Read SEBR SÕNGO, 1998 1MAKABE 3 Bible Online

1MAKABE 3 - SEBR SÕNGO, 1998 bible

1MAKABE 3

¹A Zɩɩda, b sẽn boond a soab t'a Wẽnd zãare, n led a Matatiyas zĩiga.

²A ba-biis la a ba zo-rãmb fãa yik n sõnga a Zɩɩda tɩ b zab ne raoodo a Israyɛl yĩnga.

³A kɩtame t'a buud yʋʋr yi. A boba a zab-teedo, n yeelg kut wa gãndaada sẽn yeelgdã. A taka zabr naoor yaka; a koomda zabr sʋʋga n na n gũ a tãb-sika.

⁴A raood yaa gɩgemd rẽnna, a wẽnda gɩgem-pol sẽn yãbd n baood a rɩɩbo.

⁵A gẽesa wẽn-kɩɩsdba zĩig fãa n zab ne-ba, a yõoga bugum sẽn da lakd-a a buuda sɩɩgã.

⁶Rabeem luba nin-wẽns a taoore, fãa yalsa ne yam-yoaaga, a fãaga a buud ne a nug pãnga.

⁷Dĩm dãmb ka tɛk noor vama ne sũ-toogo t'a Israyɛl noor yaool n yõgemd ne laado. A Israyɛl na tẽeg a yelle n pẽg-a zamaan buud fãa.

⁸A Israyɛl põsa Wẽnd beem t'a saa n diga wẽn-kɩɩsdba fãa n yis a tẽn-peelmẽ.

⁹Ba dũni sɛtmẽ dãmb pẽga a yʋʋre; a tigma sẽn da menem-bã.

¹⁰A Apoloniyus tigma bu-zẽmba la Samari tãb-biisi wʋsgo n na n zab ne a Israyɛl.

¹¹A Zɩɩda sẽn bãng rẽ, a yi n seg-a lame n tõog-a. Wʋsg kii sãmpog-kũum tɩ sẽn kell-ba zoe.

¹²A wʋka b laogo; a Zɩɩda a toore n deeg a Apoloniyus sʋʋgã la yẽ la a tall n zab a zabã n tãag a kũum.

¹³Siri rãmb tãnsoab a Serõ sẽn wʋm t'a Zɩɩda tigma zab-teed la tãb-biisi, a yeela a sũurẽ:

¹⁴«Mam na n baoo yʋʋr la ziir m saam-biis sʋka, m na n zaba ne a Zɩɩda la a nebã sẽn sãbsd dĩma noya.»

¹⁵Yẽ me kẽnga ne tãb-biis sẽn ya ka tɛka la sẽn ya wẽn-kɩɩsdba, n na n tɩ sɩbg a Israyɛl.

¹⁶A sẽn kolg Bɛtorõ kunkubrã, a Zɩɩda yii ne neb kẽer bala n seg-a.

¹⁷A Zɩɩda neba sɩd da ka zem bũmb ye la b sẽn yãe a Serõ tãb-biisa tɩ b ya wʋsgã b yeelame: «Tõnd paood ne d zab ne zãma woto fãa, paas me, d gãanda kom tɩ yaams tar-do.»

¹⁸Dẽ la a Zɩɩda leok-ba: «Zãma kãseng pa tõe n lʋɩ neb bilf nusẽ la? Wẽnd n tõe tɩ wʋsg wa ne fãagre wa b sẽn tõe tɩ fãagr yi bilfr nengẽ.

¹⁹Tõog bɛɛb zabrẽ pa tũud ne tãb-biis sõor ye, Yĩngr-Soaala nengẽ la pãng yita.

²⁰Nin-bãmba sẽn wat n na n zab ne tõndã pida ne wẽnem la tɩtaam; b rat n menesa tõnd ne d pabg la d kamba la d laogo.

²¹Tõnd sẽn na n zab d noya la d dog-n-mika yĩngã,

²²Wẽnd na n beds-b-la d taoore. Dẽ yĩnga, ra maan-y rabeem ye.»

²³A Zɩɩda sẽn gom woto, a fõdame n bʋʋg bɛɛbã, dẽ tɩ b nan ka segl n sɛ ye. A Serõ ne a tãb-biisa paama sãmpoaga.

²⁴A Zɩɩda rɩg-b-la Bɛtorõ kunkubra zugu n sig tẽn-nabrẽ. Neb kobs-yi n lʋɩ zabrẽ wã tɩ sẽn põs-ba zoe n tɩ kẽ Filisti rãmb tẽnsẽ.

²⁵Neba sɩnga a Zɩɩda ne a neba nif zoeese, bu-zẽmba sẽn gũbg-b bãmba sɩnga yɛɛsgo.

²⁶A Zɩɩda yʋʋr yiime. Dĩma me wʋmame; sɩda ninsaalb buud fãa da gomda a yelle.

²⁷Yɛla lʋɩ-la a Antiyokus tʋbrẽ t'a sũur puug wʋsgo, t'a kɩt tɩ b tigs tãb-biis la zab-teed fãa sẽn da be a soolmẽ. A tãb-biisa da yaa gãndaad gilli.

²⁸A paka a ligda kogendo n yao a tãb-biisa fãa yʋʋmd a yembr tõr ligdi la a yeel-b tɩ b segl b mense.

²⁹A yãee wakat kãng t'a ligda na n paoogame tɩ tẽnsa ra pa le yaood b yõor yaood ye; rẽ yaa zems taab kaalem, la b sẽn tudg n yẽes saam dãmb dog-n-mik yĩnga.

³⁰Wala a sẽn yãend naoor yaka, a zoe ligda na n wa paoog b rɩ-rɩtem. A sẽn da nong n kõ wʋsgã, a zoe-la a na n wa pa tõog n kõ wa pĩnda.

