Read SEBR SÕNGO, 1998 Amos 8 Bible Online

Amos 8 - SEBR SÕNGO, 1998 bible

Amos 8

¹Ad Soaala-Wẽnd sẽn kɩt tɩ mam yãende: Da yaa peoog sẽn pid ne tɩɩs bi-moaama.

²La Soaala sok-m lame: «Amos, yaa bõe la f ne?» Tɩ mam leoke: «Peoog sẽn pid ne tɩɩs bi-moaama!» Dẽ la Naaba-Wẽnd yeel maam: «M nebã, a Israyɛl kamba, bɩɩme n sek b bob n looge. M kõn le bas b beegre n ka sɩbg-b ye.

³Maam n yete, maam, Naaba-Wẽnde, tɩ m sẽn na n yik ne b raare, bãng-y tɩ kʋ-yãbdba sẽn be dĩma zaakẽ wã na wiis b wiisgu. Kũum sẽn sam taab la b na n yãende, kũum sẽn dɩg zĩig zãng la b na n yãende. Sẽn lebẽ fãa, tẽnga na n yɩɩ sɩɩ.»

⁴Kelg-y yã, yãmb fãa sẽn namsd nimbãan-dãmba, la y menesd talsa tẽnga pʋgẽ,

⁵yaa yãmb n gomd woto: «Kiu-paalga na n looga da-bʋre, tɩ d koos d koodo? Vʋʋsg raara na n looga da-bʋre tɩ d pags d baoa?» Yãmb yaool n boogda y petã, y bõn-magdi wã magdame bala n dʋʋsd daaga.

⁶Ba kood ning sẽn kẽ bugdã y vaagd-a lame n koosdẽ. A ka-neng rãmba, naong rãmba sẽn da y neoodr n ka tõog n yao, lebgda y yem-daado.

⁷Ad-y yaa woto la Soaala wẽen yã: «Ne tẽng ninga sẽn yaa a Israyɛl zu-zẽkrã, m kõn yĩm y manesma abada.»

⁸Yaa rẽ yĩng la tẽnga na n miimi, t'a kamba fãa kelem kʋʋre. Tẽnga na n zẽka yĩngri n lɛɛg n lʋɩ, wa Ezipt kʋɩl-kãsenga sẽn maande.

⁹Badaare, Soaala n yeele: «M na kɩt tɩ wĩndg lʋɩ wĩnto-sʋka, m na kɩt tɩ lik zĩnd wĩnto-sʋka.

¹⁰M na kɩt tɩ y kibs rãmba lebg sũ-sãanga, tɩ y yɩɩla lebg kũmkũm. M na sẽgen-y sũ-pa-noang futu, la zuta fãa zoobd na kõoge. Na n yɩɩ wala ma-bi-yend kʋʋre. Daara na n kell n yɩɩ sũ-beedo ne sũ-beedo!»

¹¹Daar n wate, Soaal Wẽnd n yeele, tɩ m na n tool kom, tẽn-kãnga rãmba. La ka bur kom la b na n yãb ye, ka ko-yũud la b na n yãb ye. Yaa m goama kom la ko-yũud n na n yõk-ba.

¹²B na n yii tẽnga nug goabg n tees nin-taoore, n yi nug rɩtgo n tees yaanga, n baood n na n kelg Soaala koɛɛga, la kato, a kõn lʋɩ b tʋbrẽ ye.

¹³Badaare kom-neeba, kom-pugli la kom-dibli na n kii ko-yũudu.

¹⁴Sẽn wẽend-b ne Samari yel-beedã, sẽn yet-ba: «Dã, ad m wẽenda ne fo wẽndã, m wẽenda ne Beerseba tõog la a pãnga,» bãmb fãa na n lʋɩɩme la b kõn le yik ye.