Read SEBR SÕNGO, 1998 1MAKABE 13 Bible Online

1MAKABE 13 - SEBR SÕNGO, 1998 bible

1MAKABE 13

¹A Simo wʋmame t'a Trifõ tigsa neb ka tɛka n na n tɩ wã Zɩɩda tẽn-peelem.

³A tigsa nebã n sagl-ba: «M pa tẽed tɩ ned beeme n pa wʋm maam ne m kẽem dãmba la m yaopa la m buuda sẽn maan bũmb ning ne Wẽnd pʋgb la ne b do-sõngã manegre ye. M pa tẽed tɩ ned beeme n ka wʋm zabã la yel-beed ning sẽn lʋɩ d zuga ye.

⁴M ba-biisa fãa kii rẽ yĩnga, n-ye, yaa rẽ yĩng la b ki yã, n bas maam m yembre bala!

⁵Mam pa baood n na ligl m yõor ye. M saka namsg buud fãa tɩ mam ka yɩɩd m saam-biisa ye.

⁶Dũni wã ninsaalb dɩta beem ne tõndo, n sũ taab n na n kʋ-d zãnga, la m na zab ne-ba n dol wẽng ninga b sẽn maan ne d buudã, ne d do-sõngã, ne d pagba la d kambã.»

⁷A Goama sẽn lʋɩ neba tʋbrẽ la raood sẽn le wa.

⁸B naaga taab n moone: «Foo la tõnd koagenda; foo n deeg a Zonatã naam Zɩɩda tẽngẽ.

⁹Lebg tõnd tãnsoaba la f sẽn na n yeel-d tɩ d maan bũmb ninga, d na maane!»

¹⁰A tigma sẽn tõe n zab-ba fãa la b zɛɛga ne Zerizalɛɛm lalsã la a lal-gũbra yikri.

¹¹A tʋma a Absalom biig a Zonatã Zope tẽng ne tãb-biis zembala. A diga bɛɛba, a kẽ b tẽngẽ n soog-a.

¹²A Trifõ me yii Ptolemayis ne tãb-biis ka tɛka n dɩk Zɩɩda sore. A Zonatã tũume la rẽ tɩ b balg-a-la bãnga.

¹³A Simo wẽ-la a sik Adida tẽn-nabrẽ.

¹⁴A Trifõ bãngame t'a Simo ra segend n na n taka zabr ne yẽnda t'a tʋm tɩ b tɩ yeele:

¹⁵«Ad tõnd sẽn balg a Zonatã bãngã, yaa ligd poorẽ, ligdã sẽn da tog n yao dĩma poorẽ, tɩ yẽ n da so yɛlã.

¹⁶Dɩlla tʋm tɩ b wa ne wanzurf sẽn ta neb koabg la pis-tã la a nu zɩɩbo la f tũnug a kamb a yiibu tɩ b wa reeg a zĩiga tɩ d zoeta a sã n wa yi roogo bɩ a lebg tõata. Y sã n maan wa m sẽn wilgã a Zonatã na le paam a menga.»

¹⁷A Simo bãngame tɩ yaa zirẽ la b yagda, ne rẽ fãa a toola ligdã la kamb a yiibã.

¹⁸A ra zoeta neba na n wa rɩ beem ne-a n yetẽ: «Yaa ligda sẽn pa toola yĩng la b kʋ a Zonatã.»

¹⁹Ligda ne kamb a yiiba taa a Trifõ la a maana zãmbo n ka bas a Zonatã ye.

²⁰A Trifõ yik n kẽe tẽngã n na n wãa-a. A wẽnemd n tũu Adora. A Simo ne a neba ka kõ-a sor ye.

²¹Sẽn da be b zabr kõn-ling-m doogẽ wã tʋmame tɩ b tɩ yeel a Trifõ t'a tũ weoogẽ wã n wa sõng-b ne rɩɩbo.

²²A Trifõ yii ne a wed-dʋʋdba fãa n na n kẽng b sõngr la badaare sapɩlem dʋʋga wʋsgo t'a pa tõog n zãag zĩig ye. A tɩ wẽe a sik Galaad tẽnga.

²³A Trifõ sẽn waa n kolg Baskama a kʋ-la a Zonatã la a mum-a-la be.

²⁴A Trifõ lɛɛg n leba a tẽngẽ.

²⁵A Simo kɩtame tɩ b tɩ wa ne a kẽema yĩnga la a mum-a-la Modin, b yaab rãmb tẽngẽ.

²⁶Israyɛl gill maana a kʋʋre n yãb-a n kaoos.

²⁷A Simo kɩtame tɩ b me a ba la a kẽem dãmba yaad ne kug sẽn pees n ya saalg zĩig zãnga, bũmb sẽn lugi n tõe n yãend al yɩɩga.

²⁸Rot sẽn sɩng yaleng b tẽngr n baasd sɩlemse b yĩngr la a me bãmb b yopoe n yegl taaba: a ba la a ma la a kẽem-dãmb a naasa tẽegr yĩnga.

²⁹A mee lals gils sẽn tão n kul yĩngri. A mee-b lame n gilgi yaadã, a me-b lame n na n paam n tẽegd sẽn ki-ba yell daar fãa, a gesa b zugẽ wã n dõog la a yaglg koom-kogendo. A maan-b lame tɩ sẽn be-b mogra zug tõe n yãend-ba.

³⁰Yaa woto la a Simo me a meebã Modin yaadẽ, la a keta ne rũnna.

³¹Dĩma a Antiyokus ra ket n yaa bilfu la a Trifõ zãmb-a lame n kʋ-a.

