Read SEBR SÕNGO, 1998 Sõadga 35 Bible Online

Sõadga 35 - SEBR SÕNGO, 1998 bible

Sõadga 35

¹Soaala-Wẽnd goma woto ne a Moyiiz Moab pʋ-weesẽ, Zʋrdẽ kʋɩlg noore, Zeriko yegende:

²«Togs Israyɛl kamba tɩ b kẽ b pʋɩɩrẽ n yãk vẽenem n kõ Levitsa tɩ b me n kẽ. Y na n kõ-b-la pʋt me n yegle.

³B na n tii rot n kẽedẽ; pʋta yaa b rũmsa wãbneg yĩnga, b rũm-bɛd la rũm-bõones yĩnga.

⁴Vẽenema Levitsa sẽn na n deeg b pʋt yĩnga la rũmsa wãbneg yĩnga na n taka kãntɩɩs tusri n gilg tẽngã.

⁵Woto tẽnga la vẽenema sẽn bas n gilgã magda kãntɩɩs tus a yi goabg la rɩtgo, kãntɩɩs tus a yi yaang la taoore.

⁶Yaa tẽns a yoob la y na n kõ Levitsã tɩ b lebg soondg tẽnse. Na n yalsame tɩ nin-kʋʋd tõe n wa kẽe be n põse. Y wat n wa paasa tẽns pis-naas la a yiibu, Levitsa mens yĩnga.

⁷Dɩlla sã n sõd b tẽnsa zãnga yaa pis-naas la a nii.

⁸[68†] Tẽnsã Israyɛl kamba sẽn na n yãk n kõ Levitsa sõor tũuda ne bãmb meng rooga pʋɩɩr bedrem. Yãkda wʋsg bi-bilfu, n kõ Levitsã f meng pʋɩɩr sã n yaa wʋsg bɩ bilfu.»

⁹Soaala-Wẽnd yeela a Moyiiz:

¹⁰«Wilg Israyɛl kamba woto: Y sã n wa rʋʋg Zʋrdẽ kʋɩlgã n na kẽ Kanaã,

¹¹y na yãk tẽnse sẽn na n yɩ soondg tẽnse. Ned sã n yĩd n kʋ a to, a tõe n wa soonda be.

¹²Be la y na n kẽ n tɩlg sẽn baooda n na n kʋ yãmb n dok a sũuri. Nin-kʋʋd pa kʋʋd n lebse tɩ b pa reng n bʋ a bʋʋdo buuda taoor ye.

¹³Tẽnsa sẽn na n yãk wa soondg tẽnsã na n yɩɩ bãmb b yoobe,

¹⁴a tãab Kanaã tẽnga, a tãab sẽn ka rʋʋg-b Zʋrdẽ kʋɩlga yĩnga.

¹⁵Tẽn-bãmb yaa tẽnga dãmba, bɩ sẽn noka a Israyɛl buudu bɩ sãan loagdga yĩnga. Ned ninga fãa sẽn kʋ a to ne yĩdgu tõe n wa soonda be.

¹⁶Ned sã n wẽ a to ne kut n kʋ, a soab yaa nin-kʋʋda. La b na n kʋʋ yẽnda me.

¹⁷Sã n yaa kugr sẽn tõe n kʋ ned la a soaba lobgre tɩ tũ ne yõore, yẽ soab yaa nin-kʋʋda la b na n kʋʋ yẽnda me.

¹⁸Sã n yaa raoog sẽn tõe n kʋ ned la a soab lobgre tɩ tũ ne yõore, yẽ soab yaa nin-kʋʋda la b na n kʋʋ yẽnda me.

¹⁹B sẽn kʋ a soaba sã n tar ned sẽn tõe n daag zɩɩm n lebs zɩɩma sẽn daagã, nin-kãng n kʋʋd nin-kʋʋdã.

²⁰Ned sã n wẽ a sẽn kis a soaba, bɩ a sã n lobg-a-la ne bũmb n kʋ pʋ-toogo,

²¹a sã n maand beem ne a, n wẽ-a ne nug gilgu n kʋ, b kʋʋda yẽnd soaba t'a yaa nin-kʋʋda. Ned ninga sẽn tõe n daag zɩɩm n dol zɩɩma sã n seg-a fãa, a kʋʋd-a lame.

²²La sã n yaa wa yell n date tɩ beem kaẽ, tɩ pʋ-toog kaẽ, tɩ wẽeda bɩ lobgrã wa ne kũum,

²³wala f tusa doog zug kugr t'a lʋɩ n kʋ ned f sẽn da ka ne la beem me ka be sʋka, pʋ-tooga sẽn ka zĩndã,

²⁴buuda zãng na n tũ noy-niyns sẽn yals yell a woto poorẽ n paam koɛɛg n leok nin-kʋʋda la sẽn tõe n daaga zɩɩm n lebsã.

²⁵Buudã n fãagd nin-kʋʋdã n lebs-a a soondga tẽngẽ. La sẽn maana yella paada be n tãag maan-kʋʋd kãsenga kaalem.

²⁶Nin-kʋʋda sã n belg a menga n yi soondga tẽngẽ,

²⁷tɩ sẽn tõe n daag zɩɩm n dol zɩɩma soab yãend-a n kʋ, taal ka be a zug ye.

²⁸Dɩlla nin-kʋʋda paada a soondga zĩigẽ n tãag maan-kʋʋd kãsenga kũum. Maan-kʋʋd kãsenga loogr poore, a tõe n leba a tẽngẽ.

²⁹Y sẽn be tẽng ning fãa y na n tũu no-kãnga zamaan woo zamaana.

³⁰ [69†] Ned sã n kʋ a to, b pa yãkd nin-kʋʋda yõore tɩ b ka paam neb wʋsg kaset ye. B pa kʋʋd ned nin-yend kaset yĩng ye.

³¹Nin-kʋʋd sã n tog ne kũum b ka tõe n deeg yaood n bas-a vɩɩg ye. B kʋʋd-a lame bala.

³²B ka tõe n deeg yaood me n bas nin-kʋʋd t'a kẽ soondg tẽngẽ ye; b ka tõe n bas-a t'a leb a tẽngẽ tɩ maan-kʋʋd kãsenga ket n vɩ ye.

³³Da rẽgem-y y tẽnga ye. Zɩɩm yaa bũmb sẽn dẽgemd tẽnga. La yaa sẽn daaga zɩɩma soab zɩɩm n pekd tẽngã.

³⁴Da rẽgem-y tẽng ning y sẽn kẽeda ye, tɩ m be y sʋka. Maam la Israyɛl kamba Wẽnde, la m be-la b sʋka.»