Read SEBR SÕNGO, 1998 Sõadga 32 Bible Online

Sõadga 32 - SEBR SÕNGO, 1998 bible

Sõadga 32

¹A Rubẽ la a Gad kamba rũms la b wuba ra yaa wʋsgo. B gesa Yasɛr la Galaad tẽnsã la b yãeeme tɩ yaa zĩis sẽn tog ne gʋʋlgo.

²A Rubẽ la a Gad kamba waa n yãenda a Moyiiz la maan-kʋʋd a Elazar la taoor dãmbã.

³B yeel-b lame: «Ges-y Atarot tẽnga, Dibõ, Yasɛr, Nimra, Esbõ, Eleale, Sevam, Nebo la Bal-Meõ.

⁴Yaa tẽns Soaala-Wẽnd sẽn wẽ n kõ a Israyɛl la sẽn tog ne rũms gʋʋlgo la y yemsa tara rũms wʋsgo.

⁵Y sã n dat tõnd ne neere bɩ y rɩk-ba n kõ y yemsã wala b zu-noog pʋɩɩre. Da kos tõnd tɩ d rʋʋg Zʋrdẽ kʋɩlg ye.»

⁶A Moyiiz yeela a Gad la Rubẽ kamba: «Wao! Y saam-biisa na n boba zabre tɩ yãmb yaool n paad ka wɛ!

⁷Bõe tɩ y na n woog Israyɛl kamba raoodo, n woog b raood tɩ b zãgs tẽnga kõom, n zãgs tɩ b kõn kẽ tẽng ning Soaala-Wẽnd sẽn kãabd bãmbã?

⁸Yaa woto la y ba rãmba maan yã, m sẽn waa n tʋm-b Kadɛs-Barnea tɩ b tɩ kaag tẽngã n bãng a nengã.

⁹[61†] B kẽn n ta Eskol bãg-faaga n kaag tẽngã la b ka gom n kõ Israyɛl kamba raood ye, b ka pirs-b ye; wa-y tɩ d zoe n deng taab kãabga tẽngẽ wã, ka zĩnd ye.

¹⁰Dẽ me la Soaala-Wẽnd sũur puug baraare

¹¹la b kãaba neb niyns fãa yʋʋm sẽn ta pisi bɩ yɩɩd rẽnna Ezipt yiiba wakatã, tɩ bãmb nin-yend meng naoor kõn tabg tẽnga ye, tẽng ning b sẽn da yaool n kãab a Abraam, a Izaak la a Zakoob. B kãab-b-la boto b sẽn zãgs tẽeba yĩnga.

¹²Sẽn na n tõog n yãend-b kãabg tẽngã na n yɩ-la a Yefune biig a Kalɛb, Kenizitga, la a Nun biig a Zozuwe, tɩ bãmb pʋga Soaalã n ka sãmb ye.

¹³[62†] Wẽnd sũur puuga ne a Israyɛl tɩ b kɩt t'a gilim zĩ-peen-daagẽ wã yʋʋm pis-naase al tɩ sẽn ka tũ b Soaala raaba fãa wa looge.

¹⁴La yãmba, kɩɩsdb buudu, y reega y ba rãmb zĩiga n na n maan tɩ Soaala-Wẽnd sũur yik ne a Israyɛl.

¹⁵Y sã n zãgs kẽnde, yaa a Israyɛl tõr n na n kaoos zĩ-peen-daagẽ ka la yaa buuda zãng wãab la y segenda.»

¹⁶A Gad la a Rubẽ kamba le kolga a Moyiiz n yeel-a: «D na n mee wuba d piisa yĩnga, n me rot d kamb yĩnga.

¹⁷La tõnd n na n dɩka d zab-teedo n lʋɩ Israyɛl kamba taoore, al tɩ b wa kẽ b soolmẽ. D kamba na n paa ka, tãnsoaben-dot pʋsẽ n tɩlg bɛɛbã sẽn gũbgã.

¹⁸D ka na n leb n lɛɛg n wa d rotẽ tɩ Israyɛl kamba fãa ka kẽ b soolmẽ ye.

