Read SEBR SÕNGO, 1998 Sõadga 20 Bible Online

Sõadga 20 - SEBR SÕNGO, 1998 bible

Sõadga 20

¹Yaa pipi kiuugã la a Israyɛl kamba ta Sin zĩ-peen-daagẽ. B wẽ b sika Kadɛs. Be la a Miriyam maan kaalem la be me la b mum-a.

²Koom da ka be sẽn yũud ye tɩ Israyɛl kamba yik zabr ne a Moyiiz la a Aarõ.

³Neba ra baooda a Moyiiz noore: b ra yetame: «Kato! Bõe tɩ d ka naag d saam-biisã n ki Soaala-Wẽnd taoore?

⁴Bõe tɩ yãmb tall Soaala-Wẽnd kamba n wa zĩ-peen-daagẽ ka tɩ d na n ki, tõnd ne d rũmsi!

⁵Bõe tɩ y yiis-d Ezipt tẽnga n tall n wa zĩ wẽngẽ ka? Ka zĩig sẽn tõe n bʋd kood ye, ka tõe n sel kankanga bɩ bugsuntungu, bɩ tɩɩg ninga sẽn womd wa poaloanga ye. Ko yũudem meng ka ye.»

⁶A Moyiiz ne a Aarõ basa nebã n dig sɛka roogẽ. B wõgemdame n kɩ b neng tẽnga la Soaala-Wẽnd ziira bui-b lame.

⁷Soaala-Wẽnd yeela a Moyiiz:

⁸«Dɩk f rasaarã, la yi ne a Aarõ, n tigim nebã. Gom ne pĩiga bãmb fãa gill taoore la pĩiga na kõ-y koom tɩ y yũ. F na n kɩtame tɩ pĩiga pusg koom tɩ f kõ neba tɩ b yũ, bãmb ne b rũmsi.»

⁹A Moyiiz rɩka a rasaara sẽn da rɩg Soaala-Wẽnd taoorã la a maana b sẽn yeel-a t'a maan bũmb ningã.

¹⁰A Moyiiz ne a Aarõ tigma neba pĩig sɛɛgẽ n yeel-ba: «Kelg-y wɛ, tõatbã! D tõeeme tɩ pĩiga pusg koom bɩ?»

¹¹A Moyiiz zẽka a nugu, la ne a rasaarã a wẽe pĩiga naoor a yiibu. Kooma pusgame la neba ne b rũmsa paamame n yũ.

¹²Soaala-Wẽnd yeela a Moyiiz ne a Aarõ: «Yãmb pa tẽ maam ye, y ka maan tɩ Israyɛl kils m yʋʋra t'a sãd moog ye. Rẽ yĩngã ka yãmb n na n tall buudã n kẽes m sẽn kãab-a tẽng ninga pʋg ye.»

¹³Dẽ me yĩng la kooma sẽn pusg zĩig ninga pʋd tɩ Meriba, tɩ zabr koom, tɩ zĩ-kãnga a Israyɛl bao zabr ne Soaala-Wẽnde la Soaala-Wẽnd tũ rẽ n puk b sõmblem.

¹⁴A Moyiiz zĩnda Kadɛs n tʋm neb Edom dĩma nengẽ tɩ b tɩ yeel-a: «F saam-biig, a Israyɛl, koɛɛg la woto: Fo mii yell woo yelle d buuda sẽn sege.

¹⁵D yaab rãmb waa n kẽe Ezipt tɩ d pa be n kaoose. Ezipt rãmb ka zã-d neer ye, tõnd la d yaab rãmba.

¹⁶D sẽn kelem Soaala-Wẽnde, b wʋma d koɛɛga la b tʋma b malɛk t'a wa yiis-d Ezipt tẽnga. Rũnna wã yaa Kadɛs la d be, fo toaagẽ.

¹⁷Bas-d tɩ d tũ f tẽngã n looge! D kõn bʋdg f pʋtẽ, d kõn bʋdg f bugsuntundẽ ye. D kõn yũ f bulsa kom ye. So-kõodra la d na n tũ n ka bʋdg goabga, n ka bʋdg rɩtgo, al n wa yi f soolmẽ.»

¹⁸La ad-a Edom sẽn leoke: «Da saag n kẽ m soolma pʋg ye, ka rẽ m na yiis m tãb-biisa tɩ b seg foo.»

¹⁹Israyɛl kamba taas-a-la gomd kãnga: «Yaa so-kõodra bal la d na n dɩke, la d sã n sɩɩs f koom menga, d na bao ligdi n yao-fo. D sẽn kot bũmb ning bala, yaa d paam sor n loog ne nao.»

²⁰T'a Edom yeele: «F kõn loog ka ye.» A Edom yi n sega a Israyɛl ne neb ka tɛka la a wilga a nug pãnga.

²¹A Edom zãgsame tɩ b kõn tũ a tẽngẽ ye t'a Israyɛl na n kong n zãag.

²²Israyɛl kamba sẽn yi Kadɛs, yaa a Or tãms la b rʋ yã.

²³Yaa a Edom toaagẽ la Soaala-Wẽnd yeel a Moyiiz la a Aarõ:

²⁴«A Aarõ na n loogame n tɩ sak a saam-dãmba. A pa na n paam n kẽ tẽng ning m sẽn kõt a Israyɛl kamba ye, la rẽ yaa y sẽn pa reeg m gomdã Meriba.

²⁵Tall a Aarõ ne a biiga, a Elazar, tɩ y rʋ Or tãnga.

²⁶Yees a Aarõ futã n yeelg a Elazar. Rẽ poore, a na n loogame, be la a na n ki.»

²⁷A Moyiiz reega Soaala-Wẽnd noore la Israyɛl kamba fãa nifẽ a rʋʋ Or tãnga.

²⁸[35†] A Moyiiz rɩka a Aarõ futã n yeelg a Elazar. Yaa tãnga zug la a Aarõ tɩ sak a saam-dãmba, t'a Moyiiz ne a Elazar na n lɛɛg n sig tãngã.

²⁹Israyɛl kamba bãngame t'a Aarõ kiime la b yãba a kʋʋr kiuug tõre.