Read SEBR SÕNGO, 1998 Oze 9 Bible Online

Oze 9 - SEBR SÕNGO, 1998 bible

Oze 9

¹Da noog f sũur ye, Israyɛl, da kɩdem wala nin-zẽmbã, tɩ f basa f Wẽnnaam n kẽ yoobo; fo sakame n deeg f yaoodo zɛɛsa fãa pʋsẽ.

²Zɛɛga ki wã la sĩm-bila kaama ka na n yɩ f soolem ye. Rã-paalgã f sẽn gũudã na n looga f taoor la f kõn lemb-a ye.

³A Efrayim ka na n pa Soaala tẽngẽ ye, a na n leba Ezipt la Asʋr, b na n dɩɩ rẽgd dɩɩbo.

⁴A Efrayim pa na n le raal dãam Soaala Wẽnd yĩng ye, b pa na n le kʋ maand Soaala sũur noogr yĩng ye. Ad-y b rɩɩba na n yɩɩ wa kʋʋr dɩɩbo. Ned ning fãa sẽn na n dɩ-a, na n lebga rẽgdo. B rɩɩb na n yɩɩ bãmb yĩng bala, a pa na n kẽ Wẽnd zakẽ ye.

⁵Wẽnd kibsa daare, b kibs kãsenga raare bõe la yãmb na n maane?

⁶Y sã n wa yi y tẽnga sẽn lebg raboogo, Ezipt na reeg yã la y yaad na n tuka Memfis tẽnga. Y sẽn bas y poorẽ wã, y laoga sẽn da bĩngd zĩig ninga, yõeens-tabdo n na n yi be, tɩ gõos pag y rotã.

⁷[7†] Soaala sẽn na n yik ne yãmb daara na n taame. Geelsa raar taame, la ka ling a Israyɛl ye. Y maandame tɩ bãngda yaa gãeenga, Wẽnd sẽn pʋdg a soab bãngrã yaa zʋbsa. Ade, y yel-wẽna sẽn ka tɛkã n wa ne rẽ, y sẽn ka tar sugr ne bãngdã n wa ne rẽ.

⁸Bãngd ning sẽn ka gõe a Efrayim yĩngã, Soaala bee ne yẽnda. La yaa yẽ yĩng la y tar y bẽta gãnegre, n gãnegd a naoor sẽn teesẽ fãa. Naaba-Wẽnd tẽngẽ, a Wẽnda tẽngẽ, yaa beem ne beem bal la a segda.

⁹[8†] Y yõga zood ne wẽnga wa pĩnd dãmba sẽn waa n be Gibea. Soaala tẽra y yel-yoodã, b na n sɩbga y yel-wẽna.

¹⁰ [9†] M sega a Israyɛl wa bugsuntung we-raoogẽ, m yãenda y ba rãmba wa kankang rẽeng bi-moomde. Y ba rãmba sẽn ta Baal-Peor la b sẽn wẽneg n bas t'a Baal yamleoog kẽ-ba tɩ b naag yẽ n lebg Waoosa.

¹¹A Efrayim ziirã na n yɩkame n loog wala luiin-sugri. Rogem ka na n le rog ye, kamb ka na n le wa moog ye, pag ka na n le rɩk pʋg meng ye.

¹²Ba b sã n tõog n gʋʋl kamba, mam na reeg b fãa n pa kees ba a ye. M sã n wẽnemd m kãar n tees-ba, yell ning sẽn na n pak-ba bɩ a pak-ba.

¹³M sẽn ne a Efrayim t'a yaa a soabã, a mamsa a kamba ne gʋg rũmsi. A legend-b lame n tees b kʋʋda.

¹⁴B toga ne sɩbgr waare, la sɩbgr bʋg la y na n sɩbg-ba, Soaala? Bɩ b pagba ra le tõog n dog ye, la b ra le tõog n yẽsem b kamb ye.

¹⁵Maam, Naaba-Wẽnd, n le yete: «Yaa Gilgal la b zãmba puk yã. Yaa be la m sɩng b kisgu. Dɩlla m na n dig-b lame n yiis m tẽngẽ, b wẽnnema yĩnga. M na n kʋʋga m nonglma. B taoor dãmba pʋs n yaa tõatb gilli.

¹⁶A Efrayim bãaga wʋm-a lame; a yẽgna kʋɩɩme, a kõn le wom biig ye. Ba b pagba sã n ket n dogdẽ, m na tees-ba, b sẽn nong wa fãa-fãa wã: bʋg-tẽng sore.»

¹⁷M Wẽnda ka le rat Efrayim dãmb ye, tɩ b pa kelg-b ye, la rẽ me la b na n lebg yɛɛbdba bu-zẽmba sʋka.