Read SEBR SÕNGO, 1998 Sõadga 10 Bible Online

Sõadga 10 - SEBR SÕNGO, 1998 bible

Sõadga 10

¹Soaala-Wẽnd yeela a Moyiiz:

²«Kɩt tɩ b maan wanzurf tõntõod a yiibu. Yaa yõgsa n na n dõog-ba. Bãmb la b na n peebe tɩ zãma wã tigim, bãmb la b na n peebe tɩ b sɩng kẽnde.

³Tõntõod a yiiba sã n naag taaba n peebe bɩ neba fãa wa tigim f taoore, sɛka rooga noore.

⁴Sã n ya tõntõog a ye bala n peebe, ya b sẽn yãk b rãmb tɩ b lʋɩ tãb-biis tusr taoorã n tigimd fo sɛɛgẽ.

⁵Tõntõoga bʋʋr sã n sigd la rʋʋda, sẽn ti-b yaangã n dengd yikri.

⁶Tõntõoga sã n le peeb yãang la raaga, sẽn ti-b nug rɩtgã n yikdi. Yikr tõntõog fãa peebda yãang la raaga.

⁷Tõntõoga sã n kell n kũmd raaga, yaa zãma wã gilli n tigimdi.

⁸Yaa maan-kʋʋdba, a Aarõ kambã, n na n peeb tõntõodã, la na n yɩɩ woto zamaan woo zamaana.

⁹Y sã n wa be y tẽngẽ wã, tɩ y bɛɛba wa kaoog zabr ne-yã, y na kɩt tɩ tõntõoda peeb yãang la raaga. Woto y na nek Wẽnnaam y Soaala pʋ-tẽere tɩ b wa zãag-y ne y bɛɛba.

¹⁰Y sã n wa tar y sũ-noog raare, y kibsa, y tig-raase, y kʋʋda y yũ-noog la y laafi kosg maanda tɩ tõntõoda naag n peebdẽ. B na n neka Wẽnnaam y Soaala pʋ-tẽer. Maam la y Wẽnnaam dũnna la beoogo.»

¹¹Yʋʋmd a yiib soaba, kiuug a yiib soaba pisi raare, sawadga loogame n bas sɛka roogo.

¹²Israyɛl kamba yii Sinayi zĩ-peen-daagẽ n sɩng kẽnd bal-balle la Parã weoogẽ la b wa n yaase ne sawadgã.

¹³Woto n yɩ Israyɛl kamba pipi yikri wala Soaala-Wẽnd sẽn da wilg a Moyiiz.

¹⁴Ya neb niyns sẽn dɩk n fãoog ne a Zɩɩda kamb la a tãb-biisã n sɩng yikri. A Aminadab biig, a Nasõ, n da yaa a Zɩɩda tãb-biisa tãnsoaba.

¹⁵A Isakar tãb-biisa tãnsoab da yaa a Suar biig, a Netanɛl,

¹⁶t'a Elon biig a Eliyab, ya a Zabulõ tãb-biisa tãnsoaba.

¹⁷B baasa sɛka roogo t'a Gersõ ne a Merari kamba na n loog ne-a.

¹⁸B sẽn dɩk neb niyns n fãoog ne a Rubẽ kamba la a tãb-biisã n yiki. A Sedewur biig a Elisur, n da yaa a Rubẽ tãb-biisa tãnsoaba,

¹⁹t'a Simeõ tãb-biisa tãnsoab yaa a Surisadayi biig a Selumiyɛl,

²⁰t'a Deowɛl biig a Elyasaf, yaa a Gad tãb-biisa tãnsoaba.

²¹Bãmb poore, a Keyat kambã n tʋk zaka teed n loog. Bãmb sẽn wat n ta tɩ sɛka roog zoe ti n yalsame.

²²B sẽn dɩk b rãmb n fãoog ne a Efrayim kamb la a tãb-biisã n yaoond n yiki. A Amiyud biig a Elisama, n da yaa Efrayim tãb-biisa tãnsoaba,

²³t'a Manase tãb-biisa tãnsoab yaa a Pedasur biig a Gameliyɛl,

²⁴t'a Gideoni biig a Abidã, yaa a Manase tãb-biisa tãnsoaba.

²⁵Sẽn yaool b yikra fãa-fãa yaa neb niyns b sẽn dɩk n fãoog ne a Dã kamba la a tãb-biisi. A Dã tãb-biisa tãnsoab yaa a Amisadayi biig a Ayiyezɛr,

²⁶t'a Okrã biig a Paziyɛl, yaa a Asɛr tãb-biisa tãnsoaba,

²⁷t'a Neftali tãb-biisa tãnsoab yaa a Eyinam biig a Ayira.

²⁸B sẽn na n sɩng b kẽna, yaa woto la Israyɛl kamba pʋg taaba. Yaa woto la b rɩk b sore.

²⁹A Moyiiz yeela Madiã raoa la a rɛɛmba a Reowɛl biig a Obab: «D sẽn dabd tẽng ninga yaa Soaala-Wẽnd sẽn wilg tɩ b na n dɩka a soaba n kõ tõndã. Wa yãag-do! F na naag tõnd n dɩ yõod ning Soaala sẽn kãab a Israyɛl.»

³⁰La ad-a Obab sẽn leoke: «M ka na n tũ ye, yaa m ba-yira la m dat n lebẽ.»

³¹Dẽ me la a Moyiiz yeel-a: «Da bas-d ye. Fo mi d sẽn tõe n wẽ sik zĩig ning zĩ-peen-daagẽ wã, wa yɩ d sɩleto.

³²F sã n tũ tõndo bãng tɩ f na naag n dɩ yõod ning Soaala-Wẽnd sẽn na n kõ-dã.»

³³Dɩlla b siga Soaala-Wẽnd tãngã n kẽn dasem a tãab kẽnde. Kuga walsa sẽn da be koglg ning pʋgã da renga taoore tɩ b da rat n bãnga sika sẽn na n wẽ zĩig ninga.

³⁴Wĩntoogo sawadga ra buiid-b-la ne a maasem b sã n wa yik n sɩng kẽnde.

³⁵[13†] B sã n wa yikd ne kuga walsa sẽn da be koglg ning pʋgã a Moyiiz ra yetame: «Yiki yã, Soaala, tɩ y bɛɛba na sẽege, tɩ sẽn maand b zabra ne yãmba na kʋɩ tĩiga!»

³⁶A sã n wa yalsdẽ, a Moyiiz le yetame: «Le waa-y yã, Soaala, a Israyɛl sʋka! A Israyɛl kamba la a tãb-biisa ka tõe n sõd n sɛ ye!»