Read SEBR SÕNGO, 1998 Sõadga 19 Bible Online

Sõadga 19 - SEBR SÕNGO, 1998 bible

Sõadga 19

¹Soaala-Wẽnd yeela a Moyiiz ne a Aarõ:

²«Woto yaa noor m sẽn kõt yãmba: Wilg-y Israyɛl kamba tɩ b wa ne nag-zẽeg sẽn ka tar bãnde, naf sẽn ka tak wãka.

³Maan-kʋʋd a Elazar nengẽ la b na n tall-a n taase. B talld-a lame n yi sikã la yaa a Elazar nifẽ la b na n kodg-a.

⁴Maan-kʋʋd a Elazar yãkda naafa zɩɩm ne a nug-bila la a na n teesa sɛka roogo n mes zɩɩma, naoor a yopoe.

⁵B na n yõoga naafã a nifẽ; b na n yõoga gãongã, nemdã, zɩɩma la bĩndã.

⁶Maan-kʋʋda na n yãka kʋk raado, tɩɩg a ye sẽn tar yũ-noog vão-killi, n yãk monem n lob bugma sẽn dɩt naafã.

⁷Maan-kʋʋda pekda a futu la a so koom n yaool n leb sika pʋga la a na n paa ne rẽgd n ta zaabre.

⁸Sẽn yõoga naafa me pekda a futu, n so koom la a paada ne rẽgd n ta zaabre.

⁹[34†] Yaa yell sẽn ka be ned ninga zugu n na n wolg naafa tompɛglem la a na n zãaga sikã n bao zĩ-sõngo n bĩng-a be. B na n bĩng-a lame tɩ Israyɛl kamba kẽnd n yãkd n maand b ko-sõngo. Yaa sugr kosg maoong rũnga.

¹⁰Sẽn wolga naafa tompɛglma me pekda a futu, la a na n paa ne rẽgd n ta zaabre. Woto yaa noor a Israyɛl kamba sẽn na n deeg zamaan woo zamaana, f yaa tẽnga biig bɩ sãana.»

¹¹Soaala-Wẽnd yeela a Moyiiz: «Ned ning fãa sẽn sɩɩs kũum, kũum buud fãa, dogla yell a zug, dasem a yopoe yĩnga.

¹²A na n yɩlga a meng ne ko-sõngã, daar a tãab soaba, la a na n lebga yɩlemde, daar a yopoe soaba. Yɩlgra sã n ka yɩlg daar a tãab soabã, a soab ket n zĩi ne a rẽgdo, daar a yopoe soaba me.

¹³Sẽn na n sɩɩs-a kũum, sẽn na n sɩɩs-a ninsaal sẽn ki paalem, la a zãgs yɩlgre, yẽ soab rẽgemda Soaala roogo la b na n yiisa a soab Israyɛl buudẽ. B sã n ka mes-a ne ko-sõng fãa, a paada ne a rẽgdo, a ka yɩlg ye.

¹⁴Noora la woto: Ned sã n ki a roogẽ, sẽn kẽ-a rooga pʋg fãa, sẽn be-a rooga pʋg fãa, yaa rẽgd, dasem a yopoe yĩnga.

¹⁵Laok buud fãa noor sẽn ka page, sẽn ka loe ne gĩsga, lebgda rẽgdo.

¹⁶Ned sã n kood a pʋʋgo n lak kũum, n lak ned sẽn kodg ne sʋʋga, n lak ninsaal sẽn ki tɩ pa tũ ne sʋʋga, n lak a rɩgre, bɩ n sɩɩs yaoogo, yaa rasem a yopoe la a paad ne rẽgd.

¹⁷Nin kãng yɩlgr yĩnga b yãkda tompɛglem zĩig ning b sẽn yõog yel-wẽnd sugr kosg maoonga rũngã, tompɛglma ningda laok pʋga la b wat n saam-a-la ne kʋɩlg koom.

¹⁸Ned sẽn ka rẽgem n dɩkd tɩɩg a ye sẽn tar yũ-noog vão-killi n tʋm ko-sõngã n mes rooga la a lagdã, n mes neb niyns sẽn be a pʋgẽ, n mes ned ninga sẽn sɩɩs-a kõaba, ned b sẽn kʋ, ned sẽn ki a meng yĩnga, bɩ yaoogo.

¹⁹Ned ninga sẽn ka rẽgma n mesd sẽn dẽgma wã ne ko-sõngo, daar a tãab soaba la daar a yopoe soaba. A yopoe daara marsã la a lebgd yɩlemde. A na n peka a futu la a so koom, la zaabre yell doka a zugu.

²⁰La ned sã n dẽgem a menga, n yaool n ka yɩlge, b kʋʋda yẽ soaba, ka rẽ, a na n dẽgma Soaala roogo; b sã n ka mes-a ne ko-sõng fãa a yaa rẽgdo.

²¹No-kãnga yaa noor b sẽn na n tũ zamaan woo zamaana. Ned ninga sẽn dɩk-a ko-sõngã n mesã, yẽ soab me pekda a futu. Ko-sõnga sẽn sɩɩs a soab paada ne a rẽgd n ta zaabre.

²²Ned sã n dẽgme, a sẽn sɩɩs bũmb ning fãa lebgda rẽgdo, la bõn-kãng me rẽgda rẽgemda a sɩɩsda n ta zĩ-sobdo.»