Read SEBR SÕNGO, 1998 Sõadga 13 Bible Online

Sõadga 13 - SEBR SÕNGO, 1998 bible

Sõadga 13

¹Soaala-Wẽnd goma ne a Moyiiz:

²«Tʋm neb tɩ b reng taoore n bãng Kanaã tẽnga nenga tɩ yaa tẽn-kãng la m dɩk n kõ Israyɛl kamba. Y na n yãka ned a ye sak fãa pʋgẽ, ned faa ne a ba-biisi. Y na n tũus-b-la Israyɛl nin-tɩɩsa sʋka.»

³Yaa Parã zĩ-peen-daaga sɩngrẽ la a Moyiiz paam noore n na n tʋm-ba la b fãa sɩd da yaa Israyɛl sak kãsem-dãmba.

⁴Bãmb yʋy wã la woto: A Zakur biig a Sama, a Rubẽ roogẽ.

⁵A Ori biig, a Safat, a Simeõ roogẽ.

⁶A Yefune biig a Kalɛb, a Zɩɩda roogẽ.

⁷A Zozɛf biig a Yigyal, a Isakar roogẽ.

⁸A Nun biig a Osea, a Efrayim roogẽ.

⁹A Rafu biig a Palti, a Bẽnzame roogẽ.

¹⁰A Sodi biig a Gadi, a Zabulõ roogẽ.

¹¹A Zozɛf biig a Manase roogẽ yɩ-la a Susi biig a Gadi.

¹²A Gemali biig a Amiyɛl, a Dã roogẽ.

¹³A Mikayɛl biig a Setur, a Asɛr roogẽ.

¹⁴A Wofsi biig a Nabi, a Neftali roogẽ.

¹⁵A Maki biig a Geowɛl, a Gad roogẽ.

¹⁶Yaa nin-bãmba la a Moyiiz yãk yã tɩ b reng taoore n bãng tẽnga nenga. A Moyiiz teema a Nun biig a Osea, yʋʋrã tɩ lebg Zozuwe.

¹⁷Bãmb la a Moyiiz tʋm yã tɩ b na n karg Kanaã tẽn-peelma. A yeel-b lame: «Reng-y n dʋ Negɛb tɩ b sã zao tãnga zugu,

¹⁸b nee tẽngã sẽn yɛdge, b nee neb niyns sẽn kẽed-a wã sã n tara pãng bɩ b sã n ka tare, neba sã n yaa wʋsg bi-bilfu.

¹⁹Y na bãng neb niyns sẽn kẽed b tẽnga sã n yaa nin-sõma bɩ nin-wẽnse. Y na bãng b tẽnsa sã n me n gũbga ne lalse bɩ b sã n ka gũbgi.

²⁰Y na bãng tẽnga sã n ket n tara sɩɩlem bɩ a sã n sãbgame; a sã n tara tɩɩse bɩ a sã n ka tare. Modg-y n wa ne b tɩɩsa biisi.» Da yaa Tamuz kiuugu, kiuug a naas soaba, sib moama kiuugu.

²¹B dʋʋme la b saaga tẽngã, sẽn sɩng Sin we-raoogo n wat Reob, Lebo-Amat sẽnẽ.

²²B saaga Negɛb n ta Ebrõ, be la a Ayiman, a Sesayi la a Talmayi yagensa da kẽeda. Bãmb la Anakitsa yagense. Yaa nin-wogd buudu. Ebrõ sẽn ya bãmb tẽngã meeme tɩ yʋʋm maana a yopoe, tɩ b yaool n me Tanis, Ezipt tẽnga.

²³B wa n pooga Eskol bãg-faaga la b kɛɛga bugsuntung willi ne a sib gĩndi. B kɛɛga raoog n palg gĩnda tɩ neb a yiib tʋk-a. B fãsa kankama la tɩ-biis sẽn wẽnd pooloomse.

²⁴B pʋda zĩ-kãng yʋʋr tɩ Eskol bãg-faaga, bugsuntung bãoogo, la rẽ yaa sib gĩndã b sẽn kɛɛg beelẽ wã yĩnga.

²⁵Dasem sẽn maan pis-naase, sẽn tʋm b rãmba lɛɛg n waame.

²⁶B waa n yãenda a Moyiiz, a Aarõ, la Israyɛl kamba, Parã zĩ-peen-daagẽ, Kadɛs tẽnga. B wilga b fãa gilli b kẽnda sẽn yɩ a soaba la b wilg-b-la tẽnga tɩɩs biisi.

²⁷B yeel-b-la woto: «Fo sẽn tʋm tõnd zĩig ningã, d kẽngame la sɩd yaa tẽng sẽn bund sɩɩd la bĩisim. Ges-y b tɩɩsa biisi!

²⁸Bũmb sẽn be, ad-y b neba tara pãnga la b tẽnsa mee lals n gũbgi la d tol n yãenda Anakitsa yagense.

²⁹Amalesitsa bee Negɛb, tɩ Ititsa, Zebuzitsa la Amoritsa tiid tãms zutu, tɩ Kanaã rãmb yedg mogra noore la Zʋrdẽ foolle.»

³⁰Neba da rat n kɩɩsa a Moyiiz, la a Kalɛb kɩtame tɩ b sĩndi la ad-a sẽn yeele: «Yik-y tɩ d looge, n tɩ reeg tẽmsã tɩ daar a ye d na waa n tõog n wõr-ba.»

³¹La sẽn tũ-b yẽ n kẽngã leokame: «Tõnd kõn tõog bada n tak zabr ne nin-bãmba ye, b pãng yɩɩda tõndo.»

³²La b sɩngame n na n sãbs b sẽn yãendã n yetẽ: «D sẽn gilg n yãend tẽng ninga yaa tẽng sẽn dɩt a kamba. Tõnd sẽn yãend b rãmba fãa yaa nin-wogdo.

³³[18†] D tol n sega nin-daado, a Anak yagense, nin-wobd buudu; d da nee d mens wa pakenlagma, bãmb taoore, la yaa boto la b sɩd da ne tõndo.»