Read SEBR SÕNGO, 1998 Zonas 1 Bible Online

Zonas 1 - SEBR SÕNGO, 1998 bible

Zonas 1

¹ [1†] Wẽnd gomda ta-la a Zonas, a Amitayi biigã. B yeel-a la woto:

²«Aya, yik n ta Niniv, tẽn-kãsengẽ wã, n yeel nebã tɩ mam wʋma b wẽnema kibare.»

³A Zonas yikame n dɩk Taris sore, n na n zoe n põs Soaala-Wẽnde. A taa Zafa tẽnga la a paama koom-koglg sẽn digd Tarsis tẽnga, a yaoome n kẽ n naag neb a taaba, n na n ta Tarsis, n zãag ne Soaala-Wẽnde.

⁴La Soaala-Wẽnd kɩtame tɩ sobg kãseng yik mogra zugu. Kooma rãmba wʋsgo tɩ koglga rat n lisi.

⁵Rabeem yõka so-toagdba fãa; ned kam fãa kelmame n tees a wẽnde, la b lobd b teeda fãa mogrẽ, sẽn na n yɩ-la tɩ koom-koglga lebg faasga. Wakat kãnga t'a Zonas da siga tẽngr doogã n gãe n fõogd a gõeem.

⁶La koglgã soab kolg-a lame n yeel-a: «Yaa bõe la f maand ka, yaa bõe tɩ fo gõe? Yik n kelem f Wẽndã! F Wẽnda tõeeme n ges d yelle, tɩ d ka ki ye.»

⁷Koglga pʋgẽ dãmba waa n yeela taaba: «D poees n ges ãnd la yella soaba?» B bʋga b babgre, la yella lʋɩ-la a Zonas zugu.

⁸La b yeel-a lame: «Foo la yella soaba. Aya! Yɩɩ wãn-wãna, fo yii yɛ, fo tẽng yʋʋre, togs f buud yʋʋre.»

⁹T'a Zonas na n yeel-ba: «Mam yaa Ebre, n waoogd Naaba-Wẽnde, yĩngr Wẽndã, sẽn naan mogrã la tẽngã.»

¹⁰A togs-b-la a kibarã. La neba pɛleng yɩka al wʋsgo b sẽn bãng t'a ra zoet n na n põsa Soaala-Wẽndã, tɩ b sok-a: «Fo yɩɩ wãna n maan woto!

¹¹Tõnd na n maana foom bõe n paam tɩ mogra sigi.» Sɩda kooma da fudgdame n paasdẽ.

¹²La a yeel-b lame: «Dɩk-y-ma m lob mogra pʋga t'a na sigi y yĩnga. Bala mam miime tɩ yaa mam yĩnga la sob-raoogã zabd ne yãmba.»

¹³Sẽn dugsd-b koglgã makame tɩ b na ta kʋl-koaka la ayo, kooma da fudgdame n paasdẽ.

¹⁴B yõka Naaba-Wẽnd sɛɛg n yetẽ: «Ad wɛ, Soaala-Wẽnde, bɩ y ra bas tɩ d ki ninsaan-kãnga yĩng ye. Bɩ y ra ning d taale ne pʋ-peen-ned zɩɩm ye, tɩ yaa yãmba, Soaala, n maand y yamleoogo.»

¹⁵Dẽ poore b tʋka a Zonas n los mogrẽ wã la ko-wiisa sigame.

¹⁶Soaala-Wẽnd dabeem kẽ-b-la wʋsgo tɩ b na n kʋ maando la b pʋlem pʋlem-bɛda.