Read SEBR SÕNGO, 1998 Amos 4 Bible Online

Amos 4 - SEBR SÕNGO, 1998 bible

Amos 4

¹Yãmba Samari pagba, sẽn nob wa Bazã nag-yãansã, kelg-y koɛɛg ning maam, Naaba-Wẽnd sẽn tar n na n taas yã. Yãmb sẽn fãad koms rãmba la y namsd naong rãmbã, la y yet y sɩdb rãmba: «Tall-y n wa-y tɩ d yũ,»

²ad-y Soaala n wẽend woto ne b sõmblema: «Sɩda, dasem n wate, b na n vuu yãmb a yeyn-ye, sẽn yɩ pipi soaba n wat yaoolem soaba, b na n vuu yãmb wa lɛoog sẽn yõk zĩifu.

³Y na fʋra lal-gũbra vẽya n yi tɩ ned kam fãa tees a taoore n tɩ pa nug goabg sẽnẽ.» Soaala-Wẽnd n gomd boto.

⁴Israyɛl kamba, modg-y ne Betɛl wẽnd dooga kõom n paam n zãag ne maam n paase. Ka rẽ bɩ y kẽnd Gilgal la y ket n zẽkd y zug ne maam. Y sẽn ta n vẽeg beoog bala bɩ y wa ne y maando, la ra-yɩten-daare bɩ y wa ne zom, rãam la kaam.

⁵Yõog-y bur sẽn ka wẽ ne rabɩlle maan-kugra zugu, y bark pʋʋsg maanda yĩnga. Moonega sẽn noom yãmbã, moon-y tɩ b bãnge, tɩ yaa y yamleoog kũuni la y tar n watẽ. Soaala n kot-y rẽnna.

⁶Ad-y y tẽnsa fãa pʋgẽ yaa maam n da zoe n wa ne kom. Bura ra paoogd-y-la y tẽnsa fãa pʋsẽ la y ka lebg n wa kẽ maam ye. Maam, Naaba-Wẽnd n yet rẽnna.

⁷M da zoe n mong-y-la sa-koom, ka-keer ket kɩɩs a tã; m kɩtame tɩ saag ni tẽn-kãnga la a bas tẽn-kãnga; tɩ pʋ-kãnga paam saaga, tɩ pʋ-kãnga kʋɩ, saag kaalem yĩnga.

⁸Tẽns a yi, tẽns a tã da latmame n ta tẽng a to n na paam koom yũ n lɛɛg n wa ne ko-yũudu la y ka lebg n wa kẽ maam ye. Maam, Naaba-Wẽnd n yet rẽnna.

⁹M tʋma y yĩnga wãango la gãnem, m kʋɩɩsa y bãto la y pʋto. M kẽesa zũnzũur y kankamse la y oliviye biisi, la y ka lebg n wa kẽ maam ye. Maam, Naaba-Wẽnd n yet rẽnna.

¹⁰Ezipt bã-longdem la m wẽnemd n tees yãmba, m basame tɩ sʋʋg loog ne y kom-bɩɩba tɩ y wiidi wã yõgb lebg naana, m basame tɩ y tãb-sika yũug kẽ yã, la y ka lebg n wa kẽ maam ye. Maam, Naaba-Wẽnd n yet rẽnna.

¹¹[12†] M zũndga y yɛla y tẽnsẽ wa m sẽn zũndg pĩnda Sodom la Gomor. Y põsa wa ra-giig sẽn foog bugmẽ la yãmb ka lebg n wa kẽ maam ye. Maam, Naaba-Wẽnd, n yet rẽnna.

¹²Yaa rẽnda yĩnga, Israyɛl, la f na n yãend mam sẽn na n maan ne foo. Mam sẽn na n maan-f bũmb ningã, Israyɛl, segl f menga tɩ yaa maam f Wẽnnaama taoor la f na n yalse.

¹³Tẽeg tɩ yaa maam n naan tãmse la sobgo, maam n wilgd sẽn be ninsaal sũurẽ, maam n pukd sõore la m wat ne yʋngo. Mam sora tuka al yĩngr-yĩngri. Mam yʋʋr la Wẽnde, Naaba-Wẽnd Pãng soaba.