Read SEBR SÕNGO, 1998 1MAKABE 11 Bible Online

1MAKABE 11 - SEBR SÕNGO, 1998 bible

1MAKABE 11

¹Ezipt dĩma a Ptoleme tigma tãb-biis sẽn ka tɛka wa mogr noorẽ bĩisri, n paas koom kogendo, n tʋlg ne rabaare, n deeg a Aleksãndr soolma n paas a rẽnna.

²A waa Siri ne gom noodo tɩ neba ra pakd b tẽns kʋɩlens t'a kẽedẽ la b segd-a ne waoogre wala a Aleksãndr sẽn da kõ noore, t'a ra yaa a rɛɛmba.

³Mik a Ptoleme sã n da paam n kẽ tẽngẽ fãa, a ningda tãb-biis be.

⁴A sẽn wa n kolg Azot, b wilg-a-la a Dagõ wẽnd doogã sẽn dɩ bugum, n wilg-a Azot meng ne a tẽn-toos sẽn lebg raboogo, n wilg-a neb sẽn ki n dɩga, tɩ bugum dɩ kẽer n keese. Sɩda rĩma ra tõe n yãeeme, a sẽn tũud sor ning fãa, neb ka tɛka a Zonatã sẽn da kʋ n gãnege.

⁵B tʋlgame tɩ dĩma sãbs a Zonatã, yaa rẽ la b wilg-a a Zonatã sẽn maan fãa. La dĩma ka yeel tɩ bũmb ye.

⁶A Zonatã tol n kẽe Zope ne ziiri n bʋʋg dĩma be tɩ b pʋʋs taaba. A tol n gãanda be.

⁷A tol n yãag-a lame n ta Elewutɛr kʋɩlga n yaool n lɛɛg n wa Zerizalɛɛm.

⁸Dĩm a Ptoleme tõoga mogra noor tẽnsã n tãag Selesi (yaa Selesi ning sẽn be-a Mogr noore). A ra baoodame n na n tʋm a Aleksãndr beedo.

⁹A toolame tɩ b yeel a Demetriyus: «Wa tɩ d yẽs tɩ ned kam fãa sũur gãande. M biig ninga sẽn yaa a Aleksãndr pagã, m na reeg-a n kõ-fo la m na n lebs-f-la f ba zaoorẽ.

¹⁰M sẽn dɩk m biigã n kõ-a wã pa noom-m marsã ye t'a baoo n na n yãka m yõore.»

¹¹Yaa a Aleksãndr sẽn da rat n fã a soolma la a ra gomd woto.

¹²A sɩd deega a biigã n kõ a Demetriyus. A yila a Aleksãndr poorẽ la b lebga beem ne taaba.

¹³A Ptoleme kẽe Antiyos la a teega a rĩir ne makr sẽn wilgd t'a lebga Azi naaba. Yaa makr a yiib la a ra teeg yã: Azi naam makre, Ezipt rẽnna.

¹⁴Wakat kãng t'a Aleksãndr meng bee Silisi. Beelẽ dãmba da baood n na n fʋsg n yi-la a soolmẽ.

¹⁵A sẽn wa n bãng yɛla nao la a baoo n na n zab ne a Ptoleme. A Ptoleme yii ne tãb-biis ka tɛka la b sega taaba t'a Aleksãndr lɛɛg n zoe.

¹⁶A zoe n diga Arabi n paam n põse. A Ptoleme n tõoge.

¹⁷Arabi rao sẽn boond t'a Zabdiyɛl fiuuga a Aleksãndr zugu n tool a Ptoleme.

¹⁸La rasem sẽn maan a yi a Ptoleme me kiime la tẽnga yik n kʋʋ Ezipt ned fãa sẽn da be b sʋka.

¹⁹Grɛk rãmb zamaanẽ, koabg la pisoob la a yope yʋʋmdã, a Demetriyus lebga na-kãsenga.

