Read SEBR SÕNGO, 1998 1MAKABE 1 Bible Online

1MAKABE 1 - SEBR SÕNGO, 1998 bible

1MAKABE 1

¹Masedoan dao a Filip biig, a Aleksãndr, yi-la a tẽngẽ n wa tak zabre. A tõoga Pɛrs la Mɛd dãmb dĩm a Dariyus. A reega a zĩiga n lebg Grɛk rãmb dĩma.

²Dẽ poore a zaba wʋsgo n deeg tãnsoben-tẽns ka tɛka la a kʋ tẽnsa dĩm dãmba.

³A zab n taa dũni wã sɛtmẽ, n deeg buud ka tɛk paoongo tɩ dũni wã fãa teeg a lemd a taoore. A Aleksãndr waa n basame tɩ tɩtaam la wilg-m-meng wuk a sũuri.

⁴A yiisa tãp sẽn wa ne tẽn-kũum, a kẽesa buudu la rĩund a soolmẽ n kɩt tɩ b yao fadgo.

⁵A waa n lʋɩɩ bãaga la a bãngame t'a ka na n tɩlg ye.

⁶Yaa rẽ la a bool a tãnsoaben-dãmba la na-biisa sẽn da gʋʋl ne-yẽ wã, al b yãadmẽ, la a pʋɩ-la a rĩunga ne bãmba t'a ket n vɩ ne yõore.

⁷A Aleksãndr dɩɩ naam yʋʋm piig la a yiib n yaool n ki.

⁸A kũum poore, yaa a tãnsoaben-dãmba n led-a, ned kam fãa a sẽn da ning-a tẽng ninga pʋgẽ.

⁹A Aleksãndr poorẽ, na kãens fãa yeelame tɩ b bool-b tɩ dĩm dãmba la b fõgna naam pugla la bãmb kamb n deeg b zĩig, bãmb loogr poore. Maana woto n kaoose la b waa ne pɛt buud fãa tẽng zugu.

¹⁰Dĩm dãmba tɩɩga waa n tãoo will a ye sẽn wa ne wɩɩbdo, wala dĩm a Antiyokus biig, a Antiyokus Epifan. B ra koosa a yõor ne Rom dãmba la yẽe n waa n lebg dĩma, Grɛk rãmba zamaan sɩngr yʋʋm koabg la pis-tã la a yopoe.

¹¹Wakat kãng me, nin-yood buud n yik Israyɛl tẽnga n tudg neb wʋsgo. B ra yetame: «Aya, wa-y tɩ d yõg zood ne tẽns niyns sẽn gũbg-b tõndã tɩ tõnd sẽn welg ne bãmb tɛka, pɛt ne pɛt bala n lʋɩ d zugu.»

¹²Gomda taa wʋsgo yam.

¹³Wʋsgo bʋʋga dĩma tao-tao la a kõ-b la sor tɩ b tũ bu-zẽmba dog-n-mik.

¹⁴Dẽ yĩnga b mee reem zĩisi, wasg-taab zĩisi, Zerizalɛɛm pʋga, wala bu-zẽmba sẽn metã.

¹⁵Bãong kõom marsã wa n lebga yãnde la bũmb sẽn tog n maan dabaar n solge. B basame tɩ Zooda sẽn da yõg ne Wẽnda sãame, n fãoog b meng ne bu-zẽmba, n koos b meng ne wẽnga.

¹⁶A Antiyokus sẽn mik t'a pãng paasame a tʋlg n deega Ezipt tẽnse n yalg a soolem, n naag n dɩ naam tẽn-bɛd a yiib zugu.

¹⁷Dẽ la a tɩ gãneg tãp Ezipt. A kẽnga ne tãb-biisi, ne zab-teedo, ne bilim-bilm, ne wobdo, la koom-kogendo.

¹⁸A kaooga zabr ne Ezipt dĩm a Ptoleme t'a yɛɛs n zoe, tɩ b paam a nebã n kʋ wʋsgo.

