Read SEBR SÕNGO, 1998 1MAKABE 2 Bible Online

1MAKABE 2 - SEBR SÕNGO, 1998 bible

1MAKABE 2

¹Dẽ wẽnde a Matatiyas yii Zerizalɛɛm n wa kẽ Modin tẽnga. A Matatiyas yaa a Zã biiga, maan-kʋʋd a Simeõ yagenga, a Zoarib buudẽ.

²A Matatiyas da tara kom-dibli a nu: a Zã, b sẽn da boond t'a Gadi;

³a Simeõ, sẽn boond t'a Tasi,

⁴a Zɩɩda, sẽn boond tɩ Makabe,

⁵a Elazar, sẽn boond t'a Awarã, n paas a Zonatã, sẽn boond t'a Afus.

⁶A sẽn yãe tʋʋm-wẽna fãa sẽn da maand Zɩɩda la Zerizalɛɛm pʋgẽ,

⁷a kelmame: «M ba yee! Yell pak tõndo; m dogame n na n yãend m buud sãoongo la Tẽn-sõnga wãabo. M maanda bõe n ket n zĩ sɩɩ tɩ tẽn-sõngã lʋɩt a bɛɛb nusẽ, tɩ bu-zẽmb kẽed wẽnd dooga pʋga?

⁸Sɩda wẽnd dooga lebga wa na-biig sẽn lebg talga,

⁹b wʋka a te-neeb sẽn da yaa a faongã n looge, b kooda a kom-peelse a sɩmannẽ; bɛɛba sʋʋg me looga ne a kom-bɩɩbã.

¹⁰Bu-zẽmba wala a yeyn-ye n loog ne a laogã.

¹¹B piida a fan teeda fãa; a ra yaa burkĩna la a lebga yamba.

¹²Bãng-y tɩ tõnd wẽnd doogã, do-sõngã, n da ya d zu zẽkre. Ad a sẽn lebg raboogo, la bu-zẽmba rẽgem-a lame.

¹³M vɩɩma võore le bee yɛ?»

¹⁴A Matatiyas ne a kamba kẽesa b fut n yeelg peen gʋsd futu la kʋʋr kɛleng la b kelem yã.

¹⁵Dĩma sẽn yiis neb niyns tɩ b wa Modin n modgd tẽnga rãmb tɩ b kʋ maanda sɩd waame.

¹⁶Israyɛl kamb wʋsg kẽnga b nengẽ la a Matatiyas ne a kamba pa-la b zĩigẽ.

¹⁷Sẽn tʋm b rãmba sɩnga goama n yeel a Matatiyas: «Fo yaa nin-naaba, la nin-kãsenga, foo ne f kamb la f saam-biisi tẽn-kãnga pʋgẽ.

¹⁸Dẽ yĩng bɩ f yɩ pipi n deeg dĩma noore tɩ buud a taaba fãa maanda boto, ba Zɩɩda nanamse la d sẽn bas b rãmb Zerizalɛɛm pʋgẽ. Foo ne f kamba na n lebga dĩma zo-rãmba, a na n waooga foo ne f kambã, a na n waooga foo ne sãnem la wanzurf la kũun ka tɛka.»

¹⁹A Matatiyas zẽka a koɛɛg n yeele: «Ba dĩma soolma rãmb fãa sã n bas b rog-n-mik n deeg dĩma noore,

²⁰maam ne m kambã la m saam-biisã, tõnd yẽ na n kell n talla d yaab rãmb dog-n-mika bala.

²¹Wẽnd na zãag d ne d dog-n-mika basgo!

²²Tõnd sẽ kõn kelg dĩma, d kõn yi Wẽnd poorẽ, d kõn bʋdg rɩtg bɩ goabg ye.»

²³A sẽn gom woto n sɛ la Zʋɩf a ye sẽn kolg n na n kʋ maoong neba fãa nifẽ, Modin maan-kugra zugu, wala dĩma noora sẽ da ratã.

²⁴A Matatiyas sẽn yãe woto, a sũur widga wa bugum, t'a yĩnsa fãa rigda, a sũur puuga wʋsgo t'a wudg n kodg raoã maan-kugra zugu.