²⁰Wẽnd kãnga, a Zonatã tigma Zɩɩda nebã n tak zabr ne Zerizalɛɛm dãmba sẽn da pag b mens zabr kõn-ling-m doogẽ wã. B waa n tedga zab-te-bɛda n na n wã tẽngã.

²¹Nin-yaals sẽn da kis b buudu kẽng n tɩ togsa dĩma t'a Zonatã wẽe gũbri, a wẽe zabr-kõn-ling-ma gũbri.

²²Dẽ puuga dĩma sũuri. A tʋbr sẽn wʋme, tao-tao bala a Demetriyus rɩka Ptolemayis sore. A sẽn ta be la a sẽn gʋls a Zonatã n yeel-a t'a yik tʋʋlg-tʋʋlg n wa tɩ b yẽse.

²³A Zonatã wʋma a sẽn togsã la a kell n gũbga tẽngã. A kẽe Israyɛl nin-kẽemsa la maan-kʋʋdba sʋka n yãk a tũud-n-taase la a lʋɩɩ b taoore. A ka zoe a yõor yãkr rabeem ye.

²⁴A yii ne wanzurf, ne sãnem, ne fu neeba la kũun a taaba n dɩk Ptolemayis sore, n ta dĩma nengẽ t'a sũur maage, t'a ka le ges-a kegr-kegr ye.

²⁵Nin-yaals kẽer sẽn ka le tũud rog-n-mika tɩ rõd-a-la dĩma nengẽ.

²⁶Ne rẽ fãa dĩma maana ne a Zonatã wala pĩnd dĩm dãmba, n zẽk a yʋʋr a zo-rãmba faa taoore.

²⁷Yẽ n kell n yɩ maan-kʋʋd kãsenga, a naam pa woog ba bilf ye la a sõd-a-la a zo-rãmb kãsens sʋka.

²⁸A Zonatã kosame tɩ dĩma yiis yõor yaoodẽ Zɩɩda tẽng rãmba la Samari tẽnsa sẽn da rɩk n fãoog ne Zɩɩda wã. A kãabame tɩ yʋʋmd fãa a na kɩs dĩma wanzurf sẽn ta neb kobs-naas zɩɩbo.

²⁹Dĩma sakame la a yiisa sebre dẽ yĩnga, la ad bũmb ning sẽn da gʋls sebra zugu:

³⁰«Dĩm a Demetriyus n pʋʋsd a yao a Zonatã la Zʋɩf rãmb fãa.

³¹M toola sebr yãmb poorẽ d saam-biig a Lastɛn. Yaa seb kãng me la d toond yãmb tɩ y bãng sẽn be a pʋgẽ.

³²Dĩm a Demetriyus n pʋʋsd a saamb a Lastɛn.

³³D yeelame tɩ d na n maana neere ne Zʋɩf rãmbã tɩ b yaa zood ne tõndo. B yaa nin-tɩrse la b pa rat tõnd ne wẽng ye.

³⁴M wilgd-b lame tɩ b soo Zɩɩda tẽnga n paas tẽns a tã sẽn dɩk n fãoogã: Aferema, Lida la Ramatayim. Tẽn-kãens ne b tẽn-toosa boka Samari soolmẽ, n na n paas Zɩɩda rẽnna, n na n sõng sẽn kʋʋd-b maanda Zerizalɛɛm. Kõn le yɩ modgr ne bãmba tɩ b kɩs rĩma a sẽn da reegd yʋʋmd-yʋʋmd fãa wã ye.

³⁵Dũnna tɛka d basd-b-la taale ne yaood buud fãa sẽn da tog n deeg b nengẽ wala kood rẽemse bɩ yamsem, bɩ bũmb a to.

³⁶D sẽn yals bũmb ning ka wã kõn teem dũnna bɩ beoog ye.

³⁷Modg-y n gʋls m sebra sẽn wilg fãa n tool a Zonatã t'a reeg-a n ka tãn-sõnga zugu, zĩig ninga neb fãa sẽn tõe n karem-a.»

