Read SEBR SÕNGO, 1998 1MAKABE 10 Bible Online

1MAKABE 10 - SEBR SÕNGO, 1998 bible

1MAKABE 10

¹Grɛk rãmba zamaanẽ, yʋʋm koabg la pis-yoablẽ, a Antiyokus biig a Aleksãndr, neb kẽer sẽn da boond tɩ Epifan, yikame n wa kẽ Ptolemayis ne pãnga. Ptolemayis rãmba sulga b menga t'a sɩng n na n dɩ naam be.

²A Demetriyus sẽn wʋm dẽ a tigma tãb-biis zembala n na n tɩ tak zabr ne a Aleksãndr.

³A Zonatã paama a Demetriyus sebre sẽn kõ kaseto t'a rat-a-la ne laafi la ne paoongo.

⁴A Demetriyus ra yeta a menga: «D ning pãng n yõg zood ne nin-bãmba, ka rẽ yaa ne a Aleksãndr la b na n yõg zoodo tɩ tõnd lebg b bɛɛba.

⁵B sã n yaool n paam a Aleksãndr zoodo, b wat n tẽega namsg niyns m sẽn nans-a, yẽ ne a ba-biis la a buudã.»

⁶A kõ-a-la sore t'a yãk tãb-biisi la a kud zab-teedo, n yeel-a tɩ b bool taab tɩ zo-rãmba la a pʋlem t'a na yiis roogẽ a sẽn da pag b rãmb wa bi-beese, zabr kõn-ling-m roogẽ.

⁷A Zonatã waa Zerizalɛɛm n karem zooda sebr, zãma wã la neb niyns sẽn da be-b zabr kõn-ling-m roogẽ wã.

⁸B pɛleng yɩka wʋsgo, b sẽn wʋm tɩ dĩma kõ-la a Zonatã sore t'a yãk tãb-biisi.

⁹Zabr kõn-ling-m rooga taoor dãmba yiisa b sẽn da pag b rãmbã n kɩs a Zonatã tɩ ye reeg-ba n lebs b buudu.

¹⁰A Zonatã kẽe Zerizalɛɛm n sɩng a meebo la a manegre.

¹¹A kõo metba noore tɩ b le yik lal-gũbrã la b gũbg Siõ tãnga ne kug sẽn peese tɩ zab n tõog-a lebg toogo la b maana boto.

¹²A Bakidɛs ra kɩtame tɩ b me do-bɛda la a ra ninga sãamb be la sãamba zoeeme.

¹³B fãa zoeeme n leb b ba-yiri.

¹⁴Bɛtsur pʋgẽ bala la b ra bas neb kẽer sẽn da ka le pʋʋsd Wẽnde. Bɛtsur n da ya b soond-n-põs zĩiga.

¹⁵A Demetriyus sẽn pʋlem a Zoanatã bũmb ninga fãa, dĩm a Aleksãndr wʋmame. A bãnga zabã la raood ning yẽ ne a saam-biisa sẽn maane. B wilg-a-la namsg ning b sẽn namse.

¹⁶Dẽ la a yeel yã: «Zĩ bʋg la d na n le yãend ned sẽn wẽnd a Zonatã? D yõg zood ne-a. D bao a sõngre.»

¹⁷Dẽ la a gʋls sebr n tool-a la a yeela woto:

¹⁸«Dĩma Aleksãndr n pʋʋsd a saam-biig a Zonatã.

¹⁹M wʋmame tɩ f yaa ned sẽn tar pãnga n tog ne tõnd zoodo.

²⁰Dũnna menga d kõt-f-la maan-kʋʋr naam f soolmẽ la b na n bool-f lame tɩ dĩma zoa. D toond-f-la la fuyor miuugu la sãnem pugla. D datame tɩ f kẽ tõndo tɩ d yɩ zoodo.»

²¹A Zonatã yeelga a naam la a tõog futã sẽgda kibs raare, Grɛk rãmb zamaanẽ koabg la pisoob yʋʋmde, kiuug a yopoe soaba. A yãka tãb-biis zembala sẽn nan ya poala la a kuda zab-teedo.

²²A Demetriyus wʋma a Zonatã sẽn maana la a sũur sãamame. A ra yeta a menga:

²³«Bõe la tõnd maan yã t'a Aleksãndr wa reng tõnd n yõg zood ne Zʋɩf rãmba n le tũ rẽ n paas a pãnga?

²⁴Ma me na n gʋlsa Zʋɩf rãmba sebre n kãab b naam la kũuni, tɩ b wa kẽ tõnd n sõng-do.»

