Read SEBR SÕNGO, 1998 Oze 8 Bible Online

Oze 8 - SEBR SÕNGO, 1998 bible

Oze 8

¹Rɩk-y baorgo n peebe, wẽ-y kũnga, ad-y yel-beed n n sigd Soaala tẽngẽ la a fõta wa wɩbga. Ad-y yaa Israyɛl kambã n ka pids d zooda sẽn da rat bũmb ningã. Yaa Soaala n gomde. B pa tũ m sẽn zãms-ba ye.

²Ba b sã n yet woto: ‹Tõnd yaa Israyɛl kamba, tõnd mii yãmba, Wẽnnaam,›

³basgo b zãgsa neer maanego. Dẽ me la bɛɛba rigd-ba.

⁴B yuga b dĩm dãmba la b pa sok-m n ges sã n taa m yam bɩ sã n pa ta ye. B kõta kug-zĩidb naam tɩ m ka mi tiir ye. B rɩka b wanzurf la b sãnem n dõog wẽn-naandse n yɛs ne bõne sẽn pid bõne.

⁵Samari rãmba, y rat neer bɩ y menes y sãnem nag-bilã. M sũura widga bugum. Wakat bʋg la m na n mik tɩ yell ka y zugu?

⁶Yãmb yẽ yita a Israyɛl buudẽ, la sãnem nag-bila ka tʋʋmd-mit bal n dõog-a-la? A ka wẽnd ye. Sãnem nag-bila na n yɩga peese.

⁷‹Sẽn bʋta sobgo, silman-daad la a na n tigsi.› Tɩ yelbũnd a to le paasdẽ: ‹Kaaf sẽn ka zug kõn wer zom ye.› La a modg n paam zom me, yaa sãamb n so.

⁸Yɛla lima a Israyɛl. Ade marsã a bee bu-zẽmba sʋka wa rʋk sẽn wã n ka le be yõod ye.

⁹Yẽnna n yik a toore n dɩk Asiri sore. Burgumd sẽn pẽgd la a soog-m-menga. Efrayim ka mi rẽ n saad n daad roellse n ka le so a meng ye.

¹⁰B wʋkda b laogã n kõt bu-zẽmbã, la ne rẽ fãa wakat taame tɩ m na n tigim-ba. Ka na le kaoose tɩ na-biisa dĩma zɩlg-b zɩɩb ye.

¹¹A Efrayim mee maan-kug zembala, la maan-kuga waa n paasa b wẽnem. Maan-kuga sɩd waa n paasa b wẽnem, d da ka tẽed rẽnd ye.

¹²M gʋls m noya tusri a Efrayim yĩnga, a na maan wa a toog ka ye.

¹³B sã n nong maanda kʋʋbo, yaa b sẽn nong bala n wãb nemdo, la rẽ ka noogd maam, Naaba-Wẽnd, sũur ye. M pa yĩmd b yel-wẽna ye, m sõdgda b beegrã. M na n lebs-b la Ezipt tẽnga.

¹⁴A Israyɛl yĩma a Naanda la a mee bɛɛndo sẽn be neere. A Zɩɩda me me-la a tẽn-beda zembala. M yaool n na n ninga tẽn-kãens fãa bugum, la bugma na rɩ ro-neeba fãa.