³⁸Dĩm a Demetriyus yãeeme tɩ tẽnga da tara laafi a nugẽ la ned ba a ye da pa zẽkd a zug ye. Dẽ la a bas a tãb-biisã tɩ ned kam fãa leb a zakẽ. Sãamb kẽer bal la a kell yã. B tẽnga yaa tẽn-bõones sẽn puk koom sʋka, bu-zẽmb dãmb zamaanẽ. Yaa rẽ la tãb-biisa sẽn ya-b tẽnga kamba yik n maand beem ne a Demetriyus, a sẽn bas-ba yĩnga.

³⁹A Trifõ da kẽeda a Aleksãndr. A sẽn mik tɩ tãb-biisa fãa da guglumda ne a Demetriyus, a tɩ yãenda Arabi dao a Iamlekos sẽn da gʋʋnd a Aleksãndr bi-bilf a Antiyokus.

⁴⁰A wɩnga a Iamlekos t'a bas t'a loog ne biigã n tɩ kõ-a a ba naam. A wilga a Demetriyus sẽn maan fãa, a wilga tãb-biisa sẽn da rɩt beem ning ne-a. A paa be n kaoose.

⁴¹A Zonatã tʋma wakat kãng tɩ b tɩ yeel a Demetriyus t'a yiis tãb-biis sẽn da ket n bob zabre n be Zerizalɛɛm do-lug-lugã la dot a taab pʋgẽ.

⁴²A Demetriyus leoka a Zonatã: «Ka rẽ bal la m na n maan foo ne f buuda yĩng ye, m na modg tɩ Wẽnd sẽn kõ-m daare bɩ foo ne f buuda paam waoogre.

⁴³Fo sẽn na n maan tɩ m pẽge, yaa f tʋm tãb-biis sẽn n n wa sõng-ma n tak zabre tɩ m ka le tar tãb-biig ba a ye ye, m neba zoe n bas-m lame.»

⁴⁴Yɩɩ woto la a Zonatã tees Antiyos tãb-biis tus a tã sẽn mi zabr neere. B sẽn ta dĩma nengẽ, a sũur yɩɩ noogo.

⁴⁵Bãng-y tɩ wakat kãng tɩ tẽnga neba ra tigma taab bãmb na ta tus koabg la pisi, tẽnga tẽnsʋka, n baood n na n kʋ dĩma.

⁴⁶Dĩma zoe n tɩ kẽe a zakẽ la tẽnga rãmb yãmba soeyã fãa n sigl zabre.

⁴⁷Dĩma boola Zʋɩf rãmbã tɩ b wa sõng-a. B reng tigma dĩma sɛɛgẽ n yaool n sẽeg n kẽ tẽngã la b sẽn kʋ baraare taa tus koabga.

⁴⁸B yõoga tẽnga bugum, b wʋka laog sẽn ka tɛka la b fãaga dĩma.

⁴⁹Tẽnga rãmb sẽn wa n mik tɩ b zãng lʋɩɩ Zʋɩf rãmb nugẽ, b basa raoodo la bõsa sugri.

⁵⁰Ad b sẽn yeele: «Tud nug tɩ d maan zoodo, tɩ Zʋɩf rãmba bas zabr ne-do, ne tẽngã.»

⁵¹B sɩd rɩka b zab-teedã n lobe, n bas zabre. Zʋɩf rãmba yʋʋr zẽka dĩma taoore la a soolma rãmb taoore. B yʋʋr sẽn yi woto, b lɛɛg n waa Zerizalɛɛm ne laog kãsenga.

⁵²A Demetriyus naam paama pãnga la a maasmẽ tẽnga paama laafi.

⁵³A waa n yik n lebsa a zelemde t'a moor yõsg ne a Zonatã. A yĩma a Zonatã sẽn sõng-a to-to n tar a yaoolg beoog sẽn vẽeg fãa.

⁵⁴Dẽ sẽn looge, a Trifõ lɛɛg n waa ne a Antiyokus. Ne a sẽn da ket n ya bilfã b fõgneg-a-la naam pugla t'a sɩng naam dɩɩbo.