²⁵A sebra la woto:

²⁶«Dĩm a Demetriyus n pʋʋsd Zʋɩf rãmbã. Yãmb pa zãgs tõnd sẽn da sed bũmb ningã tɩ d ket n yaa zood dũnna wã ye; yãmb ka bas tõnd n kẽ d bɛɛba ye. D mii rẽ la d sũur yaa noogo.

²⁷Kell-y n paa-y ne-do tɩ d na yãe kũun sõma n dol y pʋ-peelem.

²⁸D na modg tɩ y pʋɩɩr yɩ toore la na yɩ zu-noog pʋɩɩre.

²⁹Dũnna tɛka d basd-y-la yõora yaoob taale n paas yamsma la sãnem gilã.

³⁰Kooda pʋɩɩr a tãab soaba yãkr sɛɛme. Tɩɩsa biis pʋɩ-sʋk sẽn da tog n yɩ m dẽnna, dũuna tɛka b kõn le reeg-a, Zɩɩda tẽnga la Samari la Galile, tẽns niyns sẽn fãoog-b ne Zɩɩda tẽnga ye.

³¹D datame tɩ Zerizalɛɛm yɩ sõmblem tẽnga, n ka yaood bũmb ye, n ka kɩt kood lemse bɩ bõn-yood a taab ye.

³²M ka rat n soog doog ning b sẽn boond tɩ zabr kõn-ling-ma ye. M dɩk-a lame n kõt maan-kʋʋd kãsenga; yẽ n na n bao a sẽn dat a soab n ning a pʋgẽ, a gũub yĩnga.

³³M datame tɩ m soolma pʋgẽ, Zʋɩf buud fãa sẽn yi Zɩɩda tẽng n kẽng yembdo paam a meng marsã, la kõn tũ ne ligd yaoob ye. M pa rat tɩ ned ba a ye yao a rũms ye. M pa rat tɩ ned yao a yõor ye.

³⁴M datame tɩ Zʋɩf buud fãa sẽn be m soolmẽ vʋʋs ne yembd tʋʋma, ne pãn-tʋʋma kibs raare, vʋʋsg raare, kiu paala, tig-raase. Vʋʋsga sɩngda b ket tɩ ra-yɩta n tãag b loog tɩ rabɩtẽ, sã n ya ne tig-bɛdã.

³⁵Baraare b ka sokd samde la b ka boond bʋʋd ye.

³⁶Dĩma na n yãka neb tus pis-tã, Zʋɩf rãmba sʋka n maan a tãb-biisi la b yaooda na n yɩɩ wa b taaba rẽnna.

³⁷Dĩma sẽn tar tãb-biis tʋʋmd n yɩɩd zĩig ningã la b na n ning kẽere la kẽer me tʋʋmd na n yɩɩ dĩma pʋg sẽn peel ne b rãmb tʋʋmde. Wala dĩma sẽn sed ne a Zɩɩda tẽnga, m datame tɩ nin-bɛdã la taoor dãmbã da solg b mens ye la b vɩɩnd b rog-n-mik vɩɩm.

³⁸Tẽns a taabã sẽn ya Samari soolem n yaool n kẽed Zɩɩda, b rɩk-ba n fãoog ne Zɩɩda n sõd-b ne Zɩɩda tɩ b sak naab a ye la maan-kʋʋd kãseng a ye tãa.

³⁹M dɩkda Ptolemayis tẽng ne a tẽn-kõgsã n kõt Zerizalɛɛm, woto Zerizalɛɛm na paam ligd tɩ sek a beoog-beoog maanda rũms raabo.

⁴⁰Yaa wanzurf wakɩ koeems tus piig la a nu la m meng m toor na n kɩt tɩ b reeg yʋʋmd-yʋʋmd fãa b sẽn tog n deeg zĩig ninga, Zerizalɛɛm yĩnga.

⁴¹Ligd ninga tʋʋm-tʋmdba sẽn bas n ka yao pĩndã, b na n wa ne-a marsã, wẽnd dooga tʋʋm yĩnga.

⁴²Wanzurf wakɩ koeems tus a nu wã m sẽn mii n deegd yʋʋmd-yʋʋmd fãa wẽnd dooga ligdẽ wã na n lebga maan-kʋʋdba soolem, maan-kʋʋdb niyns sẽn na n tʋm yʋʋmda pʋga.

⁴³Mam soolma pʋgẽ, ned ning fãa sẽn na n zoe n wa soond Zerizalɛɛm wẽnd dooga pʋg bɩ a sɛɛgẽ, b kõn le sok a samd buud ba ye la b kõn deeg a fɩ.

