Read SEBR SÕNGO, 1998 Oze 12 Bible Online

Oze 12 - SEBR SÕNGO, 1998 bible

Oze 12

¹A Efrayim karga zirẽ-beed bal n gũbg maam. A Israyɛl karga belgre bala n gũbg maam. La a Zɩɩda yẽ ket n bee ne a Soaala, a ket n pʋgda Sõmblem Naaba-Wẽnde.

²A Efrayim leebda kaam ne Ezipt rãmba; a yõgda zood ne neb sẽn wẽnd sobgo. Yaa sobg sẽn tʋʋla n gãoogd yĩnga, yaa sobg a woto buud la a pʋgd beoog sẽn vẽege, n yõgd zood ne Asiri rãmba. A tara zirẽ yagbo la pãn-tõogo.

³Soaala tara bʋʋd ne a Zɩɩda. B na n yika zabre ne a Zakoob, a vɩɩma sẽn ka sõng yĩnga. B na n sɩbga a Zakoob wala sẽn segd ne a tʋʋma.

⁴[15†] A sẽn waa n nan ka rog menga a ra zoe n zãmbda a saam-biiga. A sẽn waa n yet t'a lebga rao n pid raoa, a zẽka a meng ne Soaala.

⁵[16†] A Zakoob maoo ne malɛk n tõog-a, malɛkã n kong n bõs-a t'a bas tɩ moora sɛ. Soaala seg-a-la Betɛl la be la Soaala gom ne-do.

⁶N yẽe! Naaba-Wẽnde, dũni fãa Soaalã,

⁷yeela a Zakoob: ‹Fo tog n lɛɛg n wa kẽe maam tɩ maam la f Wẽnde. Le yɩ ned sẽn nong a taaba, n nong zemsgo. Yaa maam la f tog n teeg, tɩ maam la f Wẽnde.›

⁸Gese, Efrayim, fo maanda wa Kanaã rãmba n zãad f nugẽ, bõn-magdi sẽn tudgd raadba, f nonga wagdem la zãmbo.

⁹Fo yetame: N-yẽe! M lebga arzɛk soaba. M nug zãadame. La bao n paas ka wẽng ye!

¹⁰[17†] La ade, maam, Naaba-Wẽnde, sẽn ya fo Wẽndã, al f sẽn waa n be Ezipt tẽnga, ade m na le kɩtame tɩ f vɩɩnd zãnd tẽngre, wala tõnd segba daare.

¹¹Wakat kãnga m da gomda ne bãngdbã, b ra paamda likr buud toor-toore. Pʋs n yaa ne bãngdba la m ket n wilgd dũnna m sẽn na n tʋm bũmb ninga.

¹²Galaad rãmba yɩɩ bi-bees menga. Bũmb me ka kell b nengẽ ye. Gilgal do-sõngẽ wã yaa lols ka tɛk maand la b ra kʋʋda. Ne rẽ fãa ad b maan-kugã sẽn lebg kug saong rũnna, b pʋtẽ.

¹³[18†] A Zakoob ra zoe n diga Aram pʋ-weesẽ; pag yĩnga, a Israyɛl kẽesa a meng tʋʋmd toogo, pag yĩnga a gũu rũmsi.

¹⁴[19†] Tũu ne bãngda tɩ Soaala wa yiis a Israyɛl Ezipt tẽnga. Yaa bãngda la b yãk yã t'a na n yɩ b buuda gũuda.

¹⁵A Efrayim maana sõm-zɩtem ne Soaala, dẽ me la b na n tʋk b zugu b zẽk-m-menga taale.