Read SEBR SÕNGO, 1998 Sõadga 28 Bible Online

Sõadga 28 - SEBR SÕNGO, 1998 bible

Sõadga 28

¹Soaala-Wẽnd goma ne a Moyiiz:

²t'a yeel Israyɛl kamba woto: «Modg-y la y ra bas tɩ wakata looge, tɩ y ka wa ne m kũuna ye. Ma me rɩɩb la bãmba la b yũ-nooga noogda m sũuri.

³Yeel-ba: ad kũun niyns y sẽn na kõ Soaala-Wẽnd beoog fãa: yaa yʋʋmd yend pe-bi a yiibu sẽn ka tar bãnde, yũ-noog maoong yĩnga.

⁴Kõta pe-bil a ye yibeoogo, a to zĩ-sobdo.

⁵Tũnugda ne zom wamde sẽn nag ne kaam lengre, oliv sẽn toos kaam lengre.

⁶Yaa yũ-noog maoong kãnga la b sẽn da kʋʋd Sinayi tãnga zugu beoog sẽn vẽeg fãa, rɩɩb ne yũ-noog sẽn maagd Soaala-Wẽnd sũuri.

⁷Yibeoog pe-bila sẽn tũnugd ne rãam ninga Soaala-Wẽnd yĩnga, sɛka roogẽ, yaa rã-toos wamde.

⁸Pe-bil a yiib soaba kʋʋda zĩ-sobdo. Zoma ne rãama sẽn tũnugdã ka teemd ye. Rɩɩb kãng n tar yũ-noogo n sigsd Soaala-Wẽnd sũuri.

⁹Vʋʋsg daare b wata ne yʋʋmd yend pe-bi a yiibu sẽn ka tar bãnde. Maoonga tũnugda ne zom wam a yi sẽn nag ne kaam leens a yi n paas rãama.

¹⁰Dẽ la vʋʋsg daar yũ-noog maoongã la a wat n paasda beoog-beoog fãa maoongã ne a bõn-tũnugdsã.

¹¹Kiuug fãa sɩngrẽ, yaa yũ-noog maoong la y na n kʋ ne lols a yiibu, pe-raoog a ye la yʋʋmd yɛng pe-bi a yopoe la fãa yɩta rũms sẽn ka tar bãnde.

¹²Loalg fãa tũnugda ne zom wam a tã sẽn nag ne kaam. Pe-raooga tũnugda ne zom wam a yi sẽn nag ne kaam.

¹³Pe-bil fãa tũnugda ne zom wamde sẽn nag ne kaam. Yaa maoong sẽn tar yũ-noog n sigsd Wẽnd sũuri, rɩɩb sẽn noom-ba.

¹⁴Maanda sẽn na n tũnug ne bũmb niynsã la woto: loalga yaa rãam wamd pogbre, pe-raooga yaa wũmbli a yiibu, pe-bil yaa wũmbla. Woto la ki-paal fãa ne a kũuni tɩ zĩig liki.

¹⁵Ka yĩmd yel-wẽnd sugr kosg maoonga boɛɛg ye; yẽ yaa beoog-beoog fãa bũmbu, la tũnugda ne rãam.

¹⁶ [55†] Pak kibsa maanda Soaala-Wẽnd waoogr yĩnga, pipi kiuugã, piig la a naas raare.

¹⁷Kiu-kãng piig la a nu raare yaa kibsa. Rasem a yopoe pʋgẽ, b na n dɩ bur sẽn ka lob bɩll ye.

¹⁸Pipi raara na n yɩɩ tig-raag Soaala-Wẽnd yĩnga. Baraare tʋʋmd ka tʋmd ye.

¹⁹Ad-y sẽn na n wa ne bũmb ninga, yũ-noog maoong yĩnga: lols a yiibu, pe-raoogo, la yʋʋmd yɛng pe-bi a yopoe. Fãa yɩta rũms sẽn ka tar bãnd ye.

²⁰Tũnugda ne zom sẽn nag ne kaam. Loalg yaa zom wam a tã, pe-raoog yaa zom wam a yi.

²¹Pe-bi a yopoe wã tũnugda ne zom wũmbl rũng fãa.

²²Paasda boɛɛg y yel-wẽna sugr kosg yĩnga.

²³Dẽ fãa wat n paasa ne yibeoog fãa maoonga sẽn ka tõe n viigã.

²⁴Beoog fãa, rasem a yopoe pʋgẽ, y na n waa ne Soaala-Wẽnd dɩɩbo, rɩɩb sẽn tar yũ-noog n sigsd b sũuri. Y na n naaga ne beoog fãa maoongã la a rãama.

²⁵[56†] Daar a yopoe soaba y na tigim taab Soaala-Wẽnd taoore; baraare y kõn tʋm tʋʋmd ye.

²⁶Kooda rɩgsg kibsa raare, y sã n na n wa kõ Soaala-Wẽnd y kood rẽemsã, y na n le tigma taab Wẽnd taoore. Baraare y kõn tʋm tʋʋmd ye.

²⁷Y na kʋ yũ-noog maoongo n sigs Wẽnd sũuri: lols a yi, pe-raoogo la yʋʋmd yɛng pe-bi a yopoe.

²⁸Maanda tũnugda ne zom sẽn nag ne kaam. Loalg fãa yaa zom wam a tã, pe-raooga yaa zom wam a yi,

²⁹pe-bil fãa yaa zom wũmbla.

³⁰Paasda boɛɛg sẽn na n kʋ y yel-wẽna sugr kosg yĩnga.

³¹[57†] Rẽ fãa wat n paasa beoog-beoog fãa maoonga la a bõn-tũnugdsã. Rũng fãa yaa rũng sẽn ka tar bãnde.