⁴⁴Wẽnd dooga tʋʋm yĩnga, meeb bɩ manegre, b tõe n yãka ligdã dĩma koglgẽ.

⁴⁵Zerizalɛɛm dotã la a lal-gũbra manegr yĩnga b tõe n yãka ligdã dĩma kogl-gẽ. Zɩɩda tẽns a taaba me lals na n manega ne dĩma ligdi.»

⁴⁶A Zonatã ne zãma wã kelga sebra karengo la b pa reeg ye, b pa tẽ ye. B ra ket n tẽra yel-beed niyns a Demetriyus sẽn maan Israyɛl, b ra ket n tẽrame t'a zãa bãmba wala yem-daado.

⁴⁷B kẽ-la a Aleksãndr tɩ yẽ kũuna n da yɩɩd wʋsgo, b kell n yɩɩ zood ne yẽnda.

⁴⁸Dĩm a Aleksãndr tigma tãb-biis kʋʋngo n wa tak zabr ne a Demetriyus.

⁴⁹Zabra pa yãe n sɩng ye t'a Aleksãndr tãb-biisa lɛɛg n zoe. A Demetriyus sẽn pʋg-ba, a tõog-b lame.

⁵⁰A Demetriyus zaba ne a sũur fãa la baas n yɩ-la a kũum daare.

⁵¹A Aleksãndr tʋmame tɩ b tɩ yeel Ezipt dĩm a Ptoleme:

⁵²«Ade, m lɛɛg n wa m soolmẽ, m waa n zĩi m ba rãmb naam zaoorẽ, n dɩt naam, m tõoga a Demetriyus, m soolma fãa leba m nugẽ,

⁵³m taka zabr ne a Demetriyus n tõog-a, yẽnda ne a tãb-biisã; m deega a naam.

⁵⁴Dẽ yĩnga m datame tɩ d yõg zoodo tɩ f kõ maam f bi-pgla tɩ m maan m paga, tɩ fo lebg m dɛɛmba. Bãng tɩ m na n kõo foo ne f biigã kũun sẽn tagme, wala dĩm bal sẽn tõe n kõ a buudu.»

⁵⁵Dĩm a Ptoleme leoka woto: «Yaa zu-noog kãseng la f paam yã, f sẽn leb f ba rãmb soolmẽ n le rʋ b naam zaoore.

⁵⁶Fo sẽn dat bũmb ning fãa na pidsi, la m kotame tɩ f wa tɩ d seg taab Ptolemayis tẽnga tɩ d bãng taaba la m tõog n lebg f rɛɛmb wala f sẽn datã.»

⁵⁷A Ptoleme yii Ezipt tẽng ne a bi-pugl, a Kleopatr, n wa Ptolemayis. Yɩɩ yʋʋm koabg la pisoob la a yiiblẽ.

⁵⁸Dĩm a Aleksãndr yii n deeg-a lame la a Ptoleme rɩka a biiga n kõ-a t'a maan a paga la yɩɩ kibs kãseng Ptolemayis tẽnga, wala dĩm dãmba sẽn minim n maanẽ.

⁵⁹Dĩm a Aleksãndr boola a Zonatã t'a wa tɩ b yãend taaba.

⁶⁰Dẽ la a Zonatã wa Ptolemayis. A fama a meng wʋsgo n seg dim dãmb a yiibã n kõ bãmb ne b zo-rãmba wanzurf la sãnem. Kũuna yɩɩ wʋsgo la taa a yam.

⁶¹Nin-yaals me, neb sẽn ka be bark Israyɛl tẽn-pẽelmẽ, sũ taab n wa ne mo-beedo. Dĩma ka kelg b ye.

⁶²A kɩtame bala tɩ b yees a Zonatã futã n lebs nufa n yeelg a. B reega dĩma noor n maan wala a sẽn wilgã.

⁶³Dĩma kɩtame t'a Zonatã zĩnd n yegl-a la ad a sẽn yeel a kug-zĩidbã: «Saag-y tẽngã ne a Zonatã la y wilg tɩ ned ba a ye da maan mo-beed a poorẽ ye, t'a pɛlg gãand sɩɩ.»

⁶⁴Sɩda neba sẽn yãe waoogr ning b sẽn waoog a Zonatã, b sẽn wʋm na-yir dãmba sẽn togs bũmb ninga, b sẽn yãe fuug ninga b sẽn yeelg-a, rõatba fãa ninga tĩiga.

⁶⁵Dĩma sakame n gʋls a Zonatã yʋʋr a pipi zo-rãmb bɛda sʋka la a kõ-a-la tãnsoab naam, la tẽnsa yɛl welgre.

