees nug goabga yaa sẽn tʋmd-b maan-kugra rẽnna. A tol n paasame t'a Levi kamba sẽn yaa a Sadok yagens bala n da tõe n kẽ ro-sõnga pʋg n tʋm maan-kʋʋra tʋʋma.

⁴⁷Raoã maga wẽnd dooga zaka; a woglem: kãntɩɩs koabga; a yalem: kãntɩɩs koabga. Kɩrẽng pa yɩɩd a to ye. Maan-kugr n da rɩg wẽnd dooga taoore.

⁴⁸A tall-m lame n kẽes wẽnd dooga zãongẽ. A maga zãonga lals niyns sẽn me tagd-tagdã: kãntɩɩs a nu kɩreng a ye, kɩreng a to wã kãntɩɩs a nu. Kʋɩlenga yalem: kãntɩɩs a yoobe, a tãab kɩreng a ye, a tãab kɩreng a to.

⁴⁹Zãong ning sẽn tũud n paam wẽnd dooga noorã woglem yaa kãntɩɩs pisi t'a yalem ya kãntɩɩs piig la a yiibu. Rʋʋda teeds piiga n yaool n kẽ. Lal-gils bɛd a yiibu n da be noorẽ, a ye goabga, a ye rɩtgo.