Read SEBR SÕNGO, 1998 1MAKABE 4 Bible Online

1MAKABE 4 - SEBR SÕNGO, 1998 bible

1MAKABE 4

¹A Gorziyas peega a tãb-biis tus a nu wã la a wed-dʋʋdb mitb tusrã ne yʋngo,

²sẽn na n yɩlẽ n ling Zʋɩf rãmbã b tãb-sikẽ n paam-ba n pãbe. Yaa sẽn da be-b na-yirã n lʋɩ taoore n wilg b sore.

³A Zɩɩda sẽn bãnge, yẽ me yi ne a gãndaado. B sɩnga kẽnde n na n tɩ tak zabre ne dĩma tãb-biisã, Emmayus tẽnga.

⁴Wakat kãng tɩ yẽ meng tãb-biisa nan ka tigim taab zĩ-yɛng ye.

⁵Dẽ n so t'a Gorziyas sẽn wa ne yʋngã, a pa yãe ned Zɩɩda sikẽ ye. A dʋ tãmsã n na n bao-ba, a ra yeta a sũurẽ: «B zoeta tõnd taoore.»

⁶Sõor sẽn puki, a Zɩɩda ne a tãb-biis tus a tã lika b menga. B ra tʋlgẽ la zab-teed sẽn ya sõma n yɩɩd b sẽn tarã.

⁷B yaool b yãee bu-zẽmba tãb-sikã ne a pãng la a ziiri; b wãaga gũbr ne wiidi tɩ b tãb-biis ya zab-mitb zãnga.

⁸Dẽ la a Zɩɩda yeel a nebã: «Da zoe-y zãma kãnga ye, a kaoogd zabr ne yãmb me bɩ y ra yɛɛs ye.

⁹Tẽeg-y tɩ Wẽnd fãaga d saam dãmb Rudum Mogrẽ, Ezipt dĩma tãb-biisa nusẽ, b sẽn da waa n digd bãmb n na n yõke.

¹⁰D kelem marsã n bool Yĩngr-Soaalã, tɩ daare b na zoe d nimbãanega; b na tẽeg b zoodã b sẽn yõg ne d saam-dãmbã la b na beds tãb-biisa sẽn be d taoorã.

¹¹Dẽ la ninsaalb buud bãngd tɩ Ned n be n fãagdẽ la a yolsd a Israyɛl.»

¹²Bɛɛba zẽka b neng n yãe Zʋɩf rãmba tɩ b wat n na n tak zabr ne bãmba.

¹³Bãmb me yikame n seg-ba.

¹⁴A Zɩɩda tãb-biisa peeba tõntõodo tɩ zabr sɩng; b tõoga bu-zẽmbã tɩ b zoe n dig bãooga sẽnẽ.

¹⁵B kɛɛ neb niyns fãa sẽn pa-b poorẽ wã ne sʋʋg n kʋ. B rig-b lame, bãmb na ta tus a tã n ta Gezɛr la Edom la Azot wetã.

¹⁶A Zɩɩda sẽn da be taoor n digd bɛɛba lɛɛg n waame n yeel:

¹⁷«Yõk-y y meng nanda la y ra zɛ teeda ye tɩ zabr a to n nan gũud yãmba.

¹⁸A Gorziyas ne a tãb-biisa keta tãnga zugu, b pa zãr ne tõnd ye. Bɩ y yals tɩ d zab ne-ba tɩ y na yaool n wa wʋk teedã wala y sẽn date.»

¹⁹A Zɩɩda sẽn gom n sɛ la bɛɛb kẽer sẽn lik b menga, tãnga zugu n gẽegd bãmba.

²⁰Bɛɛba yãeeme tɩ b tãb-biisa zoeeme la b tãb-sika dɩɩ bugum tɩ bug-zõos nukdẽ n kõt rẽ kaseto.

