Read SEBR SÕNGO, 1998 Malasi 1 Bible Online

Malasi 1 - SEBR SÕNGO, 1998 bible

Malasi 1

¹Ad koɛɛg ning Soaala-Wẽnd sẽn taas a Israyɛl kamba ne a Malasi noore.

²Soaala-Wẽnd yeta b buudu: «M nong-y lame.» La sã n sok-ba: «Y nonglma kaset la bʋgo?» Soaala leodame: «A Ezayu da yaa a Zakoob saam-biiga, ne rẽ fãa m da nonga a Zakoob,

³[1†] n yaool n bas a Ezayu kɛɛnga. M looga ne bũmb ning fãa a kamba, Edomitsa, sẽn da tar b tãmsa zutã la b tẽnga lebga weoogo la we-yũus tẽnga.

⁴A Edom tõe n yeelame: ‹B sãama tõnd tẽnga la tõnd na n yika d raboodo.› Ad m sẽn leokd-ba, maam, Naaba-Wẽnde, dũni fãa Soaala: ‹B rat bɩ b me, m na le wã. B na n pʋda b tẽngã: Wẽng sẽn dɩt naam tẽnga, la buud ninga Soaala sũur sẽn puud ne a soab daar fãa wã.›

⁵[2†] Yãmba, Israyɛl kamba, y na n yãee rẽ fãa la y na n yeelame: ‹Soaala gãndgda Israyɛl tẽn-peelem n wilgd b pãnga.› »

⁶Maam, Naaba-Wẽnde, dũni fãa Soaala yeta maan-kʋʋdba woto: «Biig waoogda a ba, tɩ yem-daoog zoet a zu-soab nifu. La sã n yaa maam, m ka naag n ya y ba la y zu-soab bɩ? Bõe tɩ y pa waoogd-m la y pa zoet m nifu? Y toog ka be ne maam ye la y bee tẽngre n sokdẽ: ‹D sãbs-y-la wãn-wãna?›

⁷Ade, yãmb wata ne rɩ-yoodo m maan-kugra zugu. La yãmb yetame: ‹Tõnd paoog-y-la wãn-wãna?› Ade, yaa y nifã sẽn sãag m maan-kugrã.

⁸[3†] Y sẽn mii n talld rũng sẽn ya zoanga, woabga, bãada n na n kʋ maoong n kõ-ma, y tẽedame tɩ rẽ zemsame bɩ? Sã n ya tẽnga naaba la y kõ rũng a woto buudu, y tẽed t'a sũur na yɩ noogo? Y tẽed t'a na kõ-y y sẽn date? Yaa maam n sokde, maam, Naaba-Wẽnd, dũni fãa Soaalã.

⁹La marsã mak-y n na n kos m bũmbu, maam, Naaba-Wẽnde, n kos-m tɩ m zoe m buuda nimbãanega, y tẽed tɩ m na kelge la m reeg y kosgo, tɩ y tʋʋm wẽnsa yaool n dɩg m taoore? M pa tẽed ye!

¹⁰M tẽed tɩ yãmb nin-yend sã n pag wẽnd dooga kʋɩlens n são. Woto y kõn le tɩ yõgen bugma zaalem m maan-kugra zug ye. M pa get-y ne sũ-noog ye, la y sẽn wat ne kũuna ka noogd m sũur ba bilfu. Mam n yet rẽnna, maam, Naaba-Wẽnde, dũni fãa Soaala.

¹¹Sẽn sɩng dũni wã yaanga n wat taoore, neb sẽn ya buud toor-toore mi-la m pãnga. Zĩig zãnga b wata ne kũun sẽn tog ne ma. Zĩig zãnga b yõogda tɩdare m waoogr yĩnga. Bala m yʋʋra yaa kãsenga tẽnsã fãa yĩnga. Yaa maam n yet rẽnna, maam, dũni fãa Soaalã.

¹²La yãmba, yãmb paoogd-m lame la y tagsdẽ tɩ Soaala maan-kugri ka tog ne waoogr ye, la y tõe n waa ne kũun niyns fãa y sẽn date.

¹³Y tol yetame: ‹Yaa zɩɩb yoodo la b zɩlgd tõndo.› Y sẽn tar m paoogr la y sẽn tar paoogre, maam m toore, dũni fãa Soaalã. Y kõt-m-la rũms sẽn ya wagdem dũmsi, bɩ rũms sẽn ya wobse, bɩ rũms sẽn bẽede. M yɩta a wãn n deeg maand a woto buudu. Leok-y tɩ m kelge.

¹⁴Yell na pak zãmb rãmba sẽn tar dũms sõma b wubrẽ n yaool n tũusd dũms yoodo n na kʋ maoongo. Yell na pak yẽ soaba, tɩ m yaa dĩm kãsenga la bu-zẽmba fãa zoeta maam, Naaba-Wẽnde, dũni fãa Soaalã, m pãnga sẽn waoog yĩnga.»