Read SEBR SÕNGO, 1998 Sõadga 17 Bible Online

Sõadga 17 - SEBR SÕNGO, 1998 bible

Sõadga 17

¹Soaala-Wẽnd goma ne a Moyiiz:

²«Wilg maan-kʋʋd a Elazar, a Aarõ biiga, t'a yiis wisda laas bugmẽ tɩ yaa te sõma la b zãag zĩig n kiis b bugma.

³B rɩk nin-bãmba sẽn yao b beegra ne b yõorã, b rɩk b wisda laase n kud-b tɩ b lebg paklse n tableg maan-kugrã; yaa kũun sẽn ta Soaala-Wẽnd taoore n lebg bõn-sõma. B na yɩ wa bũmb sẽn nekd Israyɛl kamba pʋ-tẽere.»

⁴Maan-kʋʋda Elazar reesa bugma sẽn dɩ b rãmb wisda laase la b kud-b lame tɩ b lebg paklse tɩ b tableg maan-kugrã.

⁵Yaa bũmb sẽn nekd a Israyɛl kamba pʋ-tẽere tɩ nin-zaalga, ned ning fãa sẽn ka a Aarõ buudu, da saag n kolg Soaala-Wẽnd taoor ne wisdu n wa ki wala a Kore ne a nebã, wala Soaala-Wẽnd sẽn da wilg a Moyiiz.

⁶Beoog sẽn vẽege, a Israyɛl zãng yika ne a Moyiiz la a Aarõ. B ra yetame: «Yãmb kʋʋ Soaala-Wẽnd neba!»

⁷Mik neba sẽn waa n sɩng zabr ne-bã, a Moyiiz ne a Aarõ wẽnemda b neng n tees sɛka roogo. Sawadgo n waa n lud-a la Soaala-Wẽnd ziir pukame,

⁸t'a Moyiiz ne a Aarõ na n bʋʋg-b sɛka roogẽ.

⁹Wẽnnaam yeela a Moyiiz:

¹⁰[31†] «Yi-y nin-bãmba sʋka tɩ m na n menes-b-la vugr bala!» La b yiiba wõgemdame n kɩ b neng tẽnga,

¹¹t'a Moyiiz yeel a Aarõ: «Dɩk wisd laaga n yãk maan-kugra bugum n ning tɩdare la f ta neba sʋka. Maan f sẽn tog n maan bũmb ning t'a paama a yel-wẽnda sugri, tɩ Soaala-Wẽnd sũura puuga wʋsgo la tẽn-kũuma zoe n sɩngame.»

¹²A Aarõ dɩka wisda laaga wala a Moyiiz sẽn yeel-a la a wudg n ta zãma wã sʋka la a mikame tɩ tẽn-kũuma zoe n sɩngame. A ninga tɩdarã n maan sugr kosgo neba yĩnga.

¹³A tɩ yalsa sẽn ki-ba la sẽn vɩ-ba sʋka la tẽn-kũuma yalsame.

¹⁴Tẽn-kũuma sẽn loog ne b rãmba taa tus piig la a naase la kobs-yopoe. Ka naag n sõd sẽn deng n ki-b ne a Kore wã ye.

¹⁵A Aarõ leba a Moyiiz sɛɛgẽ, sɛka roogẽ, tɩ tẽn-kũuma ra yalsame.

¹⁶Soaala-Wẽnd yeela a Moyiiz:

¹⁷«Wilg Israyɛl kamba tɩ roog fãa wa ne rasaare: rasab piig la a yiibu. Kãsem-dãmba tall-b lame n wa. B na n gʋlsa roog fãa yʋʋr a rasaara zugu.

¹⁸A Levi rooga rasaar zugu b na n gʋlsa a Aarõ yʋʋre, tɩ roog fãa tara rasaar a ye bala.

¹⁹Tedg rasaba sɛka roogẽ, kuga walsa sẽn be koglg ninga pʋgẽ wã taoore, zĩig ning m sẽn likd m meng yãmbã.

²⁰Ned ninga rasaar sẽn na n tobe, bãng-y tɩ yaa yẽ soab la m tũus n yãke la wotome la m na n zãag-y ne Israyɛl kamba wɩdsã, b kõn le yaag b noor ye.»

²¹A Moyiiz taasa koɛɛga Israyɛl kamba. Kãsem-dãmba waa n kɩs-a-la rasaare, roog fãa waa ne a ye. Dɩlla yaa bãmb piig la a yiib la a reeg yã, a Aarõ rẽnna sã n naage.

²²A Moyiiz rɩgl-b-la sɛka roogẽ, kuga walsa koglga taoore.

²³Vẽkẽmbeoogo, a Moyiiz sẽn kẽ sõmblem dooga pʋga, a mikame t'a Levi yagenga, a Aarõ, rasaara tobame; a ninga vãoogo, a ninga puugu n tol n bɩɩs a biisi.

²⁴A Moyiiz yiisa rasaba Soaala-Wẽnd taoore n tɩ wilg a Israyɛl kamba fãa. B yãeeme la ned kam fãa le reega a rẽnda.

²⁵Tɩ Soaala-Wẽnd na n yeel a Moyiiz: «Lebs a Aarõ rasaara kuga walsa koglga sɛɛga. A na n paa be n kõ Israyɛl kamba kaseto tɩ b b yaa tõatb buudu. Woto wɩdsa sẽn wɩt maama na n sɛɛme la kũum kõn le ki ye.»

²⁶A Moyiiz maana fãa wa Soaala-Wẽnd sẽn wilg-a.

²⁷Israyɛl kamba waa n yeela a Moyiiz: «Ade, tõnd kiidame, tõnd tara loogre, n tar loogre.

²⁸Sẽn kolga Soaala-Wẽnd ne b rooga fãa, kũum n dɩkd-a; d na n looga a yeyn-ye n wa sɛ gilli?»