²¹A Gorziyas neba yɛɛsame tɩ b yãenda a Zɩɩda tãb-biisã tẽn-nabrẽ tɩ b segend zabre.

²²La rẽ yĩnga b zoeeme n dig Filisti tẽnga.

²³A Zɩɩda lɛɛg n wa zɛɛ tãb-sikã. B wʋka sãnem la wanzurf ne pɛɛl sẽn los miuug la kẽega n paas arzɛgs a taaba.

²⁴Zʋɩf rãmb lɛɛgame n yɩɩnẽ la b pẽgd Yĩngr-Soaala tɩ b yaa nin-noanga la b nonglem ka be tɛk ye.

²⁵Badaare fãagr tʋʋmd kãseng n tʋm Israyɛl tẽnga.

²⁶Sẽn zoe-b n põsã tɩ togsa a Liziyas bũmb ning fãa sẽn maane.

²⁷A wʋmame t'a yam bondg tɩ yɛla pa yɩ wala a sẽn da rata ye.

²⁸Yʋʋmd sẽn vẽke, a tigma gãndaad tus pisoobe ne wed-dʋʋdb tus a nu tɩ raare b na yaa n tõog Zʋɩf rãmbã.

²⁹B waa Idume n gãneg tãp Bɛtsur. A Zɩɩda tɩ seg-b-la ne neb tus piiga.

³⁰A Zɩɩda yãeeme tɩ tãb-biisa yaa wʋsgo la b yaa gãndaado t'a pʋʋs woto: «Yãmb n so pẽgre, Israyɛl Fãagda. Yãmb n kõ y sõgna, a Daviid, pãnga t'a lub nin-wobgã. Yãmb n ning Filisti rãmba tãb-sik a Sol biig a Zonatã ne a a sõgna nusẽ.

³¹Woto me bɩ y sagl zãma kãnga a Israyɛl nusẽ t'a mum-a. Kɩt-y tɩ b pãnga la b wed-dʋʋdba da wa ne bũmb a to tɩ ka b yãnd ye.

³²B zoe n tags tɩ b pa na n maan daood ye, tɩ rẽ kẽes b rabeem la a koms b zãnga.

³³Sãam-y bãmba, ne yãmb kamba sʋʋga, tɩ b tõog n pẽg yãmb yʋʋra ne yɩɩla.»

³⁴Zabra sɩngame la a Liziyas tãb-biis na ta tus a nu n pa zabrẽ.

³⁵A Liziyas yãeeme t'a tãb-biisa kʋɩ tĩiga, n yãe t'a Zɩɩda tãb-biisa da yaa gãndaad sẽn yet tɩ b na vɩɩnd la b ki ne sũ-keelem. Dẽ yĩnga a leba Antiyos n tɩ bao tãb-biis yɛsa. Tãb-biis a sẽn yãka sõor yɩɩga pĩnda t'a lɛɛg n wa Zɩɩda tẽnga.

³⁶Ad a Zɩɩda sẽn yeel a saam-biisa wakat kãnga: «Tõnd tõoga d bɛɛbã, d kẽng n tɩ yɩlg d wẽnd doogã n le maneg n dɩk-a n kõ Wẽnde.»

³⁷Tãb-biisa fãa tigma taaba n dʋ Siõ tãnga.

³⁸La sɩda, b yãeeme tɩ wẽnd dooga lebga raboogo, tɩ maan-kugra wãame, tɩ kʋɩlensa rɩɩ bugum, tɩ wẽnd dooga zak yit tuudu wala weoogẽ bɩ tãng zugu, tɩ maan-kʋʋdba roto pedsd n lʋɩtẽ.

³⁹B kẽesa b futu n yãb yãb toodo la b yug b zut tompɛglem.

⁴⁰B da fõgnega b neng tẽnga tɩ tõntõoda sã n peeb bɩ b kaasd ne Yĩngr-Soaala.

