Read SEBR SÕNGO, 1998 Nawum 2 Bible Online

Nawum 2 - SEBR SÕNGO, 1998 bible

Nawum 2

¹ [2†] Ade, Zɩɩda rãmba, ges-y ned sẽn sigd tãmsã ne kiba-noogo. A soaba gonda laafi yelle. Dɩlla Zɩɩda maan-f f kibs rãmba. Wa kõ Soaala f sẽn kãab bãmb bũmb ninga. Nin-wẽng n da tʋmd yãmb beedo la a kõn le paas ye. A pãnga ta-la a tɛka.

²Niniv, ad b wat n na n taka zabr ne foo. Bɩ tãb-biisa gũ b tãnsoben-doogã, b gũ soya, b segl zabre, b tigim b zab-teedo.

³Soaala-Wẽnd lebsda a Zakoob yagense b pĩnd laogo, n lebsd a Israyɛl a pĩnd ziir. A Israyɛl la Wẽnd bugsuntungã, zɛɛdba sẽn da zɛ n loogã.

⁴Bɛɛba tãb-biis gãong yaa miigu, tɩ futa me ya boto. B sã n bob zabre, b bilim-bilma zirda wa bugum, tɩ kãna zegsdẽ.

⁵Bilim-bilma yɛdg n pida soya, b zoet n gɩta zĩig zãnga, wa rũms sẽn yik gãeemdo. F sã n get-ba, bãng bug-vɩlense, bãng saag sʋʋg sẽn kẽnd to-to.

⁶Niniv dĩma tigsda a tãnsoaben-dãmba, la b lagsd n lʋɩtame. Zab-zabdba kaooga vugri n tees lal-gũbrã, n paam pẽk n soonde.

⁷Vugr bala b kaoo kʋɩlens niyns sẽn yegd kʋɩlgã. B kẽe dĩma zakẽ.

⁸B tʋka wẽn-poaka togsende n looge, tɩ pagba sẽn da get a yella na n wũus wa wala. B sũur sãamame tɩ b toosd b yãoogo.

⁹Niniv wẽnda ko-baoor sẽn wurg n daannẽ. B toond n boonda tãb-biisã sẽn zoetã la ba a ye ka yaasd ye.

¹⁰Lebga: zɛɛ-y ligdi, zɛɛ-y sãnem, zɛɛ-y tɩ ka sɛt ye, yaa yõod ne yõodo!

¹¹Tɩ sɩd ya zɛɛbo, wãabo, sãoongo. Raood sɛɛme, kars saooda kalwaare, yaa nen-soabga.

¹²Tẽng ninga sẽn ya bõnyẽesa gãaga lebga bõe? Bõnyẽ-poala ra bee be n gũud b rɩɩbo. Bõnyẽ-raooga sã n da yit n na n bao a rɩɩbo, bũmb da ka saagd n pẽneg a kamba ye.

¹³Bõnyẽega ra yõgda a kamb yĩnga, a pag yĩnga. A gãagẽ rũms n same, a gãagẽ nemd pa sɛt ye.

¹⁴Dũni fãa Soaala n yete: «M na n yika ne foo, Niniv, m na n yõoga bilim-bilm niyns f sẽn tar n zabdẽ wã, f kom-bɩɩba na n paa zabrẽ. M na n sɛɛsa f fãabã, b kõn le wʋm fo sẽn tʋm b rãmba koɛɛg ye.»