¹⁹Siri rãmb deega Ezipt tẽn-bɛdã t'a Antiyokus paam tẽnga laog n zɛ zembala.

²⁰Yʋʋmd koabg la pis-naas la a nii yʋʋmde, a Antiyokus tõoga Ezipt rãmba n lɛɛg n wa. Yɩɩ Zerizalɛɛm sor la a rɩk ne tãb-biis ka tɛka n na n tak zabr ne a Israyɛl.

²¹A Antiyokus kẽe wẽnd dooga pʋga ne tɩtaam, n yiis sãnem maan-kugrã, bug-roagendgã ne a fitilsã la ted a taaba.

²²A looga ne te-roagendgã, kũuna bur rẽnna, ne laasã, ne sãnem laasa sẽn ningd wisdã, ne wẽnd dooga peen-lutgã, ne sãnem pugli. A lagsa sãnema sẽn da tablg lalsa zãnga.

²³A looga ne a sẽn yãend fãa: sãnema, wanzurfã, te-neebã.

²⁴A Antiyokus talla fãa n kul a tẽngẽ, la a tar ninsaalba zɩɩm daagre la a tãoosd goam põasa.

²⁵A Israyɛl yɩɩr zenga kʋ-biig rẽnna.

²⁶Taoor dãmba la nin-kẽemba wiisame, kom-pugli la kom-dibli yagd menemame, pagb neerem sãamame.

²⁷Pʋg paal sɩd waasdame, pag zĩnda a roogẽ n pʋd kʋʋr yɩɩla.

²⁸Tẽnga yɛɛsa a kamb yĩnga, a Zakoob zug wuka ne yãnde.

²⁹Yʋʋm sẽn maan a yiibu, dĩma tʋma fadg reesda Zɩɩda tẽnga, Mizi rao a ye, sẽn wa ne tãb-biis wʋsgo.

³⁰A goma ne nebã laafi goama, n belg-ba tɩ b tẽe-a;

³¹la a soos n kẽe tẽnga, n pãb nebã, n kʋ wʋsgo, n yõog tẽnga bugum, n wãa a rotã ne a lal-gũbrã.

³²B wʋka rũmsã n looge, n wʋk pagba ne kambã n kẽng yembdo.

³³B manegame n mee lalg sẽn tar pãnga n gũbg a Daviid na-yirã, n ning ro-wogdo, n kɩt t'a lebg tẽng sẽn tõe n zab n fãag a menga.

³⁴La nin-wẽns buudu, nin-yood buud la b wʋk n ning be tɩ b maneg n wẽrs-n wẽrs n paas b pãnga.

³⁵B sama zab-teed ne rɩɩb be, b wʋka Zerizalɛɛm laogã n bĩng be. Ad-y b sẽn maan woto wã ya bẽdg kãseng la b gãneg yã.

³⁶Wẽnd dooga lebga b soondg zĩiga, yaa bɛ sẽn ka mi vʋʋsgo n yik n tãng ne a Israyɛl wakat buud fãa.

³⁷Bɛɛba daaga nin-sõma zɩɩm n gilg do-sõngã n sãam-a zãnga.

³⁸Zerizalɛɛm dãmb zoeeme n bas b tẽng t'a lebg bu-zẽmb tẽnga. A lebga bu-zẽmb tẽnga t'a meng kamb daag-a n bas.

³⁹Wẽnd dooga lebga ween-vɩʋʋgo, kibs rãmb lebga sũ-sãang daare, Soaala Wẽnd pa le paam b waoogr raar ye, tẽn-sõnga yʋʋr paama paoogre.

⁴⁰A sẽn paam yãnd ninga tɩ luda a pĩnd ziira zãnga. Lebga kʋ-yãbdb na-tẽnga.

⁴¹Dĩma kɩtame tɩ b b moon a soolma pʋgẽ tɩ neba fãa lagem taab n yɩ buud a ye.

