Read SEBR SÕNGO, 1998 Mise 6 Bible Online

Mise 6 - SEBR SÕNGO, 1998 bible

Mise 6

¹Kelg-y Soaala-Wẽnd sẽn yete: «Yiki, m buudu, yik n bool-m bʋʋd tãmsa taoore, gom tɩ tãn-bi wã wʋm f sẽn gomd n lebdẽ.

²Tãmsã fãa kelg-y maam, Naaba-Wẽnd, sẽn bʋʋd ne a buudu. Tẽnga sẽn vigl kẽnkẽ bũmb ning zug n yɛsẽ wã, fãa kelg tɩ m yika bʋʋd ne a Israyɛl.»

³Yaa woto la b sokd b buudã: «Bõe la m maan yã? M nams-y-la ne bõe? Leok-y-m wɛ?

⁴[7†] Yaa m sẽn yiis-y Ezipt tẽnga, n yiis-y yembdẽ n tʋm a Moyiiz, a Aarõ la a Miriyam tɩ b lʋɩ yãmb taoora bɩ bõe?

⁵[8†] M buudu, maan tẽegre! Moab dĩm a Balak sẽn waa n dat n tʋm beedã, tẽeg-y yã a Beor biig, a Balaam, sẽn yeel-a. Tẽeg-y tɩ m yãag-y-la al Sitim n tãag Gilgal tẽnga. Woto wã y tõog n yãenda kũun niyns m sẽn sudg-y, maam, y Soaala-Wẽnnaam.»

⁶Yaa kũun bʋgo la d tog n wa ne, d sã n wat n na n waoog Soaala, yĩngr Wẽnnaama? Tog n waa ne nag-bil maoongo, yʋʋmd yend nag-bil sẽn yõogd tɩ bugum dɩ zãnga?

⁷Piis bãgre na noog a sũur sɩda? Bɩ b na n deega ka-neem sẽn pid ne sĩn-bi? D tog n kõ-b-la d kom-dẽems n paam sugri d sẽn zẽkd d zug ne bãmba la d sẽn ka pʋg bãmb wala sẽn da segda bɩ?

⁸B wilg-f lame, Adem biiga, sẽn ya sõmbo, n wilg-f Soaala sẽn dat ne foo: ad ka bũmb a to n zʋʋg maan sẽn segde ne nonglem sẽn ka viigdi la f pʋg-b ne sulg-m-menga.

⁹Soaala gomda ne tẽnga rãmba n yet tɩ b na n fãaga sẽn sulgd-b meng bãmb taoore. Kelg-y yã, Zɩɩda rãmba sẽn tigim Zerizalɛɛm!

¹⁰M na tõog n sake tɩ nin-wẽnsa tigsd b rotẽ laog sẽn paam ne zãmbo. M na sak sẽn ya wẽng zãnga, tɩ b sẽn tar teed niyns n magda yɩ zãmb te-magdse?

¹¹M na tõog n ges wala pʋ-peen neda, ned sẽn bobd korg sẽn pid ne zirẽ-be-magdse?

¹²Sẽn ya-b rakãagba n be tẽnga pʋga, ad-y b sẽn mi yaa maan pãn-tõogo la b yag la b tudg b taaba.

¹³M sɩnga y wẽedo la ya y wãab yĩnga, y yel-wẽna sẽn waooga yĩnga.

¹⁴Y na n dɩɩme la y kõn tɩg ye. Y na n waasa kom waasgo. Y na kẽgsame la kõn yɩ y noor dɩɩb ye. Y sẽn na n tõog n bĩng bũmb ning fãa, bɛɛba na n wa zabame n deeg-a.

¹⁵Y na n bʋdame la y kõn kẽeb ye. Y na wõda kaam ne oliv la y kõn tõog n zɛ y yĩng ne-a ye. Y na kõga rãam la y kõn tõog n yũ-a ye.

¹⁶ [9†] Y tũuda so-wẽng ning dĩma Omri sẽn tuki. Yẽnda ne a biig a Akab zak rãmb n tũ so-kãnga. Yaa bãmb nao la y rɩk yã. Rẽ n so tɩ y na n yãend y tẽnga wãabo. M na n kɩtame tɩ yãmba, a kẽedbã, lebg y bɛɛb laado. Buuda fãa yãnde la y na n deeg n tʋke.