Read SEBR SÕNGO, 1998 Abakuk 2 Bible Online

Abakuk 2 - SEBR SÕNGO, 1998 bible

Abakuk 2

¹Mam na n yalsa yĩngri, m gaosg zugu, mam na n yalsa wa sẽn tog n gũ-a tẽngã sẽn zao a gaosga zugu, n bãng Soaala sẽn na n leok-m bũmb ninga, n bãng b sẽn na n bʋk m sũura ne koɛɛg ninga.

²Dẽ la Soaala leok maam n yetẽ: «Gʋls f sẽn ne bũmb ninga, gʋls-b walg zugu, gʋls bedre tɩ kareng yɩ naana.

³[3†] F sẽn ne wã na n wa-la a wakato, ba sã n wẽnd a na n kaoosame, a na n wa-la a wakato. Gũ ne saagre; yaa tɩlɛ t'a wa la pʋs n ka na n le kaoos ye.

⁴[4†] Ad-y pãn-tõog soab wuka ne nagre n ka mi sẽn segd ye. A ka mi tɩ sõmblem vɩɩm la nin-tɩrg vɩɩm ye.»

⁵Rãam sã n tar pãnga a tõe n zãmb-f lame la sẽn teeg-a a meng pãng ka paad a zĩigẽ ye. A sẽn mi yaa a yaag a noor wala bʋg-tẽnga, la wala kũum, bũmb pa sekd-a ye. A woonda buuda toor-toore n kẽesd a soolme, wolgda a ye rũnna n wolg a to beoogo.

⁶A sẽn ka mi bala yaa t'a sẽn yõk b rãmb n deeg b tẽngã na n wa pusga laad a poorẽ la woto la b na n wa yeele: «Bʋk ne bʋko! Pãn-tõog soaba! M ba wagdr samda a sẽn zu, la na n yɩɩ woto n ta da-bʋre a ka mi tɩ yaa sam n samd taab ye.»

⁷B na n wa yẽeg-f-la vugr bala, fo sẽn dɩ b rãmb samda na n waame n wa miim-f wa taanga n loog ne b laog naana naana.

⁸Yaa tẽns ka tɛk la f zɛ yã la yaa dũni wã zãng n na n wa zɛ-fo tɩ ninsaalb zɩɩm la f raagyã tɩ pãn-tõog la f maan tẽngã, Zerizalɛɛm ne a kẽedbã.

⁹Bʋk ne bʋko! Gomda m ba ro-meta! Wẽdgame n deeg f to zĩiga tɩ f rat n ti-la f roogã taaba sẽn ka tõe n taẽ ye n paam n põs ne a ka neng rãmba nus yõkre.

¹⁰Bãng tɩ woto wã yaa yãnde la f bao n na n kõ f zaka yaa neb ka tɛk yõor la f rat n gʋsge yaa f meng vɩɩm la f rat sãame.

¹¹Lalsa kug na n naaga taab m kelme la yaa sug-raadã n na n yãb n soke.

¹²Bʋk ne bʋko! Gomda ne m ba tẽn-meta! Tẽnga meeb tʋɩɩsa zɩɩm zugu, yaa zɩ-raagd n met a tẽnga.

¹³Woto ka yit Wẽnd Pãng Soaba nengẽ sɩda, Adem biis tʋʋma yõodo bugum n mi nadgra fãa nadga zaalem.

¹⁴ [5†] Wakat n wate tɩ tẽnga na n pidi ne Soaala ziira bãngre, n pid wa mogr sẽn pid ne koom.

¹⁵Bʋko ne bʋko! Gomda ne m ba Rã-yũuda! A yũnugda a tũud-n-taaga rãama kalemame t'a wa tõe n lub neda t'a wa tõe tɩ f fʋk f zãnde.

¹⁶Ad b sẽn na n tɩgs-f bũmb ning wakat kãnga, ka na n yɩ ziiri, na n yɩɩ yãnde, na yɩ-la f me yũ la f fʋk f zãnde. Soaala sũ-puura wamd n na n daag f zugu, la woto f yʋʋra kilsgu poore, f paoor meng-meng n na n pʋge.

¹⁷Pãn-tõog ning f sẽn maan Libã wã na n lɛɛg n wɩbga foo, we-rũms niyns sẽn tɩ soond be wã, fãa na n yõg n koodame, pãn-tõoga sẽn maan ne tẽnga la a nebã, pãn-tõoga sẽn maan be yĩnga, ninsaalba zɩɩma sẽn daag be yĩnga.

¹⁸Wẽn-naandsa yõod la bʋgo? Yaa kut bala la belgem-belgem. Yõaka belgdame tɩ bũmb la a teeg yã, la yaool n yaa bõn-muk la a rõog yã.

¹⁹Bʋk ne bʋko! Gomda ne m ba ra-pɛɛsa! Fo yeta ra-giiga: «Yik yĩngri,» ka rẽ bɩ f yet kugri sẽn ka tʋba: «Nek f gõeem la yik n togse tɩ bũmb la f wat n na n wilgi.» Bũmb togsend la d sɩd ne, yãgda ne sãnem la wanzurfu, la ka vʋʋsd wa nin-vɩɩg ye.

²⁰Sã n ya Soaala, bãmb zĩ-la b ro-sõngẽ. B sẽn dat yaa tẽnga fãa bas bʋʋr bãmb taoore.