Read SEBR SÕNGO, 1998 Ezekiyɛl 42 Bible Online

Ezekiyɛl 42 - SEBR SÕNGO, 1998 bible

Ezekiyɛl 42

¹Dẽ poore raoã tall-m lame n ta sɩmandẽ wã, n le wa tall-m n tees rot niyns sẽn be nug goabgã n tot ne zĩ-vɩʋʋgã la roog ning sẽn be-a wẽnd dooga poorã.

²Ro-kãng woglma rɩkda wẽnd doog rẽnna n tar kãntɩɩs koabga. A yalem yaa kãntɩɩs pis-nu.

³A kɩreng a ye a ra yegda vɩʋʋga sẽn gũbg wẽnd doogã t'a yalma ta kãntɩɩs pisi wã. A kɩreng a to wã, a ra tata kuga sẽn maneg n gãneg sɩmandẽ wã la be la rota sɩng n dogend taab a tãab-tãabã.

⁴Do-bãmb taoore, pʋgẽ zakẽ wã, sor me la b ra bas yã. A yalem taa kãntɩɩs piiga t'a woglem ya kãntɩɩs koabga. Yaa nug goabg noora sore.

⁵Yĩngr dota yalem da paoodame. Yaa sẽn na yɩlẽ n paam vɩʋʋg n loogdẽ la b ra booga b yalem. La sora sẽn bas yĩngrã, sẽn bas tẽnsʋkã la sẽn bas tẽn-nabrã ka a ye ye.

⁶Bãng-y tɩ rota ra roglma taaba rũns a tãabo la ka lal bedre wa zãongẽ dẽnna n da zɩt b ye. Yĩngr dota yalem pa ta tẽnsʋka la tẽngr dãmba rẽnn ye.

⁷Lalg la b ra me rota poore t'a woglem yaa kãntɩɩs pis-nu.

⁸Sɩmandẽ dota woglem yaa kãntɩɩs pis-nu tɩ wẽnd dooga zak tar kãntɩɩs koabga.

⁹Tẽngr dota ra tara noore la yaa no-kãng la f ra tũud n paam n yi yɩnga, yaang sẽnẽ.

¹⁰No-kãng ra bee zaka lalg sɩngrẽ. Nug goabga, zaka lalg woglemẽ, wẽnd dooga taoore, b le mee rot a taaba. Bãmb da tota ne vɩʋʋga sẽn da basã la b tot roog ning sẽn be wẽnd dooga poorã.

¹¹B le basa sor bãmb taoore. Do bãmb da wẽnda wa nug goabg rotã. B bedrema, b yasrã, b noya, b kõom la b yiib noya, fãa ra wẽnda taaba.

¹²Dota sẽn me nug rɩtga kʋɩlensa fãa ra wẽnda nug goabg rẽnna. Sora sɩngrẽ, noor n da base n tees lalga sẽn da lill wẽnd doogã. Tũuda yaang n paam n ta be.

¹³Raoã yeel-m lame: «Rota sẽn be goabg la rɩtgo, n be zaka pʋga yaa ro-sõma. Yaa be la maan-kʋʋdb niyns sẽn tõe n kẽ Soaala ro-sõnga pʋga kẽed n dɩt kũuna sẽn ya sõma n yɩɩd b taabã. Ro-bãmb welga toor Wẽnd yĩnga, tɩ b tar kũun sõma wã n wat be. Be la b wat ne kũuna, ne maand toor-toora rũmsi sẽn kʋʋd sugr kosg yĩngã.

¹⁴N paas me, maan-kʋʋdba sẽn kẽed be ne fut niynsã, b pa tõe n le yi yɩng ne fu kãens ye. B yeesd-b lame n bas be tɩ b lebga fu-sõma la fut a taab la b yeelgda n leb b saam-biisa sʋka.»

¹⁵Raoã sẽn mag wẽnd dooga pʋg n sɛ a yiis-m-la yɩnga. D tũu yaang sorã n yi n sɩng rigenpoora magbo.

¹⁶Magba maga ne dasaarã kãntɩɩs kobs-nu yaanga.

¹⁷A maga goabga me kãntɩɩs kobs-nu,

¹⁸n mag rɩtg kobs-nu,

¹⁹n mag nin-taoor kãntɩɩs kobs-nu.

²⁰Yaa woto la a mag lal-gũbrã, a kɩrems a naasã. Woglem la yalem zema taaba: kãntɩɩs kobs-nu. Lalg n da welg vɩʋʋg ning sẽn ya Soaala rẽnna ne a taaba.