⁶⁶A Zonatã lɛɛg n waa Zerizalɛɛm ne laafi la sũ-noogo.

⁶⁷Grɛk rãmb zamaanẽ yʋʋmd koabg la pisoob la a nii, pipi Demetriyus biig a Demetriyus yii Krɛt tẽnga n lɛɛg n wa a ba-yiri.

⁶⁸Dĩm a Aleksãndr sũur sãamame la a lɛɛg n waa Antiyos.

⁶⁹A Demetriyus kõ-la a Apoloniyus Sele-Siri naam. A Apoloniyus tõog n tigma tãb-biis zembala n wa wẽ a sik Zamniya tẽnga la a toola a Zonatã woto:

⁷⁰«Zonatã, ad yaa foom f ye bala n zẽkd f zug ne maam. Foo n kɩt tɩ b yaand maam la b tʋʋsd maam. Bõe tɩ fo zao f tãmsa zut n dɩt beem ne tõndo?

⁷¹F sã n teeg f meng pãnga bɩ f seg d tẽn-nabrẽ wã tɩ d wags taaba. Bãng tɩ tẽn-bɛd sẽn tar pãng n be m poorẽ.

⁷²Sok n bãng m sẽn yaa a soaba la f bãng sẽn sõngd-b maama. B fãa gomdame tɩ foo ne f neba kõn tõog n yals d taoor ye la b kot f lame tɩ f tẽeg tɩ yaa naoor a yiib la b rig-f f ba rãmba b tẽngẽ.

⁷³Marsã f kõn tõog n teeg n yaas d wiidi la d tãb-biis ka tɛk taoor ye. Zĩiga yaa labre, pĩig ka sẽn na n lilli, bok ka sẽn na n soonde, ka tõe n wudg n põs ye.»

⁷⁴A Zonatã wʋma a Apoloniyus gõmdã t'a yam bondg. A yii Zerizalɛɛm ne tãb-biis tus piiga. A saam-biig a Simo pʋga a poorẽ ne sõngre.

⁷⁵Yaa Zope la a Zonatã sɩng zabra takre, Zope rãmb da paga b tẽnga kʋɩlense la a Apoloniyus tãb-biisa da bee pʋgẽ. B sẽn sɩng zabre,

⁷⁶tẽnga rãmb zoe rabeem n pak b kʋɩlense t'a Zonatã paam pãng n tõog Zope.

⁷⁷A Apoloniyus tonga wed-dʋʋdb tus a tã la tãb-biis ka tɛk n tees Azot wala a rat n pɩʋʋga tẽnga tõre mik a ra baoodame bala n na n yɛdg a nebã tẽn-nabrẽ t'a wed-dʋʋdb ra labsame la a pʋg ra peela ne-ba.

⁷⁸A Zonatã pʋg-b-la Azot tɩ b na n seg taab be.

⁷⁹A Apoloniyus ra maana yam n solg wed-dʋʋdb tusr b poorẽ.

⁸⁰Mik a Zonatã nebã talla zabr yibeoogo n ta zĩ-sobdo.

⁸¹A Zonatã kosa a neba tɩ b ra bas raood ye. Sẽn tar n tarẽ, bɛɛba wiidi waa n yɛɛme.

⁸²La wiidã sẽn wa n yɛ zãnga a Simo pooga ne a neba. Bɛɛba basa raoodo n ning tĩiga.

⁸³Wed-dʋʋdba sẽegame; b zoe n waa Azot n kẽ n soond b wẽnd a ye doogẽ, Bɛt-Dagõ, n tẽed tɩ b na põse.

⁸⁴A Zonatã ninga Azot ne a tẽn-toosa fãa bugum. A paama a bɛɛba laog ka tɛka n wʋke la a yõoga wẽn-naanda roogã bugum ne sẽn da soond-ba a pʋgẽ wã.

⁸⁵Neb tus a nii n lʋɩ, sẽn põs-b sʋʋg paa bugmẽ.

⁸⁶A Zonatã tɩ wẽe a sik Askalõ. Askalõ rãmb yiime n seg a ne waoogre.

⁸⁷A Zonatã lɛɛg n waa Zerizalɛɛm ne a nebã la arzɛk ka tɛka.

⁸⁸Dẽ taa a Aleksãndr yam t'a na n le waoog a Zonatã n paase.

⁸⁹A toola a Zonatã sãnem kak sẽn pit kokore wala a sẽn yɩbẽ n maan ne rĩm biisi la a paas-a-la Akarõ ne a tẽn-toose.