³²A reega a zĩig n fõgneg Azi naam pugla. A tʋma tʋʋm wẽnse.

³³A Simo maneg n mee Zɩɩda tẽnga. A ninga ro-wogd la lals bɛd-bɛd n gilgi n ning kʋɩlens sẽn sogd ne kutu. A kẽe zab-teeda bĩngr zĩigẽ n ning koodo.

³⁴A yãka neb n tʋm a Demetriyus nengẽ tɩ b kos-a t'a bas b taal ne yaood buud fãa t'a Trifõ ra pɩɩs-b-la zãng kas. Bũmb da ka le ket b nugẽ ye.

³⁵Dĩm a Demetriyus leok-a-la wala a noor sẽn da yiisi. A gʋls-a-la woto:

³⁶«Dĩm a Demetriyus n pʋʋsd a Simo, dĩm dãmb zoa la maan-kʋʋd kãsenga la a naagd n pʋʋsda tẽnga kãsem-dãmb la Zʋɩf rãmba buudu.

³⁷Yaa ne sũ-noog kãseng la d reeg sãnem gilgã la laoga a taabã y sẽn toolã, la d nong n yẽsa laafi yẽsgo ne yãmba la d gʋlsa fadga rãmb tɩ b woog y samdã.

³⁸D sẽn yals bũmb ning ne yãmbã kõn teem ye, zab-teeda bĩngr dotã y sẽn me wã yaa yãmb n so.

³⁹Y tudgr la y kongr buud fãa paama sugri dũnna. Sãnem gilgu la d da tog n deeg y nengẽ la d basda taale wala bũmb ning fãa d sẽn da tog n deeg Zerizalɛɛm.

⁴⁰Neb sã n be yãmb sʋka n dat n lebg tãb-biis niyns d sẽn na n yãk n gũnug d mengã, d tõe n gʋls-b-la d tãb-biisa sʋka tɩ laafi kell n zĩnd d sʋka.»

⁴¹Yaa Grɛk rãmba zamaanẽ koabg la pisopoe yʋʋmdã la Israyɛl yi bu-zẽmba yembdẽ. Yʋʋmd kãng n waa n lebg b geels yʋʋmde.

⁴²Tẽnga rãmb yɛla toɛ-toɛ, wala b raaga, b koosem, b sɛdg sẽn sede daar ninga tiig n gʋlsda woto marsã: «Woto raare, Maan-kʋʋd kãseng la Zʋɩf rãmb tãnsoab a Simo sẽn lebg naab tɩ rɩẽ bɩ yʋʋm bɩtẽ bɩ a naama pipi yʋʋmde.»

⁴³A Simo wa n gũbga Gezɛr ne a tãb-biisi n baood a wãabo. A kaa bũmb sẽn lug n kul yĩngri la sẽn tõe n tus tɩ kẽnge. A tall-a lame n wa rell Gezɛr lal-gũbrã. A wurga võore n paam n kẽ tẽnga pʋga.

⁴⁴Neb n zĩnd a sẽn da ka bũmb ninga pʋga n yɩk n kẽ tẽngã la neba yɛɛsa wʋsgo.

⁴⁵Tẽnga pagb la kamb dʋʋ lal-gũbrã n kẽesd b fut la b noonẽ n kot a Simo t'a bas tɩ zabra sɛ. B ra yetame:

⁴⁶«Da maan ne-do wala d wẽnema sẽn tog ne, maan ne-do wala f nimbãan-zoeer sẽn wilg fu.»

⁴⁷A Simo zemsa a moor ne bãmba n bas zabre. A rig-b lame bala n yiis tẽngã n yiis a zirẽ-beed wẽnd-dãmbã n yɩlg tẽngã n yaool n na n kẽ ne pẽgr la bark pʋʋsg yɩɩla.

⁴⁸A sẽn yɩlg tẽnga ne a rẽgd buud fãa, a kẽesa neb sẽn mi Wẽnd waoogre. Tẽnga lals sẽn zẽk n sɛ a mee roog a meng yĩnga.

⁴⁹Sã n ya sẽn da pag-b mens Zerizalɛɛm zabr kõn-ling-m dooga pʋga b ra ka le tõe n yi n kẽng b pʋtẽ la b lɛɛg n wa ye, b ra ka le tõe n koos bɩ n da bũmb ye. Woto kom zaba ne-ba tɩ wʋsg tol n ki.

⁵⁰Bãmb me sẽn kos a Simo t'a bas tɩ zab sɛ, a sakame. A yiisa bãmba, n yɩlg zaka zãnga.

⁵¹Koabg la pisopoe la a ye yʋʋmde, kiuug a yiib soaba, pisi la a tãab raare, Zʋɩf rãmb kẽ-la a pʋgẽ ne kilsgu, n zãad koms vãado tɩ ruudg la kʋnde la kɛm wẽedẽ, tɩ pẽgr la bark pʋʋsg yɩɩl sãta, tɩ b bɛ kãseng la b lub yã, la b yaa n tus-a lame n yiis Israyɛl tẽn-peelmẽ.

⁵²A Simo kõo noore tɩ yʋʋmd-yʋʋmd fãa bɩ raarã yɩ kibs kãseng raare. A maneg n me zabr kõn-ling-m dooga sɛɛga, wẽnd dooga sẽn zao tãng ning zugã, roogo a ye, yẽ ne a zak rãmb yĩnga.

⁵³A Simo sẽn mik t'a biig a Zã yaa nin-sõngo, a kõ-a-la tãnsobend naam la a kẽes-a-la Gezɛr tẽnga.