Read SEBR SÕNGO, 1998 Ezekiyɛl 48 Bible Online

Ezekiyɛl 48 - SEBR SÕNGO, 1998 bible

Ezekiyɛl 48

¹Ad buuda sagsa ne b pʋɩɩre: «A Dã paama a pʋɩɩre. A toaaga sɩngda Nug goabg, yɩɩg-yɩɩga, al Etlõ n digd Lebo-Amat, Asar-Ena, n pẽneg Amat la Damas rĩungu; a na n tonga a toaag yaanga n ta Tẽnsʋk Mogra, nin-taoore.

²A Asɛr paama a pʋɩɩre. A yegda a Dã rẽnna yaang n tat nin-taoore.

³A Neftali paama a pʋɩɩre. A yegda a Asɛr rẽnna.

⁴A Manase paama a pʋɩɩre. A yegda a Neftali rẽnna.

⁵A Efrayim paama a pʋɩɩre. A yegda a Manase rẽnna.

⁶A Rubẽ paama a pʋɩɩre. A yegda a Efrayim rẽnna.

⁷A Zɩɩda paama a pʋɩɩre. A yegda a Rubẽ rẽnna.

⁸A Zɩɩda yegende, yaang toaagã n ta Tẽnsʋk Mogra, nin-taoore y na n basa vẽenem, yẽ ne sak ninga sẽn pʋgda sʋka, wẽnd dooga yĩnga. A yalem yaa kãntɩɩs tus pisi la a nu. Woglma yaa sags a taaba fãa rẽnna, yaanga n ta nin-taoore.

⁹Y sẽn na n toog vẽenem ning Soaala yĩnga woglem na n yɩɩ kãntɩɩs tus pisi la a nu la yalem na n yɩɩ kãntɩɩs tus pisi.

¹⁰Maan-kʋʋdbã n na n ti vẽenem kãng pʋgẽ. Yaang n ta nin-taoore yaa kãntɩɩs tus pisi la a nu; nug goabg n ta rɩtgo kãntɩɩs tus piiga, tɩ wẽnd dooga be tẽnsʋka.

¹¹Sẽn na n soog-b zĩ-kãng yaa a Sadok kamb nins sẽn kell-bã n tʋmd Wẽnd tʋʋmda ne pʋ-peelem, sẽn ka naag-b Israyɛl kamba n wɩɩb b wɩɩbdã wala Levitsã.

¹²B vẽenema yãka Wẽnd pʋɩɩrẽ, Levitsa rẽnd yegende.

¹³Wala maan-kʋʋdba rẽnna, Levitsa pʋɩɩr woglem yaa kãntɩɩs tus pisi la a nu la yalem yaa kãntɩɩs tus piiga.

¹⁴Vẽenem kãng pʋgẽ bũmb ka be sẽn tõe n kẽes raag bɩ sẽn tõe n tek ye. Bũmb ka be sẽn tõe n lebg ned a to soolem ye, tɩ yaa Soaala pʋɩɩre.

¹⁵Vẽenem n na n kelle t'a yalem zems kãntɩɩs tus a nu, t'a woglem ya kãntɩɩs tus pisi la a nu. Yaa vẽenem kãng pʋga la neb a taaba na n ti b roto tɩ rũmsa me paam b wãbneg zĩiga. Tẽnga meta sʋka.

¹⁶Tẽnga me magb la woto: a woglem la a yalem yaa magb a ye: kãntɩɩs tus a naase la kobs-nu.

¹⁷Tẽnga kɩrems a naasã n gilgi, vɩʋʋg la b na n bok n base. A yalma yaa kãntɩɩs kobs-yi la pis-nu.

¹⁸Vẽenem a yi la b na n bas Wẽnd pʋɩɩra yegende, tẽnga yaanga la tẽnga nin-taoore. B woglem na n taa kãntɩɩs tus piiga. Vẽenem kãng la tẽnga rãmb pʋto.

¹⁹Neb niyns fãa sẽn tʋmd-b tẽnga pʋgẽ na n tõog n ko zĩ-kãnga, b sẽn ya sak ning fãa neba.

²⁰Wa sẽn togsã, vɩʋʋga fãa sẽn bas Wẽnd yĩnga la tẽnga rãmb pʋta yĩnga, b woglem la b yalem ka yɩɩd to ye, yaa kãntɩɩs tus pisi la a nu.

²¹Rĩm-biiga me na n paama a pʋɩɩre. Na n yɩɩ sʋka. Wẽnd vẽenema ne tẽnga vẽenema sʋka; vẽenem kãng woglem la a yalem yaa kãntɩɩs tus pisi la a nu. Yaanga a toaag yaa tẽns niyns sẽn yãk toaag ne Zʋrdẽ kʋɩlgã, nin-taoore yaa tẽns niyns sẽn yãk toaag ne Tẽnsʋk Mogrã. Wẽnd pʋɩɩra la wẽnd dooga na n zĩnda tẽnga tẽnsʋk sẽn welg Wẽnd yĩngã.

²²Levitsa vẽenem la rota sẽn tɩ zĩig ningã basda rĩma pʋɩɩr sʋka. Rĩm-biiga pʋɩɩr sẽn le be vẽenem ning sʋk yɛsa, yaa a Zɩɩda la a Bẽnzame tẽn-peelem. A Zɩɩda rẽnd bee nug goabga, t'a Bẽnzame rẽnd be nug rɩtgo.

²³Ad buud niyns sẽn kell-bã ne b pʋɩɩre: a Bẽnzame paama a pʋɩɩre, a tẽeg n taa yaanga rãmba toaag n wat Tẽnsʋk Mogra, nin-taoore.

²⁴A Simeõ paama a pʋɩɩre, a yegda a Bẽnzame rẽnna, a yaanga n ta a nin-taoore.

²⁵A Isakar paama a pʋɩɩre. A yegda a Simeõ rẽnna.

²⁶A Zabulõ paama a pʋɩɩre. A yegda a Gad rẽnna.

²⁷A Gad paama a pʋɩɩre. A yegda a Zabulõ rẽnna.

²⁸Nug rɩtgo a Gad toaaga tata Tamar, yaanga, n tat Meriba-Kades, n yegd Ezipt kʋɩl-bɛɛga, n tat Tẽnsʋk Mogrã.

²⁹Yaa woto la y na n pʋɩ tẽngã n kõ sak fãa a rẽnna. Yaa maam a Naaba-Wẽnd n kõt-y noor kãnga.

³⁰Ad Zerizalɛɛm tẽnga noya piig la a yiibã. Nug goabg lal-gũbra woglem taa kãntɩɩs tus a naas la kobs-nu n tar noya a tãabo.

³¹Noor fãa reegda a Israyɛl sak a ye yʋʋre: a Rubẽ, a Zɩɩda la a Levi noya.

³²Yaanga, lal-gũbra yaa kãntɩɩs tus a naas la kobs-nu, n tar noya a tãabo: a Zozɛf, a Bẽnzame, a Dã noya.

³³Nug rɩtgo, lal-gũbra yaa kãntɩɩs tus a naas la kobs-nu n tar noya a tãabo: a Simeõ, a Isakar, a Zabulõ noya.

³⁴[97†] Nin-taoore, lal-gũbra yaa kãntɩɩs tus a naase la kobs-nu n tar noya a tãabo: a Gad, a Asɛr, a Neftali noya.

³⁵Tẽnga sẽn mag n gilgã: kãntɩɩs tus piig la a nii. Rũnda tɛka ad tẽnga yʋʋr sẽn na n yɩ a soaba: ‹Soaala-Wẽnd zĩig la ka.› »