Read SEBR SÕNGO, 1998 Abakuk 1 Bible Online

Abakuk 1 - SEBR SÕNGO, 1998 bible

Abakuk 1

¹Ad Wẽnd sẽn wilg bũmb ning bãngd a Abakuk.

²Soaala, m na m bool-y lame tɩ y wa sõng-ma n ta wakat bʋgo, tɩ y ket n pa kelgdẽ? M na n kell n kaasdame la m gomd pãn-tõoga yelle, tɩ y ka wat m fãagre?

³Bõe yĩnga la y bas tɩ m yãet yel-beedo, yaa bõe la y ne pãn-tõogã n sĩnda? M goabga, m dɩtgo, m sẽn lebẽ fãa yaa pãn-tõogo, yaa bʋʋdo la zaba.

⁴Woto la noor lebg zaalem, tɩ b ka le kaood bʋ-tɩrg ye. N-yẽe! Nin-wẽng yaanda nin-sõngo, zemsgo sor lebga so-buka.

⁵ [1†] Ges-y bu-zẽmbã, yaa Naaba-Wẽnd n gomde, ges-y la y pɛleng yɩke, tɩ y yɛɛse. Yaa tʋʋmd la m na n tʋm tɩ y ket n vɩ. Yaa tʋʋm-bãnde, la ned sã n togse, y kõn deeg ye.

⁶[2†] N-yẽe! M na n waa ne Kalde rãmba, sũ-to-neba, neb zɩɩm sẽn tʋʋle, neb sẽn saad zĩis fãa, n zɛɛd b taab tẽnse!

⁷Buud kãnga pãng la a raood ka be to ye. A pãnga la a bʋʋm, a pãng la a zu-zẽkre.

⁸B wiidi tĩig yɩɩda ãbga, n yɩɩd digd-n-yĩidsa rẽnna. B wed-dʋʋdba yii yɩɩg n watẽ, b fõta wa sɩlg sẽn baood a rɩɩbo.

⁹Kalde rãmba pida ne pãn-tõogo la ad b sẽn wate. B pa lebd goabg bɩ rɩtg ye. B sẽn yõg tãb-biisa sõore: bãng bĩisri.

¹⁰Buud kãnga toog ka be ne naab ye. A laada tẽnga soaalba. Tãnsoben-dota ka yɛɛsd-b ye. A samda tãndo lalsa sɛɛga, n paam n kẽ.

¹¹B loogda wa sob-raoogo, n teem zĩiga. Ad-y b geta b pãnga wa b wẽnde.

¹²Al yʋʋm sẽn zãre ka yãmb la Soaala Pãng soaba, mam Wẽnnaama, mam nin-sõngã sẽn ka kiida bi? Yãmb zĩndiga buud kãngã, t'a kao d bʋʋdo, Soaala, Pãng soaba, m soondg pĩiga.

¹³Yãmb nina yaa sõma wʋsgo ne y tõog n ges wẽnga, yãmb kõn sak n ges pãn-tõog ye. Bõe yĩng marsã tɩ y neẽ la y sĩnda, tɩ b tʋmd b tʋʋm yoodo? Bõe yĩnga la y sĩnda tɩ wẽn-kɩɩs na n vel nin-sõngo?

¹⁴Yãmb maanda ne ninsaalba wala y sẽn maand ne mogr zĩm, ne rũm-yaalsa y sẽn basd tɩ b rugd yaarã.

¹⁵Babilon rãmba yõgda neba wala b sẽn yõkd zĩif ne lɛooga n yiisd-b ne sũ-noogo kãsenga.

¹⁶B lɛɛgd n kʋʋda b zulumsa maando, n yõogd tɩdare b yĩnga. B yetame tɩ yaa bãmb maasem yĩng la b paamd b rɩ-bɛda la b rɩ-noodo.

¹⁷Woto wã y na kell n bas bɛɛ wã t'a wõod a sʋʋse la a tar neba kʋʋbo, tɩ vʋʋsg la nimbãan-zoeer ka beẽ?