Read SEBR SÕNGO, 1998 Zakari 12 Bible Online

Zakari 12 - SEBR SÕNGO, 1998 bible

Zakari 12

¹Soaala koɛɛg ne a Israyɛl. Soaala sẽn yɛdg saagã la b viglg tẽngã koɛɛga. Soaala sẽn kõ ninsaalb yama koɛɛga:

²«M na kɩtame tɩ Zerizalɛɛm wẽneg wamd sẽn pid ne m sũ-puura rãam. Tẽns niyns sẽn gũbg Zerizalɛɛma sã n yũ-a fãa, a na lub-ba. Na n yɩɩ boto me ne a Zɩɩda, bɛɛba sã n wa gũbg Zerizalɛɛm, a rãama na lub-ba.

³Badaare m na n kɩtame tɩ Zerizalɛɛm lebg kugri bu-zẽmba fãa sẽn na n tʋlg n zẽke. Neb niyns sẽn na n mak-b kugra zẽkre, ad-y b na n pogla b mense. Woto b na wa n lagem taab n tʋlg a zẽkre.

⁴La ad m sẽn yete, maam, Naaba-Wẽnde: ‹Badaare m na n kɩtame tɩ wiida pid ne rabeem, tɩ wed-dʋʋdba pid ne yɩɩre. M na n gũ-la a Zɩɩda la m na n kɩtame tɩ bu-zẽmba wiid lebg zoeense.›

⁵Woto la Zɩɩda nanams na n yeel b sũuri: ‹Zerizalɛɛm neba pãnga bee dũni fãa Soaala nengẽ.›

⁶Badaare m na n kɩtame tɩ Zɩɩda nanams wẽneg bugum sẽn zomb googo, bɩ bug-vɩleng sẽn ning alkam sẽn kals tẽngre. Goabg la rɩtgo, poorẽ la taoore, b na n sãama b yagsa fãa, tɩ bãmb menga yaool n ket n vɩ ne laafi b tẽngẽ.»

⁷Yaa Zɩɩda neba la Soaala na n deng n fãage, la woto a Daviid yagense la Zerizalɛɛm kẽedba, kõn saag n tags tɩ bãmb n yɩɩd Zɩɩda neb a taaba ye.

⁸Badaare Naaba-Wẽnd na n gũ sẽn kẽeda Zerizalɛɛm tẽngã; ned ninga sẽn kɩlla lʋɩɩsã bãmb sʋka, na n paama a Daviid meng pãngã, t'a Daviid yagensa na n lʋɩ bãmb taoor n kẽnd wa Wẽnde, n kẽnd wa Soaala malɛka.

⁹«Badaare, yaa Soaala-Wẽnd n gomda, m na lub bu-zẽmb niyns fãa sẽn na n zab ne Zerizalɛɛm, m na n wã-b-la gilli.

¹⁰[24†] M na n pidsa a Daviid yagense la Zerizalɛɛm kẽedba ne neer baoob yam la Wẽnd sɛɛg yõkr yam. B na n wẽnemd n gesa maam, ned a to wã yĩnga, kãnda sẽn kõs a soaba yĩnga, b na n yãba yẽ soaba wala b sẽn yãbd bi-yend sẽn ki, wala b sẽn yãbd bi-kẽeng kũum.

¹¹Badaare Zerizalɛɛm na n pida ne wiisgu wala Adad-Rimõ wiisgu, Megido bãg-faagẽ.

¹²Buud toɛ-toɛ wã na n wiisa b tẽngẽ. A Daviid zaka na n wiisame, a Natã zaka na n wiisame, pagba toore, rapa me toore.

¹³A Levi zaka, a Simeyi zaka na n wiisame, pagba toore la rapa me toore.

¹⁴[25†] Buuda sagsa fãa na n wiisame, pagba toore, rapa me toore.»