Read SEBR SÕNGO, 1998 Sõadga 18 Bible Online

Sõadga 18 - SEBR SÕNGO, 1998 bible

Sõadga 18

¹Soaala-Wẽnd yeela a Aarõ: «M na n soka foom, n sok f roogã, n sok Levitsã f saam-biisã, y sã n bas tɩ bũmb kedb n ka tũ tɩrga sɛka roogẽ. Taal bee foo ne f kamba zugu bala, sã n ya yãmb n ka modg tɩ y tʋʋma fãa tũ sore.

²F na n boola f sɛɛgẽ Levitsa, f saam-biisã. Foo ne f yagensa, y sã n wat kuga walsa sẽn bĩngd roog ninga noorẽ, bãmb n na n yɩ y sõangdba la y sõgen-kamba

³B na n maana fo sẽn yet tɩ b maan fãa, b na n sõng-f la ne sɛka rooga tʋʋma; b sẽn pa na n sɩɩs yaa te-sõma wã, yaa maan-kugrã; woto b kõn bao yell n kõ b menga, la b kõ yãmb ye.

⁴Bãmb n na n sõng foo, sɛka roog tʋʋma yĩnga la nin-zaalg da wa naag-y ye.

⁵Yãmb n so zakã la sɛka rooga tʋʋma la Israyɛl kamba sũur kõn le kãb ne y ye.

⁶Ade, mam meng m toore n dɩk Levitsã, y saam-biisã, n kõt yãmba. M kɩs-b lame tɩ b reeg yãmb zĩiga n tʋm Wẽnd sɛka rooga tʋʋma.

⁷Foo ne f kamba n na n tʋm maan-kʋʋra tʋʋma, sẽn get maan-kugrã la sẽn be peen-lilla poore. Maan-y y tʋʋma neere, yɩ-y maan-kʋʋdba, tʋʋmd kãng la m kõt yã. Nin-zaalg fãa sã n kolg be bɩ b yãk a yõore.»

⁸Soaala-Wẽnd yeela a Aarõ: «Ade, yaa foo n na deesd neba sẽn wat ne kũun niyns mam yĩngã, Israyɛl kamba sẽn tog n dɩk bũmb ning fãa n kõ maama. Bãmb na n yɩɩ foo ne f kamba soolem, zamaan woo zamaana.

⁹Kũun sõma niyns sẽn ka na n yõog bugum la sẽn na n yɩ fo rẽnna yaa zoma, yaa rũms niyns sẽn kʋ sugr kosg la yell manegr yĩnga, Israyɛl kamba sẽn kõt-ma. Bãmb la kũun sõma wã foo ne f kamba sẽn na n sooge.

¹⁰Y na n zĩnda zĩ-sõngẽ n dɩ-ba. Rao fãa tõe n dɩ-b lame, yaa rɩɩb sẽn ya rɩ-sõma.

¹¹Kũun sẽn le ya fo rẽnna, yaa b sẽn kẽ Israyɛl kũuna pʋgẽ n yãk pʋɩɩr ning toorã. M dɩk-b lame n kõt yãmb ne y kamba, y kom-dibli la y kom-pugli, zamaan sẽn wate. Sẽn be-b fo zakẽ fãa n ka rẽgem tõe n dɩ-b lame.

¹²M le kõt-f-la kood paalsã, ka-neema, yʋʋmda rãama; b sẽn kõt Soaala-Wẽndã, yaa foom n so.

¹³F na n le sooga kood rẽemsa fãa biisi, tɩɩsa bi-rẽemsa fãa b sẽn tall n wa Soaala-Wẽnd taoorã. Neb niyns fãa sẽn be f zakẽ n ka rẽgem tõe n dɩ-b lame.

¹⁴[32†] Foo n so bũmb ning fãa a Israyɛl sẽn le ka tõe n sooge.

¹⁵Foo n so kom-dẽemsa fãa rondi b sẽn wat n kɩt Soaala-Wẽnde, ninsaalba kom-dẽems rondi wala rũm dẽgda kom-dẽems rondi.

¹⁶Bi-ribl ning fãa f sẽn kɩt rondi a yĩnga t'a le wa f soolmẽ, ka tog n loog kiuug biig ye. Rondi wã na n yɩɩ wakɩ koeems a nu, wakɩ koeems wa b sẽn dɩt a soab Wẽnd waoogra zĩigẽ. Woto wã yaa bõones pis-nu la b kɩta.

