Read SEBR SÕNGO, 1998 Ezekiyɛl 8 Bible Online

Ezekiyɛl 8 - SEBR SÕNGO, 1998 bible

Ezekiyɛl 8

¹Pa-weera loogr yʋʋmd a yoob soaba, a kiuug a yoob soaba, kiuuga daar a nu soaba, maam da zĩ m yiri t'a Zɩɩda nin-kẽembã ra zĩ m taoore. Beelẽ, Soaala-Wẽnd nuga waa vugr bala n tik maam.

²[16†] M da getame la ade: bõn-vɩɩla sẽn wẽnd ninsaala, n lik-m. Sɛɛga tɛka n dabd tẽngrã ra yaa bugum; sɛɛga tɛka n dadb zugã ra yãnga ne vẽenem sẽn ya moomd yʋs.

³Bũmb n tẽeg wa nugu n kolemd mam zoobdã. Wẽnd pãnga zẽk-m-la yĩngri la m yãeeme tɩ b tall-m lame n taas Zerizalɛɛm. B taas-m-la tẽnga pʋgẽ, nug goabg noora sẽnẽ. Zĩ-kãng la b ra yals wẽn-naand a ye togsende. Bõn-kãng yãeeb ra yĩida Naaba-Wẽnd sũuri.

⁴[17†] A Israyɛl Wẽnnaama lik-m-la ne b ziiri wala b sẽn da maan bãoogẽ wã.

⁵B yeela maam: «Ezekiyɛl, zẽk f nini n ges nug goabga.» Tɩ mam zẽk m nin n ges nug goabga. Maan-kugr n da be nug goabga. Maan-kugra sẽn da be roog ninga noorẽ, b ra zaoolga Naaba-Wẽnd nif sẽn ka rat yãend a soabã.

⁶Dẽ la b yeel maam: «Ninsaal biiga, f ne b sẽn maan la? A Israyɛl rooga maanda wɩɩbdo sẽn na yɩlẽ tɩ m zãag ne m ro-sõngã. Ad-f na le yãee wɩɩbd a taaba sẽn zem woto.»

⁷B talla maam n dig yɩng sɩmannã. M mikame tɩ lalga pooga võore tɩ zãonga pʋg tonnẽ.

⁸Tɩ b yeel-ma: «Ninsaal biiga, yalg lalga võorã.» Tɩ mam yalg-a tɩ lebg noore.

⁹Tɩ b yeel maam: «Kẽ n ges wɩɩbd niyns bãmba sẽn maand ka!»

¹⁰Mam kẽe n gesame; da yaa gʋlb la b kar yã, n makd wiis buud fãa la rũms yoodo, n paas a Israyɛl sẽn waoogd wẽn-naands niynsa, bãmb n pid lalsã n karg n sege.

¹¹La neb pisopoe, Israyɛl roogã nin-kẽemse, n da yɛs wẽn-naandsa taoore. A Safã biiga a Yazaniya da yɛsa bãmb sʋka. Ned kam fãa ra zãada wisdu laag a nugẽ. Wisda yũuga ra zẽkdame.

¹²M wʋma koe-kãnga: «Ninsaal biiga, fo nee Israyɛl rooga nin-kẽemb sẽn maand bũmb ning, likẽ wã, ned kam fãa a wẽn-naanda sẽn zaolgẽ la. Bãng tɩ yaa woto la b ra gomd ne taaba: ‹Soaala ka le rat n yãend-d ye, Soaala loog n basa d tẽngã.› »

¹³Koɛɛga le paasa woto: «F na yãend wɩɩbd a taab wʋsgo sẽn zem woto b sẽn le maande.»

¹⁴B talla maam n tees wẽnd dooga nug goabg noorã. Pagb n da zĩ be n yãbd a Tamuz.

¹⁵Tɩ b sok maam: «F neeme-la, ninsaal biiga? F na le yãend wɩɩbd a taab wẽnem sẽn yɩɩd wã n paase.»

¹⁶La b talla maam n kẽ pʋgẽ sɩmannã. Mik ro-sõnga noorẽ, zãonga la maan-kugra sʋka, neb sẽn ta pisi la a nu n da be be; b zãnkudgã ra teesa ro-sõngã tɩ b nenga tees yaanga. B ra wõgemdame n waoogd wĩntoogã.

¹⁷Tɩ Naaba-Wẽnd yeel maam: «F yãeeme-la, ninsaal biiga? Bãng tɩ wɩɩbda sẽn maand ka wã ka sek Zɩɩda tẽnga rãmb ye tɩ b na n pids-a ne pãn-tõogo n le sɩng m beegre la m sũur yikri.

¹⁸Taa maam marsã tɩ m me na n yik m sũuri. M kõn ges-b ne nimbãan-zoeer ye. B nong bɩ b kaas n kos m sõngre, m kõn kelg-b ye.»