Read SEBR SÕNGO, 1998 Ezekiyɛl 7 Bible Online

Ezekiyɛl 7 - SEBR SÕNGO, 1998 bible

Ezekiyɛl 7

¹Wẽnd taasa maam koe-kãnga:

²«Ninsaal biiga, kelg maam, Naaba-Wẽnd, sẽn togsd Israyɛl buudu, Ad-f wãaba segl n sɛɛme, la tẽnga kɩreng ba a ye ka na n põs ye.

³Marsã y yell sɛɛme; m na n basa m sũura t'a fudgi n waag yã, m na n bʋ y bʋʋdo n sɩbg y tʋʋm yoodã.

⁴M pa na n ges a Israyɛl ne zoe-nif ye, m ka na n bas-a saal ye. M na n kɩtame t'a yao a tʋʋm dẽgdã a sẽn ket n maande. Woto la m na n kɩt tɩ y bãng tɩ maam la Soaala-Wẽnde.

⁵Ad-m sẽn le yete, maam, Naaba-Wẽnde: Yel-beed sẽn ka taare, n wate.

⁶Ad-y wakata taame, wakata taa n sɛɛme; m ne-a lame!

⁷Tẽnga rãmba, ya y wãaba yell la m gomda. Y sẽegra raar la m gomda. Bʋʋda raar kolgame. Sũ-nooga kaasg sẽn da kaasd tãmsa zutã, rabeem kaasgo n ledg a zĩiga.

⁸La marsã, kõn le kaoos tɩ m sũ-puura waag-y ye. M na n basame tɩ m sũura fudg n ta a tɛka. M na n kao-la y bʋʋdo n kɩt tɩ y yao n dol y tʋʋm yoodã.

⁹Mam nimbãan-zoeere kõn lʋɩ y zug ye, kõn paoog y ye. Y na n yao y tʋʋm yooda la y tʋʋm kɛga y sẽn ket n maandã. Woto y na bãng tɩ yaa maam, Naaba-Wẽnd, n sɩbgd-y.

¹⁰Ad daarã, ad-a sẽn wate: yãmb me la wã, yel-beeda me la wã. Pãn-tõog paasdame, wilg-m-menga paama pãnga.

¹¹Pãn-tõog paama zĩiga, a rasaara zẽkame n tar pãbre. Bũmb ka na n kees ye. Y sõor na n boogame, y yẽesma na n loogame, y ziira na n sɛɛme.

¹²Wakata yẽrgame, daara kolgame; bɩ sẽn daada bũmb ra nams n kɩdem ye, la sẽn koosda me ra zoe bõn ye, tɩ bala m sũ-puura na n dɩɩ neba fãa gilli.

¹³Sẽn koos-a wã ka tõe n le reeg a sẽn koos ye, ba a sã n põse. Sẽn yet tɩ tẽnga gill na n wãame wã, na n sɩd yɩɩ boto. Nin-tɩrg sẽn ka le be sʋkã, sẽn na n põs-a me ka ye.

¹⁴Ba tõntõog peeb-ya, tɩ fãa gill segle n sɛ, ned ba a ye ka na n bob zabr ye, tɩ yaa ne buuda zãng la m sũura puug yã.

¹⁵Soya zutu, zabr sʋʋga; rota pʋsẽ, bã-longdem la kom. We-kɛɛnga yaa zabrẽ la b na n pa, tẽnga pʋga yaa kom la bãaga.

¹⁶Sẽn põs-ba na n zoe n dʋʋ tãmse wala watr-gũusdu, tɩ ned kam fãa tar waasgo, a beegr yĩnga.

¹⁷Nusa fãa na n lʋɩɩ vãbnega, tɩ rũma koosd taaba,

¹⁸B na yeelga sũ-pa-noang futu, ned kam fãa zĩ n yɩɩdame, yãnd sulga ned kam fãa neng tẽnga, ned kam fãa zug põngame.

¹⁹B na n loba b wanzurf sor zugu, la b sãnema na n lebga rẽgdo b yĩnga. Wanzurf bɩ sãnem kõn tõog n le fãag-ba, Soaala sũura sẽn na n puug raare. B ka na le paam n kõ noor ye, b ka na n le paam n da b sẽn dat ye, tɩ yaa wanzurfa la sãnema n wa ne b tudgri.

²⁰B maana wilg-m-menga tɩ b ra tara laogo, wʋsg-wʋsgo. Be la b yãk n dõog wẽn-naandse, bõn-yaals sẽn ka sakd gesgo. Yaa rẽ yĩnga la Soaala yeel yã: m na n kɩt tɩ rẽ fãa yaal b sũuri.

²¹M na base tɩ sãamba wa fã b laogã, n bas tɩ nin-yaals sẽn ka mi bũmb waoogra tall fãa n loog wa b pʋɩɩre.

²²M ka na n leok-b tɩ bũmbu b sã wa wɩɩbe n loog ne ro-sõnga sãnem ye. Tɩ sɩda nin-kʋʋdba n na n kẽ ro-sõnga pʋga n dẽgem-a.

²³Maneg n kud bãeense, bi-beesa yĩnga, tɩ bala tẽngã pidame, a pida ne nin-kʋʋre a pida ne pãn-tõogo.

²⁴M na kɩt tɩ bu-zẽmb sẽn yɩɩd b taab ne toolem wa reeg b zagsã. M na n sɛɛsa pãn-dãmbã wilg-m-meng la b tɩtaama, m na dẽgma b wẽn-naandsa waoogr zĩisi.

²⁵Yɩɩr n wate, b na bao laafi la b kõn paam-a ye.

²⁶Yel-beed ne yel-beedo n wate, kibar sẽn ka sakd kelgre n pʋgd a to. Yaa zaalem la b kot bãngda sẽn na n wa ne Wẽnd koɛɛga; maan-kʋʋd ka le tar zãmsgo n na n zãms ye, nin-kẽems ka le sagend ye.

²⁷Kũum na n lʋɩɩ na-yiri, sũ-sãang na n dɩɩ rĩm-biiga, talsa zĩi ne rigbu. M na n sɩbga wala sẽn segde; bʋʋda me na n bʋʋ ne zemsgo. Woto b na bãng tɩ maam la Soaala-Wẽnde.»