Read SEBR SÕNGO, 1998 Nawum 3 Bible Online

Nawum 3 - SEBR SÕNGO, 1998 bible

Nawum 3

¹Yell ne tẽng ninga sẽn nonga zɩɩm daagre! Yell ne zirẽ-be-rãmb tẽnga! Yell ne wagdb tẽnga! Yell ne fãadb tẽnga!

²Kelg-y bʋʋre, yaa kaas sẽn kiigd bʋʋre. Kelg-y bʋʋre, yaa bilim-bilm nao rãamde! Kelg-y bʋʋre! Yaa wiidi nao bʋʋre.

³Wed-dʋʋdba kaooga zabre, sʋʋsa widgda b bugum, kãna yãgda wa saaga. Sẽn ki yaa zãma, kũuma vɩlmame n dɩg, naoor ka tõe n kẽne n ka lak kũum ye.

⁴Niniv, pʋg-yoaad bãnde, f neerma, f fan-teeda ra lubda neba. F da raada dũni rãmba ne f bagrã la f yoobã.

⁵Rẽ n so tɩ m na n yik ne foo, maam n yete, maam, Naaba-Wẽnde. M na n zẽka f fuug n tãag f nenga, tɩ bu-zẽmba fãa yãe f yãnde, tɩ f buuda fãa yãe f paoogre.

⁶M na n vu-f-la begdẽ n dẽgem-fo, n kams neba fãa tɩ b wa la-fo.

⁷Ned ninga fãa sẽn na n yãenda foo na n wẽnemda a neng, la a yeel: «Niniv la woto! A lebga raboogo. Ãnda n na n kũm a nimbãanega. Ãnda n na n wa maas a sũuri?»

⁸Niniv, fo yɩɩda Tɛɛb, Nil kʋɩlga sẽn da gũbgi t'a gũbgra meng neerem yɩɩd lal-gũbri, n kok-a zĩig zãnga bɩ?

⁹Yaa Nubi la Ezipt n da kõta laog ka tɛka. Ypt ne Libi rãmba n da sõngd-a, zabr sã n yiki.

¹⁰M sok n gese, ne rẽ fãa b ka tall a nebã n loog pa-weere, b ka fẽd a kom-bɩɩba so-tiisẽ? B pida b nanamsa ne bãeense, n dɩk-ba n pʋɩ sẽn tõog-b bãmba wala b zu-noog pʋɩɩre.

¹¹Fo me wakat n ta, Niniv. Toog na wʋm-f tɩ looge. Fo me na n baoo zĩig n soonde.

¹²Fo tãnsoben-dota wẽnda kankam-rẽemse. Miimda kankangã tɩ fãa sʋʋge, tɩ sẽn dat-a fãa rɩtẽ.

¹³Ges f buuda neba, yaa rabɛɛmb wa pagb bala. F tẽnga kʋɩlens pakda b toore, tɩ bɛɛba kẽedẽ. Yaa bugum n dɩ kʋɩlensa sogdse.

¹⁴Bao-y koom n bĩng, zabra yĩnga, Niniv rãmba, zẽk-y lal-gũbrã. Kẽ-y tãnnaokẽ n tab tãndo; dɩk-y tãn-koɛɛm-wamde n wẽ tãn-koɛɛma.

¹⁵Bãng-y tɩ y na n kiime, y na n paa zabrẽ, bɩ y na n paa bugumẽ, bugum ninga sẽn na n dɩ y tẽngã. Y na n looga wa sʋʋr sẽn loogd ne kood vãado. Niniv rãmb da yaa wʋsgo wa kalwaare.

¹⁶Lɛɛbdb ra pida Niniv, b ra yaa wʋsgo wa ãds sẽn be yĩngri. B sõora yaa wa sʋʋr sẽn lʋɩ pʋtẽ, la fãa gill loogame.

¹⁷Sẽn da get-b tẽnga yelle da yaa wʋsg wa sʋʋre. Tʋʋma taoor dãmba wẽnda bõn-yɩgdi sẽn dʋʋgd tuuda zug, n soond yʋng waoodo, la sõor sã n yẽege, b yɩkdame la ned ka mi b sẽn kẽedẽ ye. Ned kõn tõog n togs ye.

¹⁸Asiri dĩma, f soaalba gãandame n ka na n le yik ye. Tãnsoaben-dãmba me boto. Buuda neba zoeeme n dʋ tãmse la ned ka be n na n le tigim-b ye.

¹⁹Yaa yel-beed n lʋɩ f zugu. Neb niyns fãa sẽn wʋm yell ning sẽn pak fooma wẽeda nug-pogse. Ãnda la f toolma la f wẽnema ka namse, naoor a yi, naoor a tã?