Read SEBR SÕNGO, 1998 1MAKABE 15 Bible Online

1MAKABE 15 - SEBR SÕNGO, 1998 bible

1MAKABE 15

¹A Demetriyus biig a Antiyokus zĩnda mogra zugu n tool sebr Zʋɩf rãmba maan-kʋʋd kãseng la b taoor soaba a Simo.

²Sebra ra gʋlsa woto: «Dĩm a Antiyokus n pʋʋsd maan-kʋʋd kãseng la tãnsoab a Simo la Zʋɩf rãmba fãa.

³Ade, nin-yood n kẽ m yaab rãmb tẽnga. La m sẽn deeg naama, m daaba yaa m le reeg m soolma zãnga, n le ta m pĩnd toaagẽ. Ya rẽ yĩng la m yãk tãb-biisi la m maneg koom-kogendo.

⁴M datame n kẽ tẽngã n dok m sũur ne sẽn da wã-b m tẽnse ka tɛka la b loog ne m laoga fãa wã.

⁵M wilgda vẽenega tɩ nanamsã sẽn bas bũmb ninga taal pĩnda, ma me basd-a lame. Kũun niyns fãa y sẽn deeg b nengẽ, mam pa rat bũmb be ye.

⁶F tõe n kell n yiisda ligd ning sẽn dɩt f soolmẽ wã.

⁷Zerizalɛɛm ne a wẽnd doogã yi-la m soolmẽ zãnga, fo n so zab teedã f sẽn kudã,

⁸la ro-bɛdã f sẽn me n ning f tãb-biisã. Sã n ya yaood niyns fãa f sẽn da tog n yao dĩma, dũnna tɛka, m basda rẽ fãa taale.

⁹D sã n wa zab n deeg d tẽnsa gilli, m na kõ-foo ne f nebã la f wẽnd doogã, kũun sẽn na n yãng f pẽgr dũni wã fãa pʋgẽ.»

¹⁰Koabg la pisopoe la a yoob yʋʋmde, a Antiyokus yi n dɩka a ba-yir sore. Tãb-biisa tũ-a lame. Sẽn pa-b ne a Trifõ wã n da ka le ya wʋsgo.

¹¹A Antiyokus diga a Trifõ t'a zoe n tees Dora.

¹²A ra miime tɩ yɛla na n pak-a lame t'a neba zoe n bas-a lame.

¹³A Antiyokus wẽe a sik Dora ne tãb-biis tus koabg la wed-dʋʋdb tus a nii.

¹⁴A tãb-biisa kẽe tẽnga t'a koom-kogenda yi mogra tẽnsʋka n kolg tẽngã, woto b gũbga tẽngã zĩig zãnga, zĩig ka sẽn tõe n paam n kẽ bɩ paam n yi ye.

¹⁵A Numeniyus ne a tũud-n-taas yii Rom n wa ne sɛb, dĩma ne a soolem dãmb yĩnga. Sɛba gʋlsa woto:

¹⁶«Rom dãmb taoor soaba a Lusiyus n pʋʋsd dĩm a Ptoleme.

¹⁷Zʋɩf rãmba, tõnd zo-rãmb la d sõangdba, tʋma neb d nengẽ n na n le maneg n yõg zood wa pĩnda. Yaa maan-kʋʋd kãseng la taoor dãmba n tʋm-ba.

¹⁸B waa ne gãong sẽn dõog ne sãnem la a zɩslem taa neb a yiib zɩɩbo.

¹⁹Dẽ fãa yĩnga d gesame tɩ togame tɩ d gʋls d soolma rãmba tõre n wilg tɩ ka segd tɩ d bao b noor ye, tɩ d zab ne b ye, tɩ d maan zood ne b bɛɛb ye.

²⁰D sakame n deeg b gãongã b sẽn wa ne wã.

²¹Neb sã n yi Zʋɩf rãmb tẽngẽ n zoe n wa soond yãmb nengẽ, bɩ y lebs-ba a Simo t'a sɩgb-b wala b noya sẽn yalse.»

²²B toola sebrã a Demetriyus, a Atal, a Ariarat, a Arsas.