³¹A yam bondgame la a yeelame t'a na n kẽnga Pɛrs n sa tẽnsã n dees yõor yaoodo, n wa ne ligd wʋsgo.

³²Yaa na-biig a Liziyas la a bas yã t'a yõdg n ges a soolma yelle, sẽn sɩng Efrat n tãag Ezipt toaaga.

³³Yẽ la a yeel yã t'a ges a biig a Antiyokus yelle t'a kẽng la a lɛɛg n wa.

³⁴Yaa ne-yẽ la a bas a tãb-biisa pʋɩ-sʋka la a wobdã. Yẽ la a wilg a sẽn dat bũmb ninga ne Zɩɩda la Zerizalɛɛm dãmba.

³⁵A kõo-a-la noore t'a yõdg n yiis tãpo n kʋ tãb-biis niyns fãa sẽn kell-b Zerizalɛɛm, n yẽes b yʋʋr moogo,

³⁶n deeg b tẽngã n kõ nin-zẽmba, n tãag tẽngã n pas n pʋɩ zãnga.

³⁷Yaa yʋʋmd koabg la pis-naas la a yopoe soaba la dĩma loog ne tãb-biisa pʋɩ-sʋka sẽn kellã, n yi Antiyos, a na-tẽngẽ. A rʋʋga Efrat n dig zugẽ.

³⁸A Liziyas yãka a Dorimen biig a Ptoleme la dĩma zo-rãmb a Nikanor ne a Gorziyas.

³⁹A tʋm-b lame ne tãb-biis tus pis-naase la wed-dʋʋdb tus a yopoe tɩ b tɩ wã Zɩɩda tẽnga wala dĩma sẽn da wilgã.

⁴⁰B sẽn dɩk sor ne b tãb-biis ka tɛkã, b taa Emmayus sɛɛgẽ n wẽ b sika.

⁴¹Tẽnga toandb wʋma b waoongo, b bʋʋg-b-la ne wanzurf la sãnem gil wʋsgo la wĩ n na n da Israyɛl kamba wa yem-daado. Neb a taab yii Edom la Filisti n wa paas-ba.

⁴²A Zɩɩda ne a ba-biisã mikame tɩ yɛla sẽbgame n yɩɩd pĩnda, tɩ b tẽnga gũbga ne tãb-biisi; b tẽegame tɩ dĩma kõo noore tɩ b sãam b buuda zãnga.

⁴³Dẽ la b yeel taaba: «D vʋʋg d buudã, d zab d buudã la d wẽnd doogã yĩnga.»

⁴⁴B tigma nebã n segl zabr teedo la b pʋʋsa Wẽnnaam n bõs b sõngr la b nimbãan-zoeere.

⁴⁵Zerizalɛɛm da lebga vɩʋʋg wala zĩ-peen-daaga; ned da ka le kẽedẽ la a yit a pʋgẽ ye. Wẽnd dooga ra rẽgmame, na-yira ra pida ne nin-zẽmba, a ra lebga bu-zẽmb gãaga. Sũ-noog buud fãa ra zãaga ne a Zakoob. Wɩɩg ra ka le peebd ye, kʋnd ra ka le wẽed ye.

⁴⁶Zʋɩf rãmb tigma taab n dɩk Mispa sore, tɩ pĩnda pʋʋsg roog n da me be, a Israyɛl yĩnga.

⁴⁷Badaare b loe noor la b sẽgen peen-gʋsdo, n yug b zut tompɛglem la b kẽes b futu.

⁴⁸B laka Noora sebre n karem n ges yaa bõe la bu-zẽmba na n kosẽ b wẽn-naandsã baraare.

⁴⁹B waa ne maan-kʋʋr futu, b rɩgla Wẽnd pʋɩɩre la b kood rẽemse; b kɩtame tɩ sẽn baas b nazir pʋleng paalem-paalem kolge.

⁵⁰B zɛka b koɛɛg n kelem Yĩngr-Soaala n yeele: «D na n maana a wãn ne d nebã, d na n tall-b lame n kẽng yɛ?

⁵¹Wẽnd do-sõnga sãamame, a rẽgmame, yãmb maan-kʋʋdba zĩi ne ko-yũud la yãnde.

⁵²Ninsaalb buud fãa sũu taab n na n zab ne-do, n na n wã d zãnga.

⁵³Yãmb mi b sẽn geend bũmb ninga. Tõnd na n yɩɩ wãn n tall daood bãmb taoore, yãmb sã n pa sõng-do?»

⁵⁴Dẽ poore b peeba tõntõodo la b zẽka b koɛɛg n kelme.

⁵⁵A Zɩɩda yaool n sʋka nanamsã: tusr naaba, koabg naaba, neb pis-nu, neb piig naaba.

⁵⁶Sẽn da me-b roog paalem, sẽn kẽ-b kãadem paalem, sẽn sel-b bugsuntung paalem, dabeem sẽn da tar b rãmbã, a yeela bãmb tɩ b leb yiri, tɩ bãmb poorẽ, Noora ra goma vẽenega.

⁵⁷Zʋɩf rãmba tãb-biis rɩka sore la yaa Emmayus rɩtg la b tɩ wẽ b sika.

⁵⁸A Zɩɩda yeel-b lame: «Ned kam fãa bao a zab-teedo, ned kam fãa segl a meng n gũ beoogo n zab ne bu-zẽmba sẽn tigim taab n dat n wã tõnd la wẽnd doogã.

⁵⁹Tõnd sẽn na n pa zabrẽ, n são d sẽn na n yãe buuda la wẽnd dooga sãoongo.

⁶⁰La Yĩngr-Soaba maan sẽn taa a yam!»