Read SEBR SÕNGO, 1998 Sõadga 25 Bible Online

Sõadga 25 - SEBR SÕNGO, 1998 bible

Sõadga 25

¹A Israyɛl wẽe sik Sitim. Neba yika yoob ne Moab kom-pugli.

²Moab kom-pugli wã boola Israyɛl kambã b wẽn-naandsa maanda kʋʋb zĩigẽ. Neba kẽngame, b tɩ rɩɩme la b kɩɩ rũmdi wẽn-faada taoore.

³A Israyɛl sakame n tɩ kẽ Baal ning b sẽn waoogd Peor la b yika Soaala-Wẽnd sũuri.

⁴Soaala-Wẽnd yeela a Moyiiz: «Yõg buuda taoor dãmba la luul-b Wẽnd taoor zĩig sã n yẽege la woto Soaala sũ-puura na zãag ne b nebã.»

⁵A Moyiiz yeela bʋ-kaoodba: «Bɩ ned kam fãa kʋ a saka neb niyns fãa sẽn tɩ waoog a Baal, Peor tẽnga!»

⁶Sak a ye ned n waa n tall Madiã pag n wa a saam-biisa sʋka. A waa ne-a, a Moyiiz la Israyɛl kamba fãa nifẽ. Dẽ tɩ b ra ket n zĩi n yãbda, sɛka rooga noore.

⁷A sẽn yãend paga ne raoã, maan-kʋʋda Pinas, a Elazar biig la a Aarõ yagenga, yika neba sʋka. A rɩka a kãnde,

⁸n bʋʋg-ba b sẽn tɩ kẽ zĩig ningã n wẽneg n be raoã ne Madiã poaka kõsb ne kãndã, tɩ tẽn-kũuma me wẽneg n yaase.

⁹Tẽn-kũuma sẽn loog ne b rãmba sõor ta tus pisi la a naase.

¹⁰Wẽnnaam goma ne a Moyiiz:

¹¹«A Elazar biig a Pinas, maan-kʋʋd kãsenga, sigsa m sũura ne a Israyɛl. A pa sak tɩ ned a to reeg m zĩig bãmb sʋk ye. Yaa rẽ yĩng la m pa sak tɩ m sũura fudg tɩ m kʋ-b zãng ye.

¹²Yaa rẽ me yĩng la m yõg laafi zood ne-a.

¹³M yõga zood ne yẽ la a yagense. Bãmb n na n soog maan-kʋʋr naam yʋʋm tõt sɛɛbo. A pa sak tɩ ned a to reeg a Wẽnda zĩig ye la a maana a sẽn tog n maan tɩ Israyɛl kamb paam sugri.»

¹⁴Israyɛl biigã b sẽn naag n kʋ ne Madiã pagã, ra boondame tɩ Zimri. A ba ra boondame tɩ Salu, a Simeõ roog kãsem a ye.

¹⁵Sã n ya pagã, Madiã pagã, a ra boondame t'a Kozbi. A ba la a Sur, zak a ye kãsma, a Madiã buudẽ.

¹⁶Wẽnd waa n yeela a Moyiiz:

¹⁷«Kaoog-y zabr ne Madiã rãmba n dig-ba.

¹⁸Dig-y-b tɩ b bao-la y noore la b zãmb-y-la sẽn pa paoode ne Peor wẽn-naanda waoogre la b sãama y yʋʋr ne b taoor soab a ye bi-pugl a Kozbi sẽn ki baraare.»

¹⁹Tẽn-kũuma looga a loogre.