Read SEBR SÕNGO, 1998 Amos 7 Bible Online

Amos 7 - SEBR SÕNGO, 1998 bible

Amos 7

¹Ad Wẽnnaam, m Soaala, sẽn kɩt tɩ mam yãende: Da yaa sʋy wekre, alkam sẽn ningd a yagens wakato, dĩma ka-kɛɛra poore.

²Sʋy wã da wãba tẽnga mood fãa gilli, tɩ mam yeele: «Y sugri, Soaala-Wẽnde, maan-y sugri. A Zakoob na n yɩɩ wãn n vɩɩnde? Ad a paood wɛ!»

³La Naaba-Wẽnd sigsa b sũuri, n yeele: «Sugra paamame!»

⁴Ad Wẽnnaam, m Soaala, sẽn kɩt tɩ m le yãende: Wẽnnaam, m Soaala da boola bugma bʋʋdo t'a sẽn da fẽbg mogrã, a ra baood n na n dɩɩ tẽngã me.

⁵Tɩ mam yeele: «Y sugri Soaala-Wẽnde, bas-y woto. A Zakoob na n yɩɩ wãn n vɩɩnde? Ad a paood wɛ.»

⁶La Naaba-Wẽnd sigsa b sũuri, n yeele: «Sugr paamame!»

⁷Ad Wẽnnaam, m Soaala, sẽn kɩt tɩ mam le yãende: Soaala meng da yɛsa lalg zugu n zãad metba namdo.

⁸Tɩ Naaba-Wẽnd sok maam: «Amos, yaa bõe la f ne?» Tɩ mam leoke: «Met-namdo ne a gĩsga!» Tɩ Soaala yeele: «M na n maka m nebã, Israyɛl kambã, n ges b sã n yaa tɩrse. B ka tɩrse bɩ m da le wa kõ-b sugri ye.

⁹M na n wã-la a Izaak yagensa pʋʋsg zĩisi, a Israyɛl wẽn-naandsa na n bõrame n dʋʋge, la m na n boba zabre ne a Zeroboam doogo.»

¹⁰A Amaziya, Betɛl maan-kʋʋda, tʋmame tɩ b tɩ yeel Israyɛl dĩm a Zeroboam, woto: «A Amos tʋl-f-la ne wẽnga, a tʋl n deega f naama Israyɛl tẽng ka. Ad-y tẽnga gill yam yi-la a goama.

¹¹Ad a Amos sẽn yete: ‹Sʋʋg n na n kʋ a Zeroboam, la b na n kãaga a Israyɛl n loog yembdo zĩig sẽn zãrẽ.› »

¹²La a Amaziya yeela a Amos: «Menem ka, bãngda; ta a Zɩɩda tẽngẽ n tɩ n wilg f bãngrã, la f paamd f rɩɩbo n dɩtẽ.

¹³Sã n ya Betɛl ka, bas f bãngrã, tɩ yaa ka la dĩma wat n pʋʋsd Naaba-Wẽnde la neba fãa mii zĩ-kãnga tiiri.»

¹⁴A Amos leoka a Amaziya: «M da ka bãngda bɩ bãngdb karen-biig ye. M da yaa rũm-kɩɩma la m da kʋɩɩsda m kõnkʋɩɩg biisi n na n kõ m dũmsi.

¹⁵Yaa Soaala-Wẽnnaam n waa n bak maam ne m rũmsã n yeel-m tɩ m tɩ taas b koees b buud a Israyɛl.

¹⁶La ade, foom a Amaziya, fo n gɩdg-m tɩ m da wilg Wẽnd sẽn leok bũmb ning a Israyɛl poorẽ ye la m da por m goama, wa fo sẽn yetã, ne a Izaak yagens ye. Woto wã kelg neere Soaala koɛɛga.

¹⁷Koɛɛga la woto: ‹Fo paga na n kong n lebga pʋg-yoaad tẽnga pʋgẽ. Sʋʋg n na n kood f kom-dibli la f kom-pugli. B na n bẽesa f vẽenema n pʋɩ. Fo menga na n kii bu-zẽmb tẽngẽ, la a Israyɛl na n looga pa-weere.› »