Read SEBR SÕNGO, 1998 Zakari 9 Bible Online

Zakari 9 - SEBR SÕNGO, 1998 bible

Zakari 9

¹ [16†] Ad Soaala sẽn yet tɩ m wilgi. B koɛɛga tata Adrak la Damas tẽnga. Ka Israyɛl neba yell bala la Soaala get ye, b geta ninsaalba fãa yelle.

²B gomda ne Damas yaka, a Amat, n gomd ne Tir la Sidõ, tẽns sẽn pid ne yẽesem la nus tʋʋmd bãngre.

³Tir me-la a tãnsoben-doogo la a kẽesa a pʋgẽ, wanzurf la sãnem wala sor noor sẽn zam ne tãndo, wala soya sẽn pid ne tom.

⁴[17†] Soaala na n deega a laoga fãa, n tus a lal-gũbrã n lubi, n yõog tẽnga bugum.

⁵Askalõ na n yãeeme la rabeem na n yõk-a lame. Gaza me na n digame, n paas Ekrõ t'a sẽn da teeg a soaba lʋɩɩme. Dĩm kõn le zĩnd Gaza, la ned ba a ye kõn le zĩnd Askalõ ye.

⁶Bu-kalem-kalem na n zĩnda Asdod. La maam, Naaba-Wẽnd, na n kɩtame tɩ Filisti wilg-m-menga sɛ.

⁷[18†] M na n deega Filisti rãmb noorẽ rũng fãa sẽn pa kodg nemdo, rũng fãa sẽn kʋ maoong wẽn-naand yĩnga nemdo. Filisti rãmba bu-kell na n paamame tɩ m lebg bãmb Wẽnde wa m sẽn yaa a Zɩɩda Wẽnde. Ekrõ rãmb na n wa naaga m buudã wa Zebuze rãmba sẽn maane.

⁸M na n gilgd n geta m soolma la m na n zaba ne a bɛɛba. Ned kõn le kẽ a pʋgẽ ye, ned kõn le wa maan m buuda pãn-tõog ye. M get-a-la marsã ne nonglem.

⁹ [19†] Kɩdem ne f pãng fãa, Zerizalɛɛm! Lang sũ-noogo, Siõ tẽnga! Ad f Dĩma sẽn wat f nengẽ. A yaa zemsg soaba la yẽ n yɩɩd ne pãnga. A yaa sulg-m-meng soaba, la a zomba bõanga; yaa bõn-bila, yaa bõn-yãang biiga la a zom yã.

¹⁰[20†] A na n yiisa zabra bilim-bilma Efrayim, a na n yiisa wed-daad Zerizalɛɛm, a na n kao tãbdo, a na n sika laafi bu-zẽmba tẽnsẽ. A soolem na n sɩnga mogr noorẽ n tɩ tãag mogr noore, a na n sɩnga Efrat kʋɩlga noorẽ n tɩ tãag tẽnga sɛtmẽ.

¹¹ [21†] Yaa maam, Naaba-Wẽnd, n gomd woto: «Tõnd zooda yĩnga, zood sẽn yõge tɩ maand zɩɩm kaset lʋɩ sʋka, zood kãng yĩnga, m na n yiisa y kamb niyns sẽn pag roogo la roog sẽn wẽnd ko-baoor sẽn ka tar koom.

¹²Yãmb fãa sẽn da pag roogo la sẽn da ket n zĩi n saagdẽ, leb-y y tẽngẽ tɩ b le maneg n yika a lal-gũbrã. M zoe n togsd-y-la marsã tɩ m na n dola y namsgã naoor a yiibu ne m kũuni.

¹³Zabr yĩnga m na n dɩka a Zɩɩda t'a yɩ m tãpo. M pĩim la a Efrayim; Siõ, m na n pirsa f kamba tɩ b tak zabre ne a Yavã kamba, la m nugẽ a Siõ na n lebga m sʋʋga tɩ m tʋm gãndalsem tʋʋma.»

¹⁴Soaala-Wẽnd na n le siga vugr bal b buudẽ. B pĩima na n tãoo wa sa-yãgbo. Bãmb meng n na n peeb tõntõogo, b na n waa ne nug-rɩtg sa-lugsã.

¹⁵Dũni fãa Soaala na n yɩ b gũuda. Yaa sapɩlem la b na n lobe la b sẽeg bɛɛbã. Sapɩlma na n daaga bɛɛba zɩɩm la zɩɩma na n zoe wa rãam; na n yɩɩ wa maanda zɩɩm sẽn pid zɩ-mesdem laase bɩ sẽn serd maan-kugra yɩdba.

¹⁶La badaare, Soaala-Wẽnd na n fãaga b buudu. B na n fãag-a-la wa rũm-kɩɩm sẽn fãagd a rũmsi. Neba na n wẽnega kug neeb sẽn tablg naam pugla, b na n yãga tẽnga rãmb nini.

¹⁷Tẽnga na pida ne neerem la sũ-noogo. Kom-dibli la kom-pugli na n nooga b sũuri ne alkam la bugsuntund rã-paalga.