¹⁹Tõnd pʋɩɩr kõn naag ne bãmb rẽnna, Zʋrdẽ rʋʋnd ye tɩ tõnd buud pʋɩɩr yaa ka, ka Zʋrdẽ rʋʋnd ye.»

²⁰A Moyiiz leok-b lame: «Y sã n maan wa y sẽn togsã, y sã n bob zabre Wẽnd taoore,

²¹y tãb-biisa fãa sã n dʋʋg Zʋrdẽ kʋɩlga n dig bɛɛba zãnga y taoore,

²²y sã n yaas tɩ bɛɛba fãa kong pãnga tɩ y yaool n leb y tẽngẽ, y kõn dɩ Wẽnd la Israyɛl taal ye, la y sẽn dat n kẽ tẽng ninga na yɩ Soaala-Wẽnd sẽn kõ yãmba.

²³La y sã n ka maan boto, yaa Soaala-Wẽnd la y na n beege, yaa bãmb taal la y na n paame.

²⁴Me-y tẽns n kẽes y kamba, me-y wuba y piis yĩnga, la pids-y pʋleng ning y sẽn pʋlma.»

²⁵A Gad la a Rubẽ kamba yeela a Moyiiz: «D na n tũu yãmb noore.

²⁶D pagb la d kamb la d rũmsa na n paa ka, Galaad tẽnsẽ,

²⁷la tõnd fãa na n boba zabre ne Wẽnd sõngre, wala y sẽn date.»

²⁸A Moyiiz yãenda koɛɛg n leok maan-kʋʋd a Elazar la a Nun biig a Zozuwe la a Israyɛl kãsem-dãmbã.

²⁹A yeel-b lame: «A Gad la a Rubẽ kamba sã n dʋʋg Zʋrdẽ kʋɩlga ne yãmba, b sã n bob Soaala taoore n na n tɩ zabe, tẽnga sã n wa lebg y soolem, y na kõ-b Galaad tẽng wala b buud pʋɩɩre.

³⁰La b sã n ka bob zabr ne yãmba, yɩta Kanaã tẽng la bãmb me na n paam b buud pʋɩɩr yãmb sʋka.»

³¹A Gad la a Rubẽ kamba leokame: «D na n maana Soaala-Wẽnd sẽn yeel-d tɩ d maan bũmb ningã.

³²[63†] Tõnd na n boba Wẽnd taoore. D na n saaga Kanaã tẽnga n zabe, la d buuda pʋɩɩr yẽ bee Zʋrdẽ fool ka.»

³³A Moyiiz kõ-la a Gad la Rubẽ kamba, n paas a Zozɛf biig a Manase bogr a ye wã, Amoritsa dĩma, a Siyõ, soolem, la Bazã dĩma, a Og, soolem. A kõ-b-la vẽenema, dota la pʋtã la tẽn-toosã.

³⁴A Gad kamba le maneg n mee Dibõ, Atarot, Arowɛr,

³⁵Atrot-Sofã, Yasɛr, Zogbaa,

³⁶Bɛt-Nimra la Bɛt-Arã. B mee tẽns sẽn tõe n zab n fãag b mense, b mee wuba b piisa yĩnga.

³⁷A Rubẽ kamba le maneg n mee Esbõ, Eleale, Kiriyatayim,

³⁸Nebo, Baal-Meõ, la tẽn bãmb yʋy tekame. B mee Sibma me. Yʋ paal la b bao n kõ tẽns niyns b sẽn le maneg n me wã.

³⁹A Manase biig a Makir kẽnga Galaad n dig Amoritsã n deeg b tẽnse.

⁴⁰A Moyiiz kõ-la a Makir, a Manase biiga, Galaad tẽn-peelem t'a me n kẽ.

⁴¹A Yayir, a Manase biig a to, tɩ zab n deega b pʋt-rotã la a bool-b lame t'a Yayir pʋt-roto.

⁴²A Nova tɩ zab n deega Kenat la a pʋd-a-la a meng yʋʋre: Nova.