Read SEBR SÕNGO, 1998 Zakari 1 Bible Online

Zakari 1 - SEBR SÕNGO, 1998 bible

Zakari 1

¹ [1†] Dĩma a Dariyus naam yʋʋmd a yiib soaba, kiuug a nii soaba, Soaala-Wẽnd goma ne a Zakari, a Berekia biiga la a Ido yagenga.

²B kõ-a-la noore t'a yeel Israyɛl kamba woto:

³«Maam, dũni fãa Soaala, sũur puuga al wʋsgo ne yãmb ba rãmba. Lɛɛg-y n wa kẽ-y Soaala, tɩ mam me na le bao y zĩiga. M kãabd-y-la rẽnna.

⁴Sõng-y n da wa yɩ wala y yaab rãmb ye. Pipi bãngdba da yeel-b lame: bas-y y so-wẽnse la y tʋʋm wẽnse. La bãmb ka wẽneg n ges maam, b ka kelg maam ye.

⁵Yãmb ba rãmba ka ket ye. Bãngdba me ka ket ye, y mii rẽnna.

⁶La ade, mam sẽn yeel bãngdbã, m sõgen-kamba, tɩ b togs bũmb ningã, ad-y ba rãmba waa n kong n deegame. B teema zʋgo. B reegame tɩ m tall-b lame wala m sẽn da wilg-ba la wala b vɩɩma la b tʋʋma sẽn da tog ne.»

⁷Dĩma a Dariyus naam yʋʋmd a yiib soaba, kiuug piig la a ye soaba, Sebat kiuugu, kiuuga pisi la a naas daare, Soaala-Wẽnd goma ne bãngd a Zakari, a Berekia biiga, la a Ido yagenga. Ad a Zakari sẽn yãende.

⁸[2†] M gãanda yʋngo n yãe rao sẽn zom wed-zẽega n yɛs tuud sʋka, bãg-faagẽ. Daoã poorẽ, wiidi a taaba n da yɛse, tɩ b kõbga ya zẽega, tãmpʋʋre la pɛɛlga.

⁹Tɩ m sok-a: «M zu-soaba, wed-bãmba makda bõe.» Malɛk ning sẽn da gomda ne maama leokame: «M na n wilg-f lame.»

¹⁰Raoã zĩnda tuuda sʋka n le paase: «Yaa Soaala-Wẽnd n tʋm-ba tɩ b saag moogo.»

¹¹Wed-dʋʋdba wilga Soaala malɛka sẽn da yɛs tuudẽ wã bãmb sẽn yãende. B yeelame: «Tõnd saaga tẽnga n nan watẽ, la d yãendame tɩ tẽnga zĩi ne laafi la bãane.»

¹²Tɩ malɛka yeel woto: «Dũni fãa Soaala, yaa yʋʋm pisopoe marsã la y sũur puud ne Zerizalɛɛm la Zɩɩda tẽns a taaba. Y na n mong-b-la y nimbãan-zoeerã n ta da-bʋre?»

¹³La Naaba-Wẽnd kedg n leoka Malɛkã gom-noodo, goam sẽn maagd sũuri.

¹⁴Malɛkã sẽn da gomd ne maamã yeelame tɩ m wilg dũni fãa Soaala koe-kãnga: «Mam nonga Zerizalɛɛm la Siõ tãnga ne nonglem kãsenga.

¹⁵M sũura yaool n puuga wʋsgo ne bu-zẽmbã sẽn zĩ n ka yɛɛsd baa fɩ wã. M sũura dag n nan ka fudgd zãng ye la b waa ne yelle n paase.

¹⁶Rẽ yĩnga m yetame, maam, dũni fãa Soaala, tɩ m le wẽnemda m neng ne nimbãan-zoeere n tees Zerizalɛɛm. M na kɩt tɩ b le me wẽnd dooga be. M na kɩt tɩ b le tẽeg wĩir n mag n me. Yaa maam, dũni fãa Soaala n gomde.»

¹⁷Malɛka kos-m lame tɩ m le moon woto: «Ade, dũni fãa Soaala koɛɛga: ‹M tẽnsa nan ka tar sũ-noog zãng ye, yaa sɩda, la Soaala na n le wa bʋka Siõ sũuri, Zerizalɛɛm la b yama na n le wa kẽ.› »