Read SEBR SÕNGO, 1998 Mise 1 Bible Online

Mise 1 - SEBR SÕNGO, 1998 bible

Mise 1

¹ [1†] Ad koɛɛg ninga Soaala-Wẽnd sẽn kõ a Mise, Moresɛt neda, Zɩɩda nanamse a Zotam, a Aaz la a Ezekiyas wakatẽ. Likra pʋgẽ, Samari ne Zerizalɛɛm yɛla la a yãend yã.

²Tẽnsa fãa kelg-y yã! Tẽnga ne a bõn-naandsa fãa yok-y y tʋbre! Soaala-Wẽnd na n zĩnda b ro-sõngẽ wã n bool-y bʋʋdo.

³Sɩda b yita zĩ-sõng ning b sẽn beẽ wã, la b sigda pʋʋsga zĩisẽ.

⁴Soaala-Wẽnd watame tɩ tãmsa boogdẽ, wa bugum n yẽnegd siribdu. Soaala watame tɩ bãg-faasa pʋkdẽ, wa koom sẽn sigd kunkuba.

⁵B sẽn yi b zĩ-sõngẽ wã ya-la a Zakoob yagensa beegr yĩnga, yaa Israyɛl kamb sẽn bas bãmba yĩnga. Ãnda n tusd a Israyɛl t'a zẽkd a zugu? Yaa a na-tẽngã, yaa Samari. Ãnda n tusd a Zɩɩda a wẽn-naandsa waoogr zĩigẽ, yaa Zerizalɛɛm memga.

⁶Dẽ la Naaba-Wẽnd gomda: M na n kɩtame tɩ Samari lebg raboogo, lalsa na n tusame n lub zãng tɩ m wʋk a kugã n lob sudgẽ la Samari na n lebga wa bugsuntungu pʋʋgo sẽn maneg paalem.

⁷Mam na n sãama a wẽn-naandsã fãa, a laoga na n dɩɩ bugum, ned kõn le yãe b wẽn-naandsa ye. Samari arzɛka yii pʋg-yoaadb nengẽ la bãmb nengẽ la a na n lebe.

⁸Maam a Mise, m na n kaasame, m na n wiisame. M na n piida m neooda, la m pidg m futu, n kelem wa we-yũuga, m na yãba wa na-neoongo.

⁹Samari sẽn deeg sɩbgr ninga wʋm-a lame. Sɩbgra tol n sãag n ta-la a Zɩɩda, n ta Zerizalɛɛm, m buuda na-tẽnga.

¹⁰Ra taas-y kibar kãnga Gat tẽng ye. Be rãmb nintãm da rʋʋg ye. Bɛt-Leafra rãmb bilim tomẽ tɩ b rɩta kʋʋre.

¹¹Loog-y pa-weere, Safir dãmba, loog-y bɩlgemde la ne yãnde. Sã n ya yãmba, Sãana rãmba, b ra le yãend-y yɩng ye. B yãbda kʋʋre Bɛt-Esɛl tẽnga, soondg zĩig ka kees be ye.

¹²Marot rãmba rigdame tɩ b ka mi b yell sẽn na n yɩɩ a soab ye. Soaala sẽn wat ne yel-beed ninga zoe n ta Zerizalɛɛm tẽng noore.

¹³Lakis rãmba, segl-y y wiidi n zoe tɩ y manesma wẽnda Israyɛl, y yɩɩ tõatbã, n pirs Zerizalɛɛm t'a zẽk a zugu.

¹⁴Woto wã y tog n welga ne Moresɛt-Gat rãmba. Sã n ya Akzib tẽng rãmba, ad-y b kõn sõng Israyɛl dĩma ne baa fɩ.

¹⁵Maresa tẽng rãmba, ad-y Soaala na n kẽes-y-la na-paalg a to soolmẽ. A Israyɛl nanamsa ne b ziirã na n kong n tɩ soonda Adulam tãnga bokẽ.

¹⁶Gʋs-y y zoobdo, põng-y y zugu, Zerizalɛɛm dãmba; bɩ y zuta kõog wa yɩbrgo rẽnna. Yãb-y y kom-nongdsã tɩ b na n looga pa-weer zĩ-zãorgẽ.