Read SEBR SÕNGO, 1998 Zowɛl 2 Bible Online

Zowɛl 2 - SEBR SÕNGO, 1998 bible

Zowɛl 2

¹Peeb-y tõntõodo Siõ tẽngẽ, wẽ-y kũnga tãn-sõngã zugu! Bɩ tẽnga neb sɩng rigbu tɩ Wẽnd daarã taame la bala, ka le zãr ye.

²Yaa zĩ-boog raare, sawad-sabl daare, wulgu raare. La ade, tãb-biis n wate, ka tɛk wa sʋʋre, toos wa bõn-nindi, n maand lik wa yʋng sẽn lʋɩt tãms zutu. B zɩ n yãend a taare la b kõn le yãend ye.

³Tãb-biisa wẽnda bugum sẽn widgi. Yaa bugum sẽn ka be sugri n ka basd bũmb a poorẽ ye. Bũmb ka tõe n põs-a ye. Bugma sẽn waa n nan ka widgi, tẽnga ra wẽnda Eden zẽedo, la a widgr poore, lebga zĩ-peen-daaga sẽn kẽesd rabeem.

⁴Tãb-biisa wẽnda wed-dʋʋdb sẽn zao wiid sẽn tar tĩiga.

⁵[3†] Yaa waa b yɩkda tãnga n tɩ tiimd tãng a to zugu. B bʋʋrã wẽnda bilim-bilm sẽn digd zabre, bɩ bugum sẽn zom moogo t'a pusdẽ. Yaa tãb-biis sẽn tar pãnga n tong b zabr tongre n watẽ.

⁶B sẽn poog zĩig ning fãa, yaa yɛɛsgo, neng sobdame.

⁷B zoeta wa gãndaado sẽn takd zabre; wa zab-mitba, b zoet n dʋʋda lalse. Ned kam fãa teesa a taoore, n ka bʋdgd goabg bɩ rɩtg ye.

⁸Ned ka tusd a to ye, ned kam fãa tũuda a sore. Pɛɛma fɩɩnda b sʋka n looda la tãb-biisa ka sẽegd taab ye.

⁹B zoet n kẽeda tẽngã n lolemd lalsã, n gãensd roto, n tũud rota vẽ n kẽed wa wagda.

¹⁰[4†] Tãb-biisa sẽn tong n watẽ wã la tẽnga sẽn dĩmi, tɩ saaga maan wa a na n lʋɩɩ tẽnga, tɩ wĩndg la kiuug na n kiis b bugum.

¹¹[5†] Soaala-Wẽnd lʋɩ-la b tãb-biisã taoore tɩ b koɛɛg sãta! Tãb-biisa sẽn zabd bãmb zabra me yaa ka tɛka la b tara pãnga. Soaala-Wẽnd daar yaa daar sẽn yɛɛsde, la sẽn na n paam-ba n põsã ka ye.

¹²Maam, Naaba-Wẽnd, n gomd woto: «Y ket n tõe n lɛɛg n wa kẽe maam. Lɛɛg-y n wa-y yã ne y sũur fãa. Loe-y y noore, yãb-y la yõk-y m sɛɛga.

¹³Ka sek tɩ y kẽes y fut ye, yaa y sũurã n tog n tedge.» Lɛɛg-y n wa y Soaala, y Wẽnnaama, nengẽ, tɩ b tara nonglem la nimbãan-zoeere, b sũura ka yãgd fudgr ye. B ka tõt b lebs b zelemde, n bas n ka sɩbg ye.

¹⁴Tõe tɩ b bʋk b sũuri, n bas taale n sudg b kũun sõma. Dẽ marsã la y na n tõog n le wa kõ-b alkam la rãam.

¹⁵Peeb-y tõntõogo, Siõ tẽnga! Moon-y no-loeer daare, moon-y tig-raaga.

¹⁶Tigs-y zãma wã, bool-y tẽnga neba, tigs-y nin-kẽemsã, tigs-y kom-bɩɩba la kom-bõonega menga. Bɩ kãad paalsa yi b roogẽ.

¹⁷Bɩ maan-kʋʋdba, Wẽnd sõgen-kamba, wa ning nintãm wẽnd doogẽ, zãongã la maan-kugra sʋka. Bɩ b yeele: «Soaala-Wẽnde, zoe-y tõnd sẽn ya yãmb buuda neba nimbãanega. Ra bas-y y pʋɩɩrã ne yãnd ye, da bas-y tɩ bu-zẽmba wa laad tõnd n yetẽ: ‹Bãmba Wẽnda zĩi n maanda bõe?› »

¹⁸Soaala-Wẽnd nonga b tẽnga ne nonglem kãsenga la b zoeta b buuda nimbãanega.

¹⁹Wẽnd deegda b buuda kosgo n yetẽ: «Ade, m le kõt-y-la koodo, alkam, rãam la kaam. Y na n paamame tɩ sek yã. La y kõn le paam yãnd bu-zẽmba sʋk ye.

²⁰Bɛ ninga sẽn yi-a nug goab n wa wã, m na rig-a. M na rig-a n zãage, m na tees-a zĩ-peen-daaga, m na tus a taoorẽ tãb-biisã n lub Yamsem Mogrẽ, n tus poorẽ dãmbã n lub Tẽnsʋk Mogrẽ. B na n põogame n bas yũug ned ba a ye sẽn ka rat t'a wẽ-a, la sẽn na n wulumd zĩig zãnga. Woto la m na n menes sẽn nams-b yãmb tɩ loogã.

²¹Bɩ tẽng ra le zoe rabeem ye, a kɩdem n lang ne sũ-noogo, tɩ Wẽnd tʋma tʋʋm kãsense.

²²Da le zoe-y rabeem ye, rũmsi! Pʋ-weesa le tobda yamdo, tɩɩs le womda biisi, kankam la bugsuntund le zõnega ne biisi.

²³Siõ kamba, kɩdem-y yã, lang-y Soaala y Wẽnnaama yĩnga! Tɩ y paama sẽoog saaga; b kõt-a-la yãmb t'a niid n zemsd wa pĩnda, b kɩtame tɩ koom le zoe, sapaolgo la sẽoogo, wa kʋdem wẽnnẽ.

²⁴Lʋrsa na n le pida ne koodo, tɩ y rʋgda la y sĩmsa na n le pid n daal ne rãam la kaam.»

²⁵N-ye! Maam, Naaba-Wẽnd, n yete: «M na n lebs-y-la menemeedã, sʋy wã la kalwaarã sẽn dɩ yʋʋmda pʋgẽ. Ad-y bãmb la tãb-biis niyns mam sẽn tʋm-b tɩ b wa zab ne yãmbã.

²⁶Yãmb na n dɩɩme n tɩge, la y na waooga maam y Wẽnde, y Wẽnd ninga sẽn tʋma tʋʋm-bãna y yĩnga. La m buuda kõn le paam yãnd abada!

²⁷Dẽ la y na n bãnge, Israyɛl kamba, tɩ m be-la y sʋka, tɩ maam la Soaala, yãmb Wẽnde la a to ka be ye. M neba kõn le paam yãnd abada!»