²³B tool-a-la tẽns wʋsgo: Sampsame, Spart, Delos, Mindos, Sisiõ, Kari, Samos, Pãnfili; Lisi, Alikarnas, Rod, Fazelis, Kos, Side, Arados, Gortin, Knid, Sɩpr la Sirɛn.

²⁴Yaa seb kãng me la b tool maan-kʋʋd kãseng a Simo.

²⁵A Antiyokus ra wẽe a sik Dora noorẽ la a ra yẽrgdame n kolgd beoog sẽn vẽege la a ra segend zab-teed sẽn ya bɛd-bɛda n na n wã tengã. A Trifõ ned da ka le tõe n yi la a kẽ tẽnga ye.

²⁶A Simo toola a Antiyokus neb tus a yi sẽn mi zabr sõmb-sõmbo tɩ b tɩ sõng-a, n paas wanzurf la sãnem la zab-teed wʋsgo.

²⁷A zãgsame, n tol n zĩnd tẽngre n lebs a zelemde, n yeel tɩ sẽn da seda fãa ka le yɛs ye. A moora teema zãnga.

²⁸Ad a sẽn tʋm a zoa a Atenobiyus t'a wa yeel a Simo: «Yãmb deega Zope, Gezɛr, la zabr kõn-ling-m doogã sẽn be Zerizalɛɛm. B bee m soolmẽ.

²⁹Yãmb sãam-b lame, yãmb maana wẽng ne m nebã, yãmb deega m tẽnse n fãoog ne y rẽnna.

³⁰Lebs-y maam m tẽnse, wa-y ne b yõor yaood y sẽn deege tɩ b ka be Zɩɩda tẽng soolmẽ ye.

³¹Ka rẽ bɩ y wa ne wanzurf sẽn ta neb kobs-yoob la pis-nu zɩɩbo n yao teedã y sẽn zɩ n loogã la y wa ne wanzurf sẽn le ta neb kobs-yoob la pis-nu zɩɩbo n lebs fadgã y sẽn deeg b nengẽ wã. Sã n ka rẽ d na waa n tak zabr ne yã.»

³²Dĩma zoa, a Atenobiyus, waa Zerizalɛɛm n yãend a Simo arzɛkã, a rooga sẽn pid ne sãnem, ne wanzurf lagdo, a vɩɩm sẽn ya rĩm meng-meng vɩɩm. Yɩɩ ne pɛlen-yɩk la a taas dĩma koɛɛga.

³³A Simo leok-a lame: «Yaa d yaab rãmb soolem bɛɛba sẽn da wʋke tɩ d le tɩ reege, Ka bu-zẽnd dãmb laogo, ka buud a to soolem ye.

³⁴Sega ne d zu-noog bala tɩ d paam n deeg d ba rãmb bũmbu.

³⁵Sã n ya ne Zope la Gezɛr la y rata, bãng-y tɩ yaa tẽns sẽn da maan wẽng wʋsgo, tẽns sẽn da wãad b taaba, la tẽn-bãmb yaood yĩnga d kõt-f-la wanzurf sẽn ta neb koabg la pis-nu zɩɩbo.» Sẽn tʋm a soaba pa yaag a noor ye.

³⁶A lɛɛg n waa dĩma nengẽ ne sũ-puuri. A wilg-a-la a Simo leokre la arzɛka a sẽn yãendã la rẽ me yika dĩma sũuri.

³⁷A Trifõ kẽe koom koglgo n soos m looge Ortosiya.

³⁸Dĩma yeela a Kendebe t'a yɩ mogra noor tãnsoaba la a kõ-a-la tãb-biis la wed-dʋʋdba.

³⁹A yeel-a lame t'a kẽng Zɩɩda soolmẽ ne a tãb-biisã la a me Kedrõ n ning a kut kʋɩlense la a zab sõma ne Zʋɩf rãmbã. Dẽ poore dĩma babsa a Trifõ.

⁴⁰A Kendebe taa Zamniya t'a sɩ-lakra sɩnge. A kẽe Zɩɩda soolmẽ n yõgd n suiid doogo la a kootẽ.

⁴¹A sẽn me Kedrõ n sɛ, a ninga wed-dʋʋdb la tãb-biis tɩ b be be n yit la b kẽedẽ la b saad Zɩɩda tẽn-peelem wala dĩma sẽn da kõ-a noore.