Read SEBR SÕNGO, 1998 A abdiyas 1 Bible Online

A abdiyas 1 - SEBR SÕNGO, 1998 bible

A abdiyas 1

¹Woto yaa Naaba-Wẽnd sẽn wilg a Abdiyas; yaa koees niyns b sẽn kɩt t'a yiis Edom rĩunga poorẽ. Ned la Naaba-Wẽnd tʋm bu-zẽmbã. D wʋma nin-kãng sẽn gomd woto: «Yik-y tɩ d tak zabre ne Edom.»

²Edom, yaa Soaala n gomd ne-fo, m na kɩtame tɩ f lebg bilf buud a taaba sʋka, m na n kɩtame tɩ f reeg buud a taaba paoore.

³F zẽk-m-menga menes-f lame, pĩig sẽn lill-f yĩnga, la f sẽn zao ned sẽn ka tõe n taẽ, f yeta f sũurẽ: «Ãnda n na n sik-ma?»

⁴La ade, ba f tɩ zaoond yĩngr wa sɩlga, ba f tʋka tʋɩ ãdsa sʋka, m na tus-f n siki. Yaa maam, Naaba-Wẽnd, n gomde.

⁵Yaa wãna, Edom? Wagdb la yʋng fãadb wa-la f zakẽ, tɩ f zĩ sɩɩ! Ad-b na n looga ne b sẽn tõe fãa. Bugsuntung biis rɩgsdb sã n kẽ fo pʋʋgẽ, ka sib yiisdem bal la b na n bas ne-f laa?

⁶Ges b sẽn vɛɛsd foo, Ezayu roogo, ges f laogã sẽn da maneg n solgã sẽn yiis n dɩga!

⁷B diga foo, Ezayu, n gãndg toaaga; sẽn sõangd-b fooma belg-f lame bala! F zo-rãmba tudg-f lame bala! Zooda sẽn da yõg sõmb ne neb niynsã, bãmb n bẽt-f bẽdgo. B yetame tɩ f zuga lebgame.

⁸Badaare, Wẽnd n gomde, m kõn kees bũmb Edom pʋgẽ ye, m kõn kees bũmb a Ezayu tãnga zugu ye. M kõn kees nin-yẽseng ye.

⁹Tema tẽnga, ad f tãb-biisa na n diga rabeem kãsenga, b na n kʋ-la b fãa gilli.

¹⁰Tẽeg-y yã, Edom rãmba, tɩ y fãame la y kʋ-la y saam-biisi, a Zakoob yagensã. Y ka zoe yãnd ye la rẽ me la y na n menem gilli, beoog raare.

¹¹Bɛɛba sẽn waa n tõog a Israyɛl tãb-biisã n kẽ a na-tẽngẽ wã, y ra zĩi n getame. Sãamba sẽn waa n pʋɩt taab Zerizalɛɛm laogã, y me maana wa bãmba.

¹²Fo ra pa togẽ n noog f sũuri yel-beeda sẽn lʋɩ f saam-biisa zuga raare, Zɩɩda tẽn-peelmẽ wã ye. Fo ra pa togẽ n noog f sũuri, b sẽn waa n kʋʋd-ba ye. Fo ra pa togẽ n purs-b beedo b sẽn waa n zĩ ne yɩɩra ye.

¹³F naoor da ka tog n tabgẽ m buuda na-tẽnga a wãaba raar ye. F nif ra ka togẽ n yãend a zu-beeda ye. F nug ra ka togẽ n sɩɩs a laogo, zɛɛba raar ye.

¹⁴[1†] Fo ra pa togẽ n yals so-tiisẽ n kʋ sẽn da zoet-ba bɩ n yõg-b n kɩs b bɛɛba, b zu-bʋka raar ye.

¹⁵Bãng-y marsã tɩ Soaala bʋʋd kãsenga raar taame. Woto wã fo sẽn maan ne f taabã, boto me la b na n maan ne foo. Fo sẽn da rat yel-beed ningã n na n lɛɛg n dɩ-fo.

¹⁶Sã n ya yãmba, Israyɛl kamba, yaa m tãn-sõnga zug la y zoe n yũ m sũ-puura rãama wamde. Buud a taaba me na n deega b rẽnna. B me na n yũ n gãeemame n yaool n menem zãnga.

¹⁷Woto Siõ na le lebg f soolem la yẽ tãnga zugu la sẽn põs-ba na n wa soonde. A Zakoob yagensa na n le sooga b tẽnga, b na n le fãsg-a-la a bɛɛba nugẽ.

¹⁸A Zakoob ne a Zozɛf kamba na n yɩɩ wa bugum; bugma na n dɩ-la Ezayu kamba wa moogo, n menes-b gilli, n ka na n kees nin-vɩɩg ye. La yaa maam, Naaba-Wẽnd, n togsd rẽnna.

¹⁹Nug rɩtgo, Zɩɩda nebã na n wẽe n deega Edom tẽnga, B na n deega Filisti rãmb tẽn-nabrã. B na n sooga a Samari, a Efrayim na-tẽngã, t'a Bẽnzame soog Galaad.

²⁰A Israyɛl pa-weta sẽn da kẽed nug goabgã na n yika wa tãb-biisi n wẽ n deeg Fenisi n ta Sarepta. Sã n ya a Zɩɩda pa-wetã sẽn lɛɛg n wa kẽed Sefarad, bãmb na n sooga nug rɩtg tẽnsã.

²¹B na n maana raoodo n dʋ Siõ tãnga la b na n sooga Edom. La bãmb fãa dĩma la Soaala-Wẽnde.