²⁵A kʋʋ na-yir-dao wã, sẽn da modgd-a tɩ b kʋʋd maandã la a tusa maan-kugra meng n lubi.

²⁶Wẽnnaam Noora nonglem sẽn da wit a sũurẽ wã da wẽnda a Pinas rẽnna sẽn kɩt t'a yik ne a Salu biig a Zimri.

²⁷Woto la a Matatiyas moon tẽnga pʋgẽ: «Ned ninga sẽn tar-a Wẽnnaam Noora sũuri bɩ a pʋg maam! Ned ninga sẽn gãd-a tõnd dog-n-mikã bɩ a pʋg maam!»

²⁸Yẽ ne a kamba basa b sẽn da tar fãa tẽnga pʋgẽ n zoe n tɩ soond tãmsa zutu.

²⁹Wakat kãnga, neb wʋsg sẽn da baood sɩda la zemsgo kẽnga weoogẽ n tɩ zĩ be,

³⁰bãmb ne b kamb la b pagb la b rũmsi, tɩ yel-beeda da wa lʋɩ b zug ye.

³¹B tɩ yeela na-yir dãmbã la tãb-biisã sẽn pa Zerizalɛɛm, a Daviid na-tẽngẽ, tɩ neb n kɩɩsd dĩma noore la b zoe n tɩ baoo zĩig weoogẽ n soonde.

³²B yiisa tãb-biis wʋsgo n babs-ba la b sẽn yãend-b vʋʋsg raare, b seglame n na n tak zabr ne-ba.

³³B reng n yeel-b lame: «D ya n yɛɛ ne yãmba, yi-y n deeg-y naab noore n paam n põse!»

³⁴Tɩ b leoke: «Bada! D kõn yi ye, d kõn deeg dĩma noor n tõdg vʋʋsg daar dẽn ye.»

³⁵B kaooga zabr ne bãmb zĩig pʋgẽ,

³⁶la b pa sak zabr ye, b ka lobg kugr meng ye, b sẽn da soond bok ninga pʋgã b pa yẽd a noor meng ye.

³⁷B yeelame: «D fãa ki ne pʋ-peelem, tɩ yĩngr la tẽng tara kaseto tɩ b kʋʋd-d-la ne d bʋʋm.»

³⁸Tãb-biisa sɩd kaooga zabre ne bãmba, vʋʋsg raare, la b fãa kiime, bãmb ne b pagba la b rũmsi, bãmb na ta tusri.

³⁹A Matatiyas ne a poorẽ dãmba sẽn wʋm woto, b yãba yãb toogo, b sẽn kʋ b rãmba yĩnga la b yeela taaba:

⁴⁰«Tõnd sã n maan wala d saam-biisã, d sã n tõdg zabr ne bu-zẽmbã, d kõn fãag d yõore la d dog-n-mika ye. Yaa tao-tao bala la b na n menes-d tẽng zugu ka.»

⁴¹Badaar bala b yẽsa ne taab woto: «D na yalsame n zab ne ned ninga fãa sẽn na n taka zabr ne tõnd vʋʋsg raare, woto d fãa kõn ki wala d saam-biisa sẽn pa-b tãnga bokẽ wã ye.»

⁴²Ad-y neb sẽn boond tɩ Asidim (a nong pʋʋsg rãmba) waa n fãooga bãmba. Yaa Israyɛl kamb sẽn tar sũ-keelem la sẽn da gãd Wẽnnaam Noorã ne b pãng tɛka.

⁴³Neb niyns fãa sẽn da zoet-ba n digd weoogẽ n na n põsã waa n naaga bãmb me n paas b sõor la b pãnga.

⁴⁴B tãb-biis lebga zembala tɩ b na n pãb wẽn-kɩɩsdba ne sũ-puuri, n na n pãb nin-wẽnsã ne sũ-toogo tɩ wʋsg na n zoe n ligl b meng bu-zẽmba sʋka.

⁴⁵A Matatiyas ne a neba saame n tus maan-kugã n lubi la b kẽes bãongo kamb niyns sẽn da pa kẽ-bã.