⁵⁵A Demetriyus sẽn dasʋk n bas tãb-biis niynsã, lɛɛg n kẽe a Antiyokus. B sẽn zab ne a Demetriyus b tõog-a lame la a zoeeme.

⁵⁶A Trifõ kẽnga ne wobdo n zab n deeg Antiyos.

⁵⁷Yaa woto la dĩm bila a Antiyokus gʋls a Zonatã: «M ket n basda maan-kʋʋr naam ne foo; soog tẽns a tã la Akrabatɛn sẽn dik n fãoog ne Zɩɩda tẽngã la pa m zo-rãmb sʋka.»

⁵⁸A kɩtame tɩ b tool a sãnem laase la rɩɩb lagdo, n kõ-a sor t'a yũ ne sãnem wamde la a yeelg nufa la a sog sãnem mambre a kokorẽ.

⁵⁹A kõ-la a yao a Simo tãnsobendo t'a na n gũ Tir tẽn-peelem n tãag Ezipt toaaga.

⁶⁰A Zonatã sɩnga Efrat dʋund tẽn-bɛda la tẽn-bõonega saagre. Siri tẽng tãb-biig fãa tɩ kẽe a tãpo, n lebg a sõangda. B taa Askalõ tɩ tẽnga rãmb deeg-b ne waoogre.

⁶¹A yii be n ta Gaza; Gaza ka pak a tẽng noor t'a kẽ ye, la a gũbg-a lame n yõog-a la a zɛ a tẽn-toosã.

⁶²B waa n yõka a Zonatã sɛɛga la a bas-b-la laafi. Nanamsa kamb la a sʋgs yã, goam na n wa be beoog yĩnga, n tʋm b Zerizalɛɛm. A saaga tẽnsã n ta Damas.

⁶³A Zonatã wʋmame t'a Demetriyus tãnsoaben-dãmba waa Kedes, Galile tẽn-peelmẽ, ne tãb-biis ka tɛka la b raaba yaa b modg a Zonatã t'a tar n leb poorẽ.

⁶⁴A Zonatã basa a yao a Simo tẽnga pʋga n yaool n yi n tɩ seg-ba.

⁶⁵A Simo gũbga Bɛtsur; zabra kaoosame la tẽnga rãmb sẽn mik tɩ b pa na n põse,

⁶⁶b kosame n na n gom laafi goama. A Simo basame n pa le zab ye. A kɩtame tɩ b pak b tẽngã t'a kẽ ne a tãb-biis n deeg-a n yãmbe.

⁶⁷A Zonatã me ra tɩ wẽe sik ne a Tãb-biisã Zenesar noorẽ, n vẽeg beoog n ta Asor.

⁶⁸Nin-zẽmba tãb-biisã welga taab sags a yi tɩ kẽer na n seg a Zonatã tẽn-nabrẽ, kẽer na n lill tãmsẽ tɩ b na soos n ling-ba. B sẽn waa n babsd Zʋɩf rãmba tẽn-nabrẽ,

⁶⁹sẽn da be-b tãnga zugã yi-la b pẽgsẽ n na n sɩng zabre.

⁷⁰A Zonatã tãb-biisa zoeeme. Ba a ye ka pa ye sã n ka a Absalom biiga a Matatiyas la a Kalfi biig a Zɩɩda. Bãmb b yiiba fãa da yaa tãnsoaben-dãmba.

⁷¹A Zonatã kẽesa a futu n wʋk tõm n yugl a zugu n sɩng pʋʋsgo.

⁷²A sẽn lɛɛg n wa tak zabre, bɛɛba zoeeme.

⁷³A neba da sɩnga zoeese la b sẽn yãend rẽ b lɛɛg n wa sõng-a lame la b riga b bɛɛbã n ta Kedɛs, b sika zĩigẽ. B tol n paa be n gãande.

⁷⁴Bɛɛba sẽn ki baraar taa tus a tã. A Zonatã leba Zerizalɛɛm.