Read SEBR SÕNGO, 1998 1MAKABE 12 Bible Online

1MAKABE 12 - SEBR SÕNGO, 1998 bible

1MAKABE 12

¹A Zonatã mikame tɩ yɛla teesa a sẽn nongẽ t'a na n tʋm neb Rom tẽnga, zooda tẽegre la a a yẽegr yĩnga.

²A toola sebr Spart dãmbã la neba a taaba, zooda yãngr yĩnga.

³Sẽn tʋm b rãmba kẽnga Rom la b taa nin-kẽemba tigsg zĩigẽ la b goma woto: «A Zonatã sẽn ya tõnd maan-kʋʋd kãsengã ne d buuda taoor dãmb n tʋm-d tɩ d wa yõg zoodo ne yãmb wa pĩnda.»

⁴Nin-kẽemba kɩs-b-la sebre; b sẽn ta tẽng ning fãa n wilg seb kãnga, tẽnga soaalba basd-b lame tɩ b loog ne laafi n leb b tẽngẽ.

⁵Woto n da be a Zonatã sebra pʋga, sebr ning a sẽn gʋls Spart dãmbã:

⁶«Maan-kʋʋd kãsenga a Zonatã ne a buuda taoor dãmba, ne maan-kʋʋdb a taaba fãa n naagd tẽnga gilli n pʋʋds Spart dãmb, b saam-biisi.

⁷Daar zãaga bilf marsã, d maan-kʋʋd a Oniyas da paama y dĩm a Areyos sebre, la seb kãng pʋga a ra yetame tɩ yãmb ne tõnd yaa saam-biisi. D ket n tara a sebrã d nugẽ.

⁸A Oniyas reega ne waoogre b sẽn tʋm a soab ne sebrã tɩ sebrã ra gomda zood la lagem-taab yelle.

⁹Sã n ya ne tõndo, kaset a woto ka pakr ye, tɩ sɛb niyns sẽn pidsd tõnd ne raoodo, la b bʋkd d sũuri, yaa Wẽnd sẽn kõ tõnd b rãmbã tɩ be d nugẽ wã.

¹⁰D sã n baas n tool y sebre n na n nek saam-biirã la zooda sẽn be tõnd ne taab sʋkã, bãng-y tɩ yaa kaoosga sẽn lʋɩ sʋkã. Sɩda d sẽn paam y sebrã yʋʋm zãra la d pa rat tɩ kaoosga wa ne sãand ye.

¹¹Wala sẽn tog la sẽn segd tɩ saam-biis maan ne taaba, tõnd ka viigd ne yãmb yell tẽegr d kibs la d wẽn-kosg raare ye, d maand kʋʋbo la d pʋʋsg wakat ye.

¹²Y yʋʋra sãta moogo tɩ d wʋmnẽ la d noogd d sũuri.

¹³Yel-pakr buud ka tɛka la zaba n da wulumdi; d yagsa tʋlga d wãabo.

¹⁴Tõnd pa tʋlg tɩ zab bãmb wa ne yãmb la d zo-rãmb a taaba yaams ye.

¹⁵Wẽnd pʋs n wilga b pãnga n fãag-do. Wẽnd deega tõnd d bɛɛba nusẽ, Wẽnd kɩtame tɩ b rɩ yãnde.

¹⁶Dũnna tõnd yãka a Antiyokus biig a Numeniyus la a Zasõ biiga a Antipatɛr n tʋm-b Rom tẽnga tɩ b le tɩ yãng zoodã la saam-biirã sẽn be d sʋk al daar zãrã.

¹⁷D kos-b lame tɩ b ta yãmb nengẽ n pʋʋs yãmba la b kɩs-y sebre tɩ zooda la saam-biirã sɩd le yãnge.

¹⁸D tẽedame tɩ y sã n leok-do y na maan neere.»

¹⁹Sã n ya sebr ning a Areyos sẽn da tool a Oniyas, ad bũmb ning sẽn da be a pʋgẽ:

²⁰«Spart dãmb dĩm a Areyos n pʋʋds maan-kʋʋd kãseng a Oniyas.

²¹Sebr a ye pʋgẽ la d karemd tɩ Zʋɩf rãmb ne Spart dãmb yaa saam-biisi, b fãa yaa a Abraam yagense.

²²Dẽ la d kot-y tɩ y maan sebr n wilg du y zamaana sẽn ya to-to.

²³Sã n ya tõndo, d wilgd-y lame tɩ yãmb dũmsi, yãmb paoong yaa tõnd n so wala tõnd dẽn me sẽn ya yãmb soolem. D yeta d sẽn tʋm b rãmba tɩ b wa wilg yãmb tɩ lagem-taara la d rata.»

²⁴A Zonatã wʋmame t'a Demetriyus tãnsoaben-dãmba le yika zabr ne yẽnda ne tãb-biis sõor sẽn yɩɩd pĩnd dãmbã.

²⁵Woto a Zonatã yii Zerizalɛɛm n seg-b Amat sẽnẽ; a pa sak tɩ b tõog n kẽ a tẽngẽ ye.

²⁶A maana dabaar n tʋm a neb bɛɛba sʋka. Bãmb n lɛɛg n wa yeel-a tɩ yaa yʋnga bala la b na n wa tak zabre.