⁴⁶Kom-bõones fãa b sẽn yãend Israyɛl tẽnga, b kẽes-b-la bãongo ne pãnga.

⁴⁷B riga wilg-m-meng rãmbã. B sẽn sɩng fãa baasa neere.

⁴⁸B gʋsga Noora sebr bu-zẽmba la dĩm dãmb nusẽ; b komsa yel-wẽn-maandba.

⁴⁹A Matatiyas pʋlemd taa a raare la a yeela a kambã. «Ade, marsã lebga wilg-m-meng la paoog-taab zamaan, lebga sũ-puur la zab wakato.

⁵⁰M kamba, tall-y Wẽnnaam noorã y sũurẽ. Ba d na ki zood kʋdga yĩnga, zooda ne d Wẽnda yĩnga, bɩ d ki.

⁵¹Tẽeg-y saam dãmb tʋʋm sõma n togs-ba tɩ y na paam ziir la y yʋʋr kõn menem moog ye.

⁵²A Abraam zu-loees yɩɩ wʋsgo la rẽ pa sãam a tẽeb ye; pʋs n yaa rẽ la b ges yã wa a sõmblem kaseto.

⁵³A Zozɛf sẽn waa n tar pɛta, a tũu Noora, yaa rẽ yĩng la a lebg Ezipt soaala.

⁵⁴Tõnd ba a Pinas sũur sẽn widg ne Wẽnnaam nõnglem, paama maan-kʋʋr naam sẽn kõn sɛ kãabgo.

⁵⁵A Zozuwe sẽn deeg Noor yĩnga, a lebga bʋ-kaood la Sileto Israyɛl tẽnga.

⁵⁶A Kalɛb sẽn kõ kaset-sɩd yĩnga, Israyɛl sagsa tigma taab n kõ-a a pʋɩɩre.

⁵⁷A Daviid sẽn yɩ wẽn-tũud yĩnga, b kõ-a-la naam zaoor sẽn kõn viig abada.

⁵⁸Wẽnnaam Noora nonglem sẽn da rɩt a Eli yĩnga, b rʋʋs-a-la arzãna.

⁵⁹A Ananias, a Azariyas la a Mikayɛl tẽeb fãag-b-la bugmẽ.

⁶⁰A Daniyɛl pʋ-peelem fãag-a-la bõnyẽes noorẽ.

⁶¹Bãng-y tɩ zamaana sẽn tong taabã, sẽn teeg-b Wẽnd zɩ n lʋɩ ye.

⁶²Da bas-y tɩ yel-wẽn-maandba yɛɛs-y ye, yel-wẽn-maanda yaa põosg la zũnzũi rɩɩbo.

⁶³A tara ziir dũnna la b pa le get a beoog ye. A lebda a sẽn yiẽ, tẽng tomẽ; a kongda a sẽn kãab a meng bũmb ning fãa.

⁶⁴M kom-sõma, maan-y daoodo la sũ-keelem, n deeg noorã tɩ yaa rẽ bal n na n kɩt tɩ yãmb zug zẽke.

⁶⁵M miime tɩ yãmb kẽem a Simeõ yaa rao sẽn tõe n sagl a taaba; kelg-y y kẽma daar fãa. Bas-y t'a yɩ yãmb ba.

⁶⁶A Zɩɩda Makabe yɩɩ gãndaoog al a yãadmẽ, yẽ la y tãnsoaba, yẽ n na n lʋɩ yãmb taoore tɩ y tɩ zab ne bu-zẽmba.

⁶⁷Bɩ y bool sẽn tũud-b Wẽnnaam noora fãa tɩ b wa sõng-y tɩ maan daoodo n dok y sũuri.

⁶⁸Lebs-y bu-zẽmba wẽng ning fãa b sẽn maan yãmbã. Gãd-y ne y sũur fãa Noora la Sebrã sẽn yeel fãa.»

⁶⁹La a sẽn gom woto a ning-b-la barka la a kiime.

⁷⁰A ki-la a yʋʋm koabg la pis-naas la a yoobe. B mum-a-la Modin, a saam dãmb yaoogẽ. A Israyɛl fãa yãb-a lame la a maana a kʋʋre.