⁴¹A Zɩɩda kõo neb kẽer noore tɩ b zabdẽ ne bɛɛbã dẽ tɩ yẽ meng kãasda wẽnd dooga rẽgdo n manegd-a zãnga.

⁴²A tũusa maan-kʋʋdba sẽn pa rẽgem b mense la sẽn tũud-b Wẽnnaam noya ne pʋ-peelem,

⁴³tɩ b yɩlg wẽnd doogã, n wʋk b sẽn dẽgem kug niynsã n ning toore.

⁴⁴B yẽsame n ges b sẽn na n maan bũmb ning ne yũ-noog maan-kugrã tɩ yẽ me ra rẽgma me.

⁴⁵Tags-sõng waa b yamẽ tɩ b yet tɩ b na n viig-a lame t'a ra wa tak Wẽnd beem ye tɩ bu-zẽmba sẽn dẽgem-a wã yaa wɩɩbdo. B sɩd viig-a lame.

⁴⁶B baoo zĩ-sõng n bĩng a kugã, n gũud tɩ bãngd a ye wa kõ-b Wẽnd koɛɛg b poorẽ.

⁴⁷B rɩka kug sẽn ka peese n me maan-kugr paalga sẽn wẽnd pĩnd soabã.

⁴⁸B le maneg n mee bũmb ning fãa sẽn sãam wẽnd dooga pʋga la b pɩɩsa a zakã.

⁴⁹B le yõga lagd paal wẽnd dooga yĩnga, n ning bug-roagendgã, wisda maan-kugrã, la kũuna bur sẽn dɩgend a soab zugã.

⁵⁰B wisa maan-kugra tɩdare, n yõgen fitilsa b roagendga zugu tɩ b vẽenema tãoosd ne Wẽnd doogã.

⁵¹Bura rɩgla b sẽn tog n dɩgl zĩig ningã, peen-lutga yaglame, bũmb fãa manegame n baase.

⁵²Kiuug a wɛ soaba, Kislewu kiuugã, a pisi la a nu daare, koabg la pis-naas la a nii yʋʋmde la rẽ fãa maan yã.

⁵³B Yika sõor a ye n kʋ maoongo, wala sẽn gʋls Sebra pʋgẽ, yũ-noog maan-kug paalla zugu.

⁵⁴Bu-zẽmba sẽn da rẽgem maan-kugra raare, yaa baraare la a paam yɩlgre.

⁵⁵Neba fãa wõgemdame n pʋʋse, n yɩɩle la b pẽg Yĩngr-Soaala tɩ b sõng-b lame tɩ b tõog b bɛɛba.

⁵⁶B maana kibs dasma a nii tõre n kʋ yũ-nood maando la bark pʋʋsg maando. B manega wẽnd dooga ragnoorã n tablg sãnem.

⁵⁷B manega digno-kãsenga lalsã ne sãnem vã-kãam la sãnem gãnd bõonese. B ninga dagnoya la pʋgẽ dota kʋɩlense.

⁵⁸Yɩɩ sũ-noog kãseng ne a Israyɛl, tɩ yãnd ning a sẽn paam bu-zẽmba nengẽ yẽesa zãnga.

⁵⁹A Zɩɩda ne a ba-biisi la a neba gill yeelame tɩ maan-kugra kibsa na n maana a raare, yʋʋmd yʋʋmd fãa, n kaoos dasma a nii, n maan kibsa ne sũ-noogo, kislewu kiuug pisi la a nu raare.

⁶⁰Yaa wakat kãng la b me lals n gũbg Siõ tãnga, lals sẽn ya wogdo, n paas ro lug-lugi, tẽnga gũub yĩnga, sẽn na n yɩlẽ tɩ bu-zẽmba pa le tõog n kẽ wala pĩnd ye.

⁶¹A Zɩɩda ninga tãb-biis Siõ tɩ b na n gũ-a; a maneg n mee Bɛtsur n paas a pãnga la woto Idume rãmb me paama b soondg zĩiga.