Read SEBR SÕNGO, 1998 Sõadga 21 Bible Online

Sõadga 21 - SEBR SÕNGO, 1998 bible

Sõadga 21

¹ [36†] Kanaã rãmba da tara b dĩm sẽn kẽed Negɛb la sẽn boond tɩ Arad. Bãmb wʋmame tɩ Israyɛl kamba dɩka Atarim dãmba sor n watẽ. B taka zabr ne a Israyɛl kamba, n yõg wʋsg n kẽes roogo.

²Dẽ me la a Israyɛl pʋlem Soaala-Wẽnd woto: «Yãmb sã n dɩk buud kãnga n sagl d nugẽ, m na pʋlem b tẽnga beedo, n sãam-a zãnga.»

³Soaala-Wẽnd deega a Israyɛl kosgo la a tõoga Kanaã rãmba n kãab b tẽnga beedo. Tẽn-kãng pʋdame tɩ Orma, raboogo.

⁴ [37†] Israyɛl kamba yi Or tãnga n dɩk sor ning sẽn tees Rudum mogre, sẽn na yɩlẽ n gil Edom. Sor zugu, neba le waa n konga raoodo.

⁵B sɩngame n na n wɩd Soaala-Wẽnd la a Moyiiz. B ra gomda woto: «Pʋs n yaa bõe yĩng la y yiis tõnd Ezipt tẽnga? Ka y sẽn dat tɩ d pa zĩ-peen-daagẽ wã bal laa! Bur ka be ka, koom ka be ka la d yam yaa n yii ne nimbãan-dɩɩbã!»

⁶[38†] Soaala-Wẽnd tʋma wag-toose sẽn sɩng neba kɛɛbo la wʋsg sɩd kiime.

⁷Dẽ me la Israyɛl kamb waa n yãend a Moyiiz n yeel-a: «D maana wẽnga n wɩd foo la d wɩd Soaala-Wẽnde. Yõk sɛɛg d yĩnga tɩ wiisa zãag ne do.» T'a Moyiiz na n yõk sɛɛga,

⁸tɩ Soaala-Wẽnd na n yeele: «Naan wag-toaag ne zũudu n dɩk-a n yagl raoogo; waaf sẽn kɛ a soab t'a roog n ges zũud waafã, yẽ soab põsdame.»

⁹[39†] A Moyiiz kuda waaf ne zũudu n yaglg-a raoogo la waaf sã n da kɛ ned t'a roog n ges zũud waafã, a ra põsdame.

¹⁰Israyɛl kamba le sɩnga b kẽna n wa wẽ b sik Obot.

¹¹B sẽn yi Obot b waa n yalsa Iye-Abarim, tẽn-kãng tota ne Moab, yaang sẽnẽ.

¹²B le yii be n tɩ yals Zerɛd kʋɩl-bɛɛga noor.

¹³B sẽn yi be b tɩ wẽe sik Arno kʋɩlga rʋʋnde. Kʋɩl-kãng yita Amoritsa tẽnga n pãrgd we-raoogã la yẽ la Moabitsa ne Amoritsa toaaga.

¹⁴Dẽ la b sẽn wilg Soaala-Wẽnd zaba sebrẽ: Waeb sẽn be Sufa ne a kʋɩlsa sẽn zoet ne bʋʋrã,

¹⁵Arno ne a gõnegõtã sẽn sigd Ar be la a yegd Moab toaaga.

¹⁶Israyɛl kamb yii be n ta Beɛr. Beɛr yaa koom zĩiga. Yaa be la Soaala-Wẽnd da yeel a Moyiiz: «Tigim neba tɩ m kõ-b koom.»

¹⁷Yɩɩn-kãnga la a Israyɛl da pʋd yã: Bulga, tãoos f koom! Kils-y bõn-bãnde, neba!

¹⁸Buuda kãsem-dãmba, buuda na-komse tuka b bulga. La b tuk-a-la ne b rasaba, ne b naam doɛ. Israyɛl kamba waa n yii be n tees Matana,

¹⁹n yi Matana n dig Naaliyɛl, n yi be n dig Bamot

²⁰n yi Bamot n ta Moab bãg-faaga. Zĩ-kãnga la Pisga tãnga zao a naam zaoore n get we-raooga zãnga.

²¹A Israyɛl tʋmame tɩ b tɩ yeel a Siyõ, Amoritsa dĩma:

²²«Kõ-m sor tɩ m tũ f tẽngã n looge. D kõn bʋdg f pʋtẽ, d kõn bʋdg f bugsuntundẽ ye, d kõn yũ f buls koom ye. F soolma pʋga, d sor yaa so yɛnga, yaa so kõodrã.»

²³A Siyõ pa sak tɩ b pãrg a soolma ye. A tigma a neba tɩ b yii n seg a Israyɛl zĩ-peen-daagẽ. Yaa Yasa la b seg taaba.

²⁴A Israyɛl zẽk a sʋʋga la a wẽe n deega tẽngã, sẽn sɩng Arno kʋɩlga n tãag Yabok, n tãag Amonitsa toaaga sẽn tong ne tãnsoaben-doto.

²⁵A Israyɛl wẽ b tẽnsa fãa n deeg n kẽedẽ. B kẽe Esbõ ne a tẽn-toosã.

²⁶A Esbõ da yaa a Siyõ, Amoritsa dĩma na-tẽnga. A Siyõ me n da zab ne Moab dĩma n deeg a soolma zãnga n tãag Arno kʋɩlga.

²⁷Ad-d sẽn karemd yʋʋmba sɛbẽ: Wa-y tɩ d leb Esbõ! D leb n tɩ yik a raboodo d sõng tɩ Esbõ leb n yɩ tẽnga!

²⁸Bugum n widig Esbõ, Bug-walem n zomb dĩma Siyõ, bug kãng n dɩ Ar sẽn ti Moab tẽn-peelmẽ, sẽn zao a naam zaoor Arno tãms zutu.

²⁹ [40†] Bʋk woo Moab, bʋko! Y yell sãama zãnga, yãmb fãa sẽn waoogd a Kemos! Kom-bɩɩb lebga rabɛɛmba n tõe zoeese. Kom-pugli lebga yem-pogse, Amoritsa dĩm a Siyõ yem-pogse.

³⁰D pɛɛma po-la b gãndo, D kʋ-b-la zãnga, Esbõ n tãag Dibõ, tõnd varga fãa n ta Nofa, tõnd pɩɩga fãa n ta Madaba.

³¹A Israyɛl tɩ kẽe Amoritsa tẽnga.

³²A Moyiiz yiisa neb tɩ b kaag Yasɛr tẽnga la a tãb-biisa pãba a tẽn-toosã n deeg la b riga Amoritsa sẽn da kẽed be wã.

³³Israyɛl kamb waa n teema sore; Bazã sor la b rɩk yã la Bazã rãmb dĩm a Og, yẽ ne a neba gilli, yii n seg-b lame n kaoog zabr Edreyi.

³⁴Soaala-Wẽnd yeela a Moyiiz: «Da zoe rabeem ye, m dɩk-a lame n sagl f nugẽ, yẽ ne a neba la a tẽngã. Maan ne ba wala f sẽn maan ne a Siyõ, Amoritsa dĩm sẽn da kẽed Esbõ.»

³⁵A Israyɛl tõog-b lame, yẽ ne a kamba la a soolem. Nin-vɩɩg ka kees ye, tẽnga fãa lʋɩ-la b nugẽ.