²⁷Dɩlla zĩiga sẽn wa n sobge, a Zonatã yeela a neba tɩ b ra gũs ye, tɩ ned kam fãa pẽneg a zab-teed ne a menga la a maam daood yʋngã. A yalsa tãb-biis tik-tik n gilg sikã.

²⁸Bɛɛba sẽn wʋm t'a Zonatã seglame n gũud-ba, rabeem yõk-b lame la b widga bugum b sikẽ.

²⁹A Zonatã ne a neba ra nee bugma sẽn witi la sã n ka beooga sẽn waa n vẽege, b ka bãng tɩ b bɛɛba soos n zoeeme ye.

³⁰A Zonatã sɩnga b pʋgbo la a ka paam-b ye tɩ b ra paam n dʋuga Elewutɛr kʋɩlga.

³¹A Zonatã lɛɛg n taka zabr ne Arab rãmb sẽn da kẽed Zebdani la a tõog-b lame n wʋk b laogo n looge.

³²Yẽ ne a neba yikame n kẽ Damas n saag a tẽn-peelma fãa.

³³A Simo yẽ da teesa Askalõ sẽnẽ la a gõdg n waa Zope n wẽ-a n sooge.

³⁴A waa n wʋmame tɩ tẽnga rãmb ra baood n na n deega a Demetriyus. Yaa rẽ la a yals tãb-biisi tɩ b gũ tẽngã.

³⁵A sẽn lɛɛg n wa Zerizalɛɛm, a Zonatã tigsa nin-kẽembã la b yẽsa ro-bɛd meeb Zɩɩda tẽnga.

³⁶B goma Zerizalɛɛm lalsa yikri, n gom tɩ lalg sẽn ya wok la b tog n me n welg tẽnga ne tãnsoben-zakã tɩ ned da le kẽ be t'a raadame bɩ a koosdame ye.

³⁷B tigma taab n yẽs tẽnga manegre. Yaang lalga sẽn yegd kʋɩlgã ra lʋɩɩ bogre. A le maneg n mee sak ninga sẽn boond tɩ Kẽed-paoolgo.

³⁸Sã n yaa a Simo yẽ mee Adida, mogra noorẽ. A lebga tẽng sẽn tõe n zab n fãag a menga, n tar kʋɩlens sẽn sogd ne kutu.

³⁹A Trifõ da baood n na n dɩɩ naam Siri, Filisti la Libã; a Antiyokus a yoob soaba naam zaoor la a ra baooda.

⁴⁰A ra zoeta a Zonatã na n wa tak zabr ne a n gɩdg-a t'a raaba ka tõog n pids ye. Woto a bao a sẽn na n maanega n paam-a n kʋ. A Trifõ yika ne a tãb-biisi n wa Betsã.

⁴¹A Zonatã me tũusa a zab-zabdb tus pis-naase n yi n seg-a.

⁴²A Trifõ sẽn mik t'a waa ne tãb-biis ka tɛka a ka saag n bao a yõkr ye.

⁴³A tol n deeg-a-la ne waoogre n kõ-a kũuni, n yeel a meng tãb-biisã tɩ b reeg a noor wa yẽ rẽnna.

⁴⁴A leoka a Zonatã: «Bõe tɩ f nams neb kʋʋng a woto fãa tɩ zabr dabeem yaool n ka beẽ?

⁴⁵Woto wã, lebs-ba b zagsẽ, kees neb kẽer bal sẽn na n tũ-fo tɩ d kẽng Ptolemayis tɩ m tɩ reeg tẽn-kãnga la tãnsoben-dot a taabã ne b tãb-biis la b tẽnga taoor dãmba sẽn ket b pʋgẽ n kõ-fo. Dẽ poore marsã m na rɩk m tẽnga sore, tɩ yaa rẽ yĩng bala la m wa ka.»

⁴⁶A Zonatã pelga a pʋg ne-a, n maan wala a sẽn wilgã. A lebsa a tãb-biisã Zɩɩda tẽnga.

⁴⁷A keesa neb tus a tã, n yãk tus a yi n bas Galile, n yãk tusr tɩ b pa ne-a.

⁴⁸A Zonatã kẽe Ptolemayis la Ptolemayis rãmb paga b kʋɩlense n yõk a Zonatã. Sã n ya neb niyns fãa sẽn tũ-a n kẽ tẽnga pʋga, b yõga bãmb n kʋ.

⁴⁹A Trifõ tʋma a zab-zabdba la a wed-dʋʋdba Galile la mogra noorẽ tẽnse, la b tɩ kʋʋ sẽn da kẽed-ba a Zonatã fãa.

⁵⁰Wakat kãng marsã la b bãng t'a Zonatã ne a yãagdba yell sãamame tɩ b paam-b lame n yõge. B kenga taab sũuri b sũ taab n na n zabe.

⁵¹Sẽn da pʋgd-b bãmbã bãngame tɩ b zabda ne b sũur fãa n na n fãag b yõore la rabeem yõk-b lame tɩ b lɛɛg.

⁵²Tãb-biisa fãa paam n taa Zɩɩda tẽng ne laafi, b yãba a Zonatã ne a tũud-n-taase la b ra digda rabeem. A Israyɛl zãng fãa kelma kʋʋre.

⁵³B ra gomda woto ne taaba: «Bu-zẽmba baood n na n kʋ-d lame, tɩ d ka le tar naab la sõangd ye. Dẽ yĩnga d zab ne-ba tɩ b yʋʋr menem moogo.»