Read SEBR SÕNGO, 1998 Sõadga 34 Bible Online

Sõadga 34 - SEBR SÕNGO, 1998 bible

Sõadga 34

¹Soaala-Wẽnd goma ne a Moyiiz woto:

²«Kõ Israyɛl kamba noy-kãensã: Y sã n kẽ Kanaã tẽnga, ad-y sẽn na n sooge, ad-y y tẽnga ne a toose.

³Nug rɩtg toaaga yaa Sin we-raoogo, n yegd Edom. Yaanga toaaga sɩngda Yamsem mogrã sɛtmẽ.

⁴Toaaga na n gõdga Akrabim kunkubrã, namsa kunkubrã n tees Sin, n tũud Kadɛs-Barnea nug rɩtgo n tɩ yi be n tees Asar-Adar n ta Asmo.

⁵Sã n ta Asmo toaaga kɩllda bilfu n tees Ezipt kʋɩlga, n wat Tẽnsʋk mogrã.

⁶Nin-taoore toaaga yaa Tẽnsʋk mogrã.

⁷Nug goabga toaaga sɩngda Tẽnsʋk mogrã n tees Or Tãnga.

⁸N yi Or Tãnga n digd Lebo-Amat, n tat Sedad.

⁹N yi be n tees Zifrõ, n tat Asar-Eyinan. Nug goabg toaaga la rẽ.

¹⁰Yaang toaaga yita Asar-Eyinan n tees Sefã.

¹¹N tɩ yi be n sig Ribla, Ayin yaanga, n ket n sigd n wa tãag Kineret yaanga.

¹²N ket n sigd n wa tãag Zʋrdẽ kʋɩlga n digd Yamsem mogre. Woto n na yɩɩ y tẽnga ne a toose.»

¹³A Moyiiz le yeela Israyɛl kamba woto: «Tẽngã y sẽn na n poees n pʋɩ wã, Soaala-Wẽnd sẽn yet tɩ b pʋɩ ne buuda wɛ wã la a Manase bogr a ye wã me la woto.

¹⁴Y tẽrame t'a Rubẽ ne a kamba, a Gad ne a kamba la a Manase bogr a to wã zoe n deega b pʋɩɩre.

¹⁵[67†] Sɩda, a Gad la a Rubẽ la a Manase bogra reega b pʋɩɩr Zʋrdẽ kʋɩlga noor, Zeriko yegende. Bãmb pa rʋʋgd Zʋrdẽ ye.»

¹⁶Wẽnnaam goma ne a Moyiiz:

¹⁷«Ad neb niyns sẽn na n sõng-y tɩ y pʋɩ tẽnga ne taaba: Maan-kʋʋd a Elazar, la a Nun biig a Zozuwe.

¹⁸Y na n paasa sak fãa kãsem a ye t'a sõng yã.

¹⁹Ad nin-bãmb yʋy: A Zɩɩda roogẽ, a Yefune biig a Kalɛb.

²⁰A Simeõ roogẽ, a Amiyud biig a Semuwɛl.

²¹A Bẽnzame roogẽ, a Kislõ biig a Elidad.

²²A Dã roogẽ, a Zogli biig a Buki.

²³A Zozɛf biig a Manase roogẽ, a Efod biig a Aniyɛl.

²⁴A Zozɛf biig a Efrayim roogẽ, a Siftã biig a Kemuwɛl.

²⁵A Zabulõ roogẽ, a Parnak biig a Elisafã.

²⁶A Isakar roogẽ, a Azã biig a Paltiyɛl.

²⁷A Asɛr roogẽ, a Selomi biig a Ayiwud;

²⁸A Neftali roogẽ, a Amiyud biig a Pedayɛl.»

²⁹Yaa nin-bãmba la Soaala-Wẽnd kõ noor tɩ b sõng n pʋɩ Kanaã tẽnga ne a Israyɛl kambã.