Read SEBR SÕNGO, 1998 Sõadga 8 Bible Online

Sõadga 8 - SEBR SÕNGO, 1998 bible

Sõadga 8

¹Soaala-Wẽnd yeela a Moyiiz:

²«Yeela Aarõ woto: ‹F sã n na n widig fitil kãsenga, sõng t'a vẽenema tʋʋs taoore.› »

³A Aarõ tũ Soaala-Wẽnd daabo: a widiga sãnem fitil kãsengã t'a vẽenema tʋʋsd taoore, wala Soaala-Wẽnd sẽn da wilg a Moyiiz.

⁴[8†] Ad-b sẽn da maan sãnem fitil kãsenga to-to: Sãnem la b rɩkd n kud-a, a sɛɛgã n tãag a puugã. A kudba tũu wala Soaala-Wẽnd sẽn da wilg a Moyiiz.

⁵Naaba-Wẽnd yeela a Moyiiz:

⁶«Yiis Levitsã a Israyɛl kamba sʋka n yɩlg-ba.

⁷La ad-f sẽn na n maan bũmb ninga: F na n mes-b-la ne ko-sõngo, tɩ b bao barga n saag b yĩnga fãa la b pek b futu n lebg yɩlma.

⁸Dẽ poore b rengd n waa ne loalga la zom sẽn nag ne kaam. N wa ne loalg a to yel-wẽnd sugr kosg maoong yĩnga.

⁹A Israyɛl rooga zãng na n tigmame la Levitsa na n kolga sɛka roogo.

¹⁰Levitsa na n yalsa Soaala-Wẽnd taoore tɩ Israyɛl kamba tẽeg b nus b zutu.

¹¹A Aarõ na n deeg-b lame wala a Israyɛl kũuni n dɩk-b n tees Soaala-Wẽnd wala b pʋɩɩre, la b tʋʋmd na n lebga sɛka roog tʋʋmde.

¹²Levitsa na n tẽega b nus lols a yiiba zutu tɩ fo reeg-ba n kõ Soaala-Wẽnde. A ye na n kʋʋ sugr kosg maoongo, t'a ye kʋ yũ-noog maoong. Dẽ poor marsã la a Aarõ maand a sẽn tog n maan tɩ Levitsa yɩlge.

¹³Foom a Moyiiz na n yalsa Levitsa a Aarõ ne a kamb a yiiba taoore la f na n tees-b-la Soaala-Wẽnd wala b pʋɩɩre.

¹⁴F na n welga Levitsa toore ne Israyɛl kambã la b na n yɩ-la m soolem.

¹⁵B tʋʋmd marsã na n lebga sɛka roog tʋʋmde. Yɩlg ba n dɩk-ba n kõ Soaala-Wẽnde wala b pʋɩɩre.

¹⁶B rɩkd-b lame n kõ maam tɩ m sɩd so-b zãnga rot a taaba kamb zĩigẽ. Bãmb la m deeg n tek ne buuda taab kom-dẽemse, n tek ne bi-ribl fãa sẽn yaa a ma pipi biiga.

¹⁷[9†] A Israyɛl kom-dẽemse, b rũmsa kom-dẽemse, yaa maam n so. M sẽn kʋ Ezipt kom-dẽemsa raare, bi-rẽeng fãa lebga m soolem.

¹⁸Rot a taaba kom-dẽemsa zĩigẽ, yaa Levitsa la m deegda.

¹⁹M dɩk-b lame n kõt a Aarõ ne a kamba. N-ye! Ka buud a to, yaa Levitsa buudu n na deeg b zĩiga n tʋm sɛka roog tʋʋma la b kos Soaala-Wẽnd sugr b yĩnga. La woto bũmb kõn le maan-ba b sẽn kolg zĩ-sõnga yĩng ye.»

²⁰A Moyiiz, a Aarõ la Israyɛl kamba fãa maana ne Levitsa wala Soaala-Wẽnd sẽn wilgi.

²¹Levitsa yɩlga b mense, n pek b futu. A Aarõ rɩk-b lame n kõ Soaala-Wẽnd wala b pʋɩɩre la a kosa b pekre.

²²Dẽ poor marsã la Levitsa sɩng b tʋʋmde sɛka roogẽ. A Aarõ ne a kambã n da wilgd-b b sẽn tog n tʋme. Bũmba fãa maana ne Levitsa wala Soaala-Wẽnd sẽn da wilg a Moyiiz.

²³Naaba-Wẽnd yeela a Moyiiz:

²⁴«M noor la woto Levitsa poorẽ: lebga pakr ne Levitg fãa yʋʋm sẽn ta pisi la a nu t'a reeg tʋʋmde, sɛka roogẽ.

²⁵A yʋʋm sã n ta pis-nu la Levitga basd tʋʋmde.

²⁶A tõe n kell n wilgda tʋʋmna a saam-biisi la a meng ka le tʋkd bũmb ye. Yaa woto la f na n wilg Levitsa b tʋʋmdã.»