Read SEBR SÕNGO, 1998 Zakari 11 Bible Online

Zakari 11 - SEBR SÕNGO, 1998 bible

Zakari 11

¹Pak f kʋɩlense, Libã, tɩ bugma rɩɩ f tɩ-bɛdã.

²Zõond-y n kelem, tɩɩs niyns vãad sẽn ka mi sʋʋgre, ad-y tɩ-kãsensa rʋʋgame. Kelem-y yã, Bazã tɩ-neebã, y googa sẽn da yɛs tɩ ned ka tõe n kẽ a pʋgẽ wã, ad-y fãa na n kɛɛme n dʋʋge.

³B wʋmda neb niyns sẽn gũud buuda wa piisa waasgo, b ziira wakat loogame. B wʋmda bõnyẽes yãbre. B ra sora b tʋg-tagdẽ Zʋrdẽ kʋɩlg noore la fãa na n yõogame.

⁴Daar a ye Soaala-Wẽnd kõ-m-la no-kãngã: «Kɩɩm rũms niyns sẽn sʋk maanda yĩnga.

⁵Sẽn daad-b piisa wẽnegdame n koot-ba b toore tɩ b sũur pa kiuusdẽ ye. Sẽn koosd-b piisa yetame: ‹D pʋʋs Wẽnd barka tɩ d lebga arzɛk rãmba.› Sɩda pe-kɩɩmba ka zoet b piisa nimbãaneg ye.

⁶Ade, maam n yete, maam, Naaba-Wẽnde, tɩ mam me kõn zoe tẽnga rãmb nimbãaneg ye. Mam na n basa ned kam fãa ne a yaka, la a rĩma. Dĩm dãmba na n wãa tẽngã la m kõn fãag ned ba a ye b nugẽ ye.»

⁷Maam n lebg lɛɛbdba piisa pe-kɩɩma, piis niyns b sẽn tar n wat kʋʋbã. M bao pe-kɩɩm dasab a yi, n pʋd dasaar a ye tɩ Zoodo, n pʋd a to wã t'a Lagengo. La m kẽnga piisa gũudem.

⁸Kiuug a ye bal pʋgẽ m diga b pe-kɩɩmb a tãabã. M waa n yɛɛ ne piisã tɩ bãmb me yam yi maam.

⁹Tɩ m yeele: «M kõn le gũ-y yɛs ye. Sẽn na n ki-a bɩ a ki; sẽn na n kodg a soab bɩ b kodg-a, sẽn na n menem-a bɩ a menem, tɩ b sẽn bas b rãmba dat bɩ b wãb taaba!»

¹⁰M yaool n dɩka dasaarã, a Zoodo, la m kao-a-la gɩrse n wilg tɩ m kao zood ninga m sẽn da yõg ne neba fãa wã.

¹¹Zoodo kao badaar bala. Piisa raadba sẽn da get maama bãngame tɩ sɩd yaa Wẽnd n da gomd ne maam.

¹² [22†] M yeel-b lame: «Woto sã n nooma yãmba, bɩ y kõ-m yaoodo; y sã n ka sake, bɩ y base.» B sõda m yaoodo, yaa wakɩ koeems pis-tã.

¹³[23†] Soaala-Wẽnd yeel-m lame: «Bɩ f tall ligd sẽn zem woto waare n tɩ kɩs yõka t'a yẽneg-a.» M dɩka wakɩ koeems pis-tã wã n tɩ kɩs yõaka, Soaala wẽnd doogẽ.

¹⁴Dẽ poore, m dɩka dasaare a to wã, a Lagengo, la m kao-a-la gɩrse n wilgi tɩ saam-biira sɛɛme, Zɩɩda ne Israyɛl sʋka.

¹⁵Naab a Wẽnd le yeela maam: «Maan marsã wa rũm-kɩɩm yalma,

¹⁶tɩ bala mam menga n na n bao rũm-kɩɩma sẽn ka zugu n kõ tẽn-kãngã. Pesgo ning sẽn menema, a toog kõn zĩnd ne a ye; a kõn tɩp sẽn pogl-a ye; a kõn sõng pãng sẽn sɛɛ ye. La a na n wãba rũm-nobdi wã nemdo al n tol n võ b nao-bendo.

¹⁷Wẽnd na sãam rũm-kɩɩm-yalma, sẽn basd a rũmsi! Wẽnd na koms a rɩtg kanga la a rɩtg nifu, t'a rɩtg nug yɩ kɩɩnga la a rɩtg nif yɩ feoogo!»