Read SEBR SÕNGO, 1998 Oze 5 Bible Online

Oze 5 - SEBR SÕNGO, 1998 bible

Oze 5

¹Maan-kʋʋdba, kelg-y yã, Israyɛl taoor dãmba, na-yir dãmba, maan-y gũusgu. Mispa tẽnga yãmb yɩɩ wa bẽdgo m buuda yĩnga, n yɩ wa zulung sẽn tẽeg Tabor tãnga zugu.

²Y yɩɩ loang sẽn zulum Kitim. La maam, Naaba-Wẽnde, m na sagl-y sagl-sõngo.

³Mam mi m sẽn na n maan bũmb ning ne a Efrayim, m sẽn na n maan bũmb ning ne a Israyɛl. Sɩda y tusa a Efrayim n tees yoobo, la yaa Israyɛl tõre la y rẽgem yã.

⁴A Israyɛl kamba sẽn maana kɩtame tɩ b ka tõe n lɛɛg n wa kẽ Naaba-Wẽnd ye. Yooba liba b yam tɩ b ka le mi Naaba-Wẽnd ye.

⁵Israyɛl zẽk-m-menga n sãamd-a. A Efrayim ne a Israyɛl yel-wẽna n kɩt tɩ b kẽnd n lagsd n lʋɩtẽ la yaa b yel-wẽnda n kand-ba n lubdẽ. A Zɩɩda meng naagame n lagsdẽ.

⁶B wat n baooda Soaala leokre ne b piisi la b niis maando, la b ka paamd leokr ye, tɩ Soaala zãaga ne bãmba.

⁷B zãmba Wẽnde, b roga tãmpĩ-bi; rẽ yĩnga, ka ne kiuugu, b tẽnga na n lebga raboogo.

⁸Peeb-y baorg Gibea tẽnga, peeb-y tõntõog Rama tẽnga. Wẽ-y no-bɩnga Bɛt-Avɛn tẽngẽ; la a Bẽnzame maan gũusg a poorẽ.

⁹Sɩbgre daare Efrayim na n lebga raboogo la m sẽn gomd woto a Israyɛl buuda sags poorẽ yaa sɩd menga.

¹⁰Zɩɩda nanamse yaa wa neb sẽn teemd b pʋt toaag kuga, la m sũura na fudg n waag-ba.

¹¹Efrayim tara toogo, b maan-a-la pãnga, la yaa yẽ meng n bas sɩda n pʋg kuroto.

¹²A Efrayim yĩnga mam na n yɩɩ rasempʋɩɩga la m na n feo-la a Zɩɩda yẽna n bas-a lamboaama.

¹³A Efrayim reega a kongre. A Zɩɩda yãe-la a bãaga sẽn lebg bã-toogã. Woto a Efrayim tɩ yõka Asiri sɛɛga. A Zɩɩda kẽng n tɩ yẽsa ne dĩm kãsenga; yẽ me ka na n tõog n sõng-y ne bũmb ye. A kõ tõog n tɩp y nodr ye, Efrayim kamba.

¹⁴Yaa maam, Naaba-Wẽnde, n zabd ne yã wa bõnyẽega, yaa maam n kaoog zabre ne a Zɩɩda, wala rũn-toaaga. M sã n yõk bũmbu, n tar-a n looda, ned ka tõe n le reeg-a mam nugẽ ye.

¹⁵Ade, Naaba-Wẽnd meng n gomda: ‹M na n leba m doogẽ, n tãag a Efrayim kamba sẽn wat n deeg b kongre. B sẽn wat n lʋɩ yɩɩr pʋgẽ la b na n bao mam sẽn beẽ.› »