⁴²Buud fãa na n basa a rog-n-miki. B fãa sɩd basa b rog-n-miki, n sak dĩma noore.

⁴³A Israyɛl kamba wʋsg meng saka dĩma noore n kʋ maand n kõ wẽn-naandse, n tõdg vʋʋsg daar noore.

⁴⁴Dĩma tʋma neb Zerizalɛɛm la Zɩɩda tẽnsẽ ne sɛba. Sɛba ra yetame tɩ b tũ bu-zẽmba dog-n-miki.

⁴⁵Bɩ Zerizalɛɛm wẽnd dooga pʋga bɩ b ra le yãend: yũ-noog maoongo, sugr kosg maoongo, laafi kosg maoong ne b sẽn tũnugd bũmb niynsã ye, vʋʋsg raar la kibs raar ra le zĩnd ye.

⁴⁶Bɩ b rẽgem wẽnd dooga ne a te-sõma wã.

⁴⁷Bɩ b me maan-kug la pʋʋsg roto n waoog wẽn-naandse la b maand kurkuyã la rũms dẽgd maando.

⁴⁸B ra yetame tɩ b da le kẽes b kamb bãongo la b rẽgem b mense ne yɛl yood buud fãa sẽn kisi.

⁴⁹Woto b na yĩm Wẽnnaam noore n tek rog-n-mika fãa.

⁵⁰La ned ning fãa sẽn pa saka dĩma noor bɩ b kʋ-a.

⁵¹Noora sẽn yiis n sɛ, dĩma gʋlsa a soolem dãmba fãa; a yãka neb sẽn na n saag n ges tɩ b tũ neere, sẽn na n modg Zɩɩda tẽng fãa tɩ b kʋ maando.

⁵²Neb wʋsg sakame, b basa Wẽnd Noora tũudem. Woto b sãama tẽnga wʋsgo.

⁵³B modga Israyɛl kambã tɩ b zoe n tɩ soond b soondg tẽnsẽ.

⁵⁴Kiuug a wɛ soaba, Kislewu kiuug, piig la a nu raare, koabg la pis-naas la a nu yʋʋmde, a Antiyokus kɩtame tɩ b zaoolg maan-kugra zugu, wãab sabaabã, Grɛk rãmb wẽn-naand a ye. Zɩɩda tẽns a taabã la tẽn-bula fãa pʋgẽ, b mee a maanda kʋʋb zĩisi.

⁵⁵Zagsa noya la sɛk zĩiga b yõoga wisdu.

⁵⁶B sã n yãend Noora sebr fãa b ra pãrsd-a lame n yõog bugum.

⁵⁷B sã n da yãend sebr sõng ned nengẽ, b sã n da tuk ned sẽn deegd-a Wẽnnaam noore, b ra kʋʋd-a lame wala dĩma sẽn wilgi.

⁵⁸Kiuug fãa, b ra sɩbgda Israyɛl kamb niyns b sẽn ling tɩ b kɩɩsd dĩma noore.

⁵⁹Kiuug fãa, pisi la a nu raare, b ra kʋʋda maand yũ-noog maan-kugra zugu.

⁶⁰Wala noora sẽn da yalsã, b ra kʋʋda pabg niyns sẽn da ket n kẽesd b kamb bãongo.

⁶¹B ra loeta kamba ne b ma rãmba n naag-ba n kʋ, ma wã, buudã la sẽn kẽes-a biiga bãongã.

⁶²Ne rẽ fãa Israyɛl kamb wʋsg talla b tẽeb kẽnkẽ, b kenga b pɛlga, b zãgsa dɩɩb sẽn kisi,

⁶³b saka kũum la b pa rẽgem b mens ne rɩɩb sẽn kis ye, b ka sãam Wẽnd zood n tãag b kũum ye.

⁶⁴Dasma yɩɩ ra-beedo a Israyɛl yĩnga.