Read SEBR SÕNGO, 1998 Oze 14 Bible Online

Oze 14 - SEBR SÕNGO, 1998 bible

Oze 14

¹Samari rãmb zẽka b zugu ne b Wẽnde, woto wã b tog n deega b beegra sɩbgre. B na n paa zabrẽ, b na n kʋ-la b kamba, b na n dadga pag fãa sẽn tʋte.»

²Lebg n wa, Israyɛl, lebg n wa f Soaala-Wẽnnaam nengẽ, tɩ f sã n lʋɩ, yaa fo yelle.

³Lebg-y n wa-y Israyɛl kamba, y Soaala nengẽ la yeel-y-b woto: «Yãmb bal n mi sugr kũuni. Reeg-y neere d sẽn pẽgd-y ne pẽgr ningã.

⁴A Asʋr ka tõe n fãag tõnd ye; d pa na n le zomb wiid n kẽng zabr ye. D wẽn-naandsa yaa d nug tʋʋmde la d pa na n le bool tɩ tõnd Wẽnnaam ye. Yãmb bala n mi kɩɩb kollgo.»

⁵Soaala gomda woto: «M na n sãooga a Israyɛl t'a ra le zãmb-m ye, m na n nong-a lame tɩ ka tũ ne toog ye. M zabr sɛɛme.

⁶M na yɩɩ wala meenem sẽn maagd yĩnga la Israyɛl na n ninga puudu wala lɩɩnga, a na n suda a yẽgna wa Libã tɩɩse.

⁷A na n bɩɩ ne keelem, n ya neer wala oliviye n yelgd a yũugu wa Libã googo.

⁸M neba na n lebg n wa zĩnda m maasmẽ. B na n ko-la b alkam. B bugsuntund na n woma biisi, b rãama noog na n zenga Libã rẽnna.

⁹Bõe n le be a Efrayim ne wẽn-naandsa sʋka? Mam deegda a kosgo la m geta a yelle. Mam yaa tɩɩg ninga sẽn sob n yɛs wakat fãa wã. Maam n kɩt tɩ f kooda womd biisi.»

¹⁰Ned sã n tar yam, a na wʋm a Oze goama. Ned sã n tar yam zulunga, a na wʋm b võore. Soaala-Wẽnd soya yaa tɩrse. Nin-tɩrsa tũud-b lame, nin-wẽnsa bal n kẽnd n lagsd n lʋɩtẽ.