¹⁷Sã n ya nag-yãanga, pe-yãanga, bʋʋga, rondi ka tõe n kɩs n tõog n soog bãmb pipi biig ye. Yaa Soaala-Wẽnd bala n so. Bãmb kʋʋdame, b zɩɩma raagda maan-kugrã sɛɛga la b kaama rɩta bugum tɩ maoonga yũ-nooga noog Soaala-Wẽnd sũuri.

¹⁸Foo n so nemdã, foo n so yãooga sẽn dɩk n tees Soaala-Wẽndã la rɩtg gerã.

¹⁹Woto m kõt-y-la Israyɛl kamba sẽn kõt maam bũmb ning wala b kũun sõma. La rẽ n na n yɩ yãmb me pʋɩɩre, foo ne f kom-dibli la f kom-pugli, zamaan woo zamaana, zooda yĩnga, zood ning sẽn kõn sãame, m sẽn yõg ne foo la f yagense. Yaa zood yõgb rɩɩbo sẽn ning yamsem.»

²⁰Wẽnnaam yeela a Aarõ: «F ka tar buud pʋɩɩr Israyɛl kamba raboogẽ ye, Israyɛl kamba tẽngẽ ye, yaa maam la f buuda pʋɩɩre.»

²¹ [33†] Soaala paasame: «A Levi kamba pʋɩɩr la woto: B tʋʋmda keoor yĩnga, b sẽn tʋmd sɛka roog tʋʋma yĩnga, bãmb na n sooga Israyɛl kamba sẽn yãkd b paoong pʋgẽ, pʋɩɩr a ye piig fãa zugu n kõt Soaala-Wẽndã.

²²Bãmb n deeg Israyɛl kamba zĩiga tɩ b pa tõe n le kolg sɛka roogo n bao yell n kõ b mengã.

²³A Levi kambã n na n ges sɛka roog tʋʋma; b ka tʋmd neere, taal be-la b zugu. Tʋʋmd kãng la b yagensa me na n tʋm zamaan woo zamaana. B ka tar b buud pʋɩɩr Israyɛl kamba sʋk ye.

²⁴M sẽn kõt-b yaa Israyɛl kamba sẽn yãkd b paoong pʋgẽ pʋɩɩr a ye piig fãa zug n kõt Soaala-Wẽndã. Yaa rẽ yĩng la m yet tɩ b kõn paam pʋɩɩr a to Israyɛl kamba nengẽ ye.»

²⁵Wẽnnaam yeela a Moyiiz:

²⁶«Ad-f sẽn na n wilg a Levi kambã: Yãmb me sã n wa reeg pʋɩɩr a ye piig zugã Israyɛl kamba nengẽ, y me na n kẽe be n yãk pʋɩɩr a ye piig zugu n kõ Soaala-Wẽnde.

²⁷Dẽ la yãmb na n kɩse wala neb a taaba sẽn kɩt alkam b sẽn pãb b zɛɛgẽ, bɩ rãam b bugsuntund sẽn kõt-ba.

²⁸Yãmb me na n yãka bũmb n kõ Soaala-Wẽnde y sẽn paamd Israyɛl kamba kũuna pʋgẽ.

²⁹B sẽn na n kõ-y bũmb ning fãa, y na kẽ be, wakat buud fãa, n yãk m pʋɩɩr sõngã n kõ-ma.

³⁰Le togs-b woto n paase: Y sã n kẽ kũun sõma wã pʋgẽ n yãk m dẽnna n kõ-ma, sẽn keta yaa yãmb n so, wala y saam-biis a taaba sẽn kelld b mens yĩnga, b pʋt la b tɩɩs sẽn kõt-ba: alkam, rãam la kaam.

³¹Yaa rẽ la y na n dɩ ne y zak rãmba, y sẽn dat zĩig ning fãa, tɩ woto la yãmb me yaood y sẽn deegd y tʋʋma yĩnga, sɛka roog tʋʋma yĩnga.

³²Y sẽn deng n kõ maam sẽn ya sõmbã m bas taal ne sẽn keta rɩɩbo, bũmb fãa be-la a zĩigẽ, y kõn tʋk y zugu bũmb sẽn tõe n wa ne y kũum ye.»