Read SEBR SÕNGO, 1998 Ezekiyɛl 5 Bible Online

Ezekiyɛl 5 - SEBR SÕNGO, 1998 bible

Ezekiyɛl 5

¹Ninsaal biiga, rɩk sʋʋg sẽn dɩte, n tall-a wa barga n põng f zugu la f kõog f toɛɛnga. Mag f zoobda zɩslem la pʋɩ-b dʋr a tã.

²Rɩk rʋr a ye n yõog bugum tẽnga sʋka, b sã n wa wãa-a n sɛ. Rɩk rʋr a to wã n kʋʋs ne sʋʋgã n dʋʋg-ba n gilg tẽngã. Yãk rʋr a tãab soaba pʋgẽ n lob sobgo tɩ mam na pʋg-b ne m meng sʋʋga.

³La f na n yãka kõbdã sẽn kees bilfã n ning f fuuga loaabẽ.

⁴Bãmb la f na n yãkd n lobd bugmẽ. Bãmb n na n yãngd bugum ninga sẽn na n dɩ Israyɛl buuda gilli.

⁵Ad-m sẽn yete, maam y Soaala, yaa woto la m na n maan ne Zerizalɛɛm, tẽng ning m sẽn yals bu-zẽmba tẽnsa sʋkã.

⁶Zerizalɛɛm kẽedba tõdgame n ka reeg m sẽn kõ-b noy niynsã, n pʋg mam sẽn da gɩdg bũmb ningã. B pʋga wẽnga ne b sũuri n yɩɩg b yagsã, b wẽnema looga buud a taaba rẽnna. B ka reeg m noya, b tõdgame tɩ b kõn vɩɩnd wa m sẽn data ye.

⁷Rẽ n so tɩ maam, Naaba-Wẽnd gomd ne y woto: Yãmb n yɩ tõatba n yɩɩd tẽns niyns sẽn gũbg-b yãmba. Yãmb pa reeg m noya la y pa tũu m rog-n-mikã, n yaool n tũud tẽns a taabã sẽn gũbg yãmba rog-n-miki.

⁸Be neere! Soaala-Wẽnd n gomde, mam me zabda ne foom, Zerizalɛɛm, m na wɩnga ne f sɩbgre ninsaalba nifẽ.

⁹La m na n yika ne f kamba wala m sẽn zɩɩ n make, la m kõn le mak menga, tɩ y sɩd tʋmame tɩ nare.

¹⁰[14†] Yaa rẽ yĩnga la ba rãmba na n dɩ b kamba, tɩ kamb na dɩ b ba rãmba, tẽnga pʋga. M na n pidsa m sẽn kãabe, m na menes sẽn na n kell-bã, ween-vɩɩs a naasã.

¹¹Dɩlla, maam, Naaba-Wẽnd, n yet yãmba tɩ y sɩd dẽgma m sõmblem zĩigã ne y manes yoodã, ne y wẽn-naands yoodã. Ad-y m na n menes-y lame tɩ sugr kaẽ ye. M ka na n bas-y ye.

¹²Bã-longdem bɩ kom n na n kʋ fo neba kẽere, tẽnga pʋga, tɩ sʋʋg kʋ kẽer lal-gũbra poore. M na sẽega ween-vɩɩs a naasã sẽn na n kell-bã la m na n pʋg-b-la ne m sʋʋga.

¹³M na n basa m sũura t'a fudgi n tʋm beed ne beedo. Woto m na rok m sũura ne-yã, la y na bãng tɩ maam, Naaba-Wẽnde, m gom ne-yã, m sẽn pa sak zãmb a woto buuda yĩnga.

¹⁴Tẽns niyns sẽn gũbg fooma la neb niyns fãa sẽn na n wa f tẽngẽ na yãend m sẽn kɩt t'a lebg bũmb ninga: raboog sẽn ka nenga.

¹⁵M na n pidsa m sẽn yalsã, m na n yika ne Zerizalɛɛm, n yik ne-a ne sũ-puur la zaba. A na n lebga a yagsa lado, a yagsa na n tʋʋs-a lame, tẽnga sãoong na n yɛɛs-b lame la bãmb me na tũ rẽ n maan gũusgu. Yaa Soaala-Wẽnd n gomde.

¹⁶M na n nams-y lame la m na n menes-y-la ne kom. Koma na n zab-y lame wala pɛɛm sẽn zẽne. M na n sãama y sẽn tigs n bĩngã tɩ y ki kom.

¹⁷[15†] M sẽn na n tool-y kom ninga la we-rũms niynsã na n kʋ-la y kamba. Bã-longdem, pãn-tõogo la zabr sʋʋga na n looga ne-yã. Yaa maam, Naaba-